YONA 3 - Biblía Axweesantá Hhohho' ar Mungú 2004

Yona iwa iialooeés dír Aakoowo

¹ Axweesantá AAKOÓ MUNGÚ iri hardát dír Yona sagaáwa tsár wa alé, iri oó',

² «Tláw amór yaamaá Ninewi, gixsadá' ur kaweek, ya/abtoodá' naa dirók i oó' ilaharmiseek.»

³ Yona iri tláy, iri Ninewír káy adoodá' AAKOÓ MUNGÚ ngira oó'. Ninewi a gixsár ló'wa ur. Uraywós bihhaá wák wa tleemu ay alhhe'eesaay a har hi'itantá deelo tám.

⁴ Yona iri baraá gixsadá' i dáh, iri baraadá' wa hi'iimiít looa gar wa dát, iri tseeamín iwa kaahi, «Gixsár Ninewi ka qwaarees alaá deelo mibeeri tsiyáhh bira waaráhh.»

⁵ Múk Ninewi Mungú kuri ya/án, kángw tawa gwaawin kuri alki/iít, tlabaá gwadidiingw kiri tsitiít, múk urén nee na/iiwo.

⁶ Kaangwí iri hardáh dír waawutmoó Ninewi. Inós iri gawaá kitángw waawuti'iimarós wa tláy, tlabaawós giri duúx, tlabaá gwadidiingw giri dahaás, iri iwiít gawaá da/arár i alé.

⁷ Inós afo gari ilahaniís, kaangwí kuwa alki/iiti gixsár Ninewiro tawa kaahi, «Hara'ayár waawutmo nee mukdá' urén baraá waawuti'iimarose, a tí: Hee gaa mingiwa tsaáq, tam makiito'o, laqaá tam daqooroó hikwa, laqaá tam daqooroó bee/aangw. Mindiwa /ayiné', laqaá ma'aay mingiwa wahiyé'.

⁸ Ala muu nee makaywo tlabaá gwadidiingw ki tsiiti. Inooín Mungú ku i /aa/i ar afór ur, nee ta warqay, umuú heewo loohirós tidá' tlaakw ngi may, nee tlehhmi'iiwós kudá' tlakw.

⁹ Heé ga xuú' a heemá, doóqa Mungú i ya/án iwa warqay buhhtawós kudá' ngiwa may, as atén mitiwa qwaareés.»

¹⁰ Mungú adór tlehhmi'ii'ín kudá' tlakw kira máy gari ár, Mungú iri ya/án /aymuudá' tlaákw nguwa may, kudá' geera i dir'ín i tleehhi.