YONA 2 - Biblía Axweesantá Hhohho' ar Mungú 2004

Firór Yona

¹ Yona AAKOÓ MUNGÚ guri firín baraá guruú siyoódá' wa alé,

² iri oó', «AAKOÓ MUNGÚ, án kuúng una i /aa/amiím as slahh'amuueé', kuúng iri mu/aywáts. Ana baraá gi'ií wa firiím, kuúng afor'eé' kari axás.

³ Asma ina kwáhh baraá iltá tláwtí alé ay baraá alhhe'eesoó tlawi, ma'aá yaariir iri harweeriyé' bihhe sleémeero. Gwaanduú ma'aay nee ma'aá yaariir nina gawaaér wa/iyé'.

⁴ Aníng nay baraá guruueé' oó', ‹Taa kwaáhh tiri saweés dír ilaawoge, ala hám án a malé qaytsiít amór Do'ók kudá' hhoohhoó' i alé.›

⁵ Ma'aay ina harawa/iyé', ina harweeriyé', iltá tlawi iri harwét, iri tuuntúk. Slarhhír baraá tlawi sakw'eé' guna harwét.

⁶ Niri /eét ay baraá gi'i, afér yaamuueé' kari aluueé' wa tseék ar tseegmór ta gweeriiká baloó ale. Ala kuúng, AAKOÓ Munguúeé', ina slafi dúx baraá bohóngw gwa'arár wa alé.

⁷ Qoomár muunaáeé' iwa /e/etin, AAKOÓ MUNGÚ nguri insláw, firor'eé' niri hardát amoorók i alé, baraá Do'ók kudá' hhoohhoó'.

⁸ Mukdá' munguaá hatlá' haratlintaatií', ta inkihhimuú konká diroge.

⁹ Ala aníng ilahhooár muruú ta tsu/i ngi kuúngií haniís ar afór sluufaay, nee al'axweesante'eé' a boo/eés, asma ba/ama amór i dahh a amór AAKOÓ MUNGÚ!»

¹⁰ AAKOÓ MUNGÚ siyoódá' yangaariír guri i ilawaáts. Siyoódá' Yona guri waá/ afaá tláwtí ale.