YONA 1 - Biblía Axweesantá Hhohho' ar Mungú 2004

Yona iwa iia wasleés dír Aakoowo

¹ Kaangwí an axweesantá AAKOÓ MUNGÚ, tidá' Yona garmoó Amitai, aa axaás, ar kah,

² «Tláw, daqáw dír gixsár Ninewi, gixsadá' ur, tseé' amoorós i ale ar afór ur, asma tlakweemaawós naa hardihiyé' gawaá doorí alé, dír geeraaeé'.»

³ Ala Yona ina tláy, iri goów amór yaamaá Tarshishi, as iwa nahhaati AAKOÓ MUNGÚ wa alé. Ina aweér ay yaamaá Yopa, miringamoó yaamaá Tarshishír káw guri ár. Yona peésa gari buú', iri tsa/án baraá miringamoó i alé, as tiwa kona' nee inooín ay yaamaá Tarshishi, as iwa nahhaati dír AAKOÓ MUNGÚ wa alé.

⁴ Ala AAKOÓ MUNGÚ fur'ár ur gari ya/aáw baraá tláwtí ale, bambaaór ur iri hardát baraá tláwtí ale, miringamo guri lak geeqeér.

⁵ Ala mukdá' baraá miringamoó wa gadiyuús iri da'ayuút, umuú heewo munguúwós guri firín. Huuwadaá baraá miringamoó i diriiá' kiri kwakwaáhh baraá tlawi as miringamo iwa inslaahhuy. Qoomaadae Yona aa aweér baraá guruú baraay oo miringamo, iri baraadií qaát, gu'ute guri ót.

⁶ Ala geeraharusmoó miringamoodá' Yona guri i daqáy, guri báy, «Kuúng mas gú'? Daarkiitáng, Munguúwók firiimeek, doóqa Munguúwók atén ti gurtláy as mawa qwaaraán.»

⁷ Mukdá' baraá miringamoó wa gadiyuús tari kilooín axweés, tay káh, «Gimsé', tsawdo a tleehhaán as heewí slahh'amaayeerí tisa sleér nguwa slawaan.» Tsawdo kari tleéhh, ala naxés tsawdo Yona guri sleér.

⁸ Yona kuri báy, «Kuúng maga tlakwés? Na'ás kangwsíng ooang, oo muruuwí tlákw tisa sláy as kuúng. Gadiyér kuúng ta tlehh a milá? Kuúng amór ta dahh a amá? Yaamuuwók a yaamu gaalá? Kuúng oo xooro gaalá?»

⁹ Yona giri báy, «Aníng a heé xoorór Ebrania. Aníng AAKOÓ MUNGÚ ugwa haratlintií'. Munguúduú gawaá doori, kudá' tlawi nee yaamaá kaahaar gaa tleehh.»

¹⁰ Naagáy mukdaádá' iri ló'wa da'ayuút, kuri báy, «Gaarí kuúng taa tléhh a milá?» Asma mukdaádá' ga xuu' adór inós ira goów as iwa nahhaati dír AAKOÓ MUNGÚ wa alé, asma inós inooín gaa xu'tís geerií alé.

¹¹ Ala inooín kuri báy, «Adór u /iisaan a idoomá as tlawi iwa xaslit.» Asma tlawi aa ak lexwaandút ló'wa alé.

¹² Inós giri báy, «Aníng na oohare', kwahhaaré' baraá tlawi, as tlawi iwa xaslit, asma aníng a xuú' adór bambaaorí nusa sleér tar aníng.»

¹³ Mukdá' miringamoó madiít miringamo kuri maár as kuwa ki/isi afaá tláwtí ale, ala kway harslaaqaát, asma tlawi iwa ló'wa leexút.

¹⁴ AAKOÓ MUNGÚ kuri i /aa/amín kuri báy, «AAKOÓ MUNGÚ, atén kuúng u firiimaán. Aá AÁKO, atén miti qwaareesaar as slafíngw heewí kuwa qwaareesaán, laqaá miti li/áy buaar as heé tlakweés wásl kuwa qwaareesaán. Asma kuúng AAKOÓ MUNGÚ, adoorí ana tléhh ar adoodá' kuúng ta sla'.»

¹⁵ Naagáy Yona kuri óh, kuri kwaáhh baraá tláwtí alé, nee tlawi iri tsék.

¹⁶ Ala mukdaádá' AAKOÓ MUNGÚ kuri ló'wa da'ayuút, ilahhooár muruú ta tsu/i kari haniís. Nee kway al'axweesantí tseék.

¹⁷ AAKOÓ MUNGÚ siyoó yangaariír guna amohhe'eés, as Yona nguwa gu/i. Yona iri baraá guruú siyoódá' wa hoót deelo tám, xweera nee tlaatla/aangw.