Yohana 8 - Biblía Axweesantá Hhohho' ar Mungú 2004

¹ Ala Yesu iri tláy amór tloomarka ta babay seituúni.

² Looaytleérós matlaatlér boo/e Yesu iri malé kií/ baraá Doó Mungú. Múk yaariír guri i daqáy. Yesu iri iwiít, giri iimu/ún intsaahhatimisuuwo.

³ Intsaahhatuusér hara'ayár Mose nee múk Farisayo /ameenirka kari huúw dír Yesu, ar tinda óh baraá fuqtá wa ale. Kari tla/ángw i qaás.

⁴ Yesu kuri báy, «Intsaahhatusámo, /ameenirí ngaa baraá fuqtá wa oohaán.

⁵ Baraá hara'ayaro Mose ina oó', /ameenár adór tí, gár kas hariím a tlaqut ar tlaa/e. Ala kuúng ma kát?»

⁶ Yesu kuna adoorí báy as kuwa iiari, as /aymuú Yesu kur sakwasleemuuti kuwa slay. Yesu iri yaamií xupuú', iri yaamií gooín ar diitsarós.

⁷ Ala mukdá' iwa ak buúhh yaahamisuuwo, Yesu iri amor'ín i qaytsiít, giri báy, «Heé baraá tla/angwhunge tlakweemaá koomaaká, /ameenirí ngi geerií tsaxaari ar tlaa/ano.»

⁸ Yesu iri malé xupuú', iri yaamií gooín ar diitsarós.

⁹ Qoomár inooín /aymi'iidá' Yesu aa oó' kiwa axaás, muner'ín giri sakwasleemút. Tiri wakeetiné' ti'inango, bariise ina giiriín, sleémeero tay faakiís. Yesu kuna kilós geexáy, nee /ameenidá' i dír geeraawós wa sihhmít.

¹⁰ Yesu iri qaytsiít, /ameenidá' gari báy, «Aáyo, mukdá' i amá? Heé kiíng iga sakwasleemuut i káhhi?»

¹¹ /Ameenidá' iri ó', «Aáko, i kaahh.» Yesu gari báy, «Tam aníng sleeme kiíng i sakwasleemuutaaká. Kiíng tláw, ala tlakweema mi malé tleehhaar.»]

Yesu a gwa/aateemaá yaamu

¹² Yesu inooín giri malé báy, «Aníng a gwa/aateemaá yaamu. Heé aníng iga eehaar, i baloó baraá giwtír wa hi'iimitiiká, ala inós gwa/aateemaá slafiingw gi kón.»

¹³ Múk Farisayo iri oó', «Kuúng tin kilók lamabu'uún. Lamabu'uungók oo loeeká.»

¹⁴ Yesu giri báy, «Aníng tam ti kilooeé' lamabu'uuma, lamabu'ungw'eé' oo ló', asma aníng amór ni daahh a xuú', nee amór ni kaw sleeme. Ala kuungá' a xua'aaká amór ni daahh laqaá tam amór ni kaw.

¹⁵ Kuungá' hee un sakwasleemutá' ar tlehhemi'iiwós kudá' ta ara'aanda'. Ala aníng hee u sakwasleemuutaaká.

¹⁶ Ala barnaxes án hee un sakwasleemuuta, sakwasleemar'eé' ar ló'. Asma aníng a kilooeeneeká. Ala a aníng dinkwa nee Baabuúdá' iga ya/aaw.

¹⁷ Slám baraá hara'ayarhunge kaa gooín adór lamabu'úngw múk tsár tar lamabu'úngw ló'.

¹⁸ Aníng tin kilooeé' lamabu'uúm, nee Baabuúeé' kudá' aníng iga ya/aaw, i lamabu'ún sleeme.»

¹⁹ Aluuwo múk Farisayo iri oó', «Baabuúwók i amá?» Yesu iri oó', «Án kuungá' i xua'aaká. Tam Baabuúeé' sleeme u xua'aaká. Aníng bar geera iga xué', Baabuúeé' sleeme ugwa xué'.»

²⁰ Yesu axweesanaywí guna axweés qoomár iwa baraá Doó Mungú wa intsaahhatimisi, didá' sandakmoó ilahhooa i dirii'. Ala heé Yesu ooharo gwa qiitl i kaahh, asma qoomaarós aa xeeriiká.

Amór án ni kaw, kuungá' i hardata'aaká

²¹ Yesu giri malé báy, «Aníng a quútl, ala án kuungá' iri leelehhitá', nee kuungá' a qatlá' baraá tlakweemaahúng i alé. Nee amoodá' án ni kaw, kuungá' hardahamu ngu aleesleera'aaká.»

²² Aluuwo múk Yahudi iri oó', «Ahaá, tin kilós gaási, as adoodá' iwa kaahi, ‹Aníng a quútl, nee kuungá' hardahamuú amor'eé' u aleesleera'aaká.› »

²³ Yesu iri oó', «Kuungá' awa baraay, aníng oo gawa. Kuungá' awa yaamuuká', aníng oo yaamuukaeeká.

²⁴ Gaarí an gár kuungá' án nusa báw, ‹Kuungá' a qatlá' baraá tlakweemaahúng. Asma kuungá' barnaxes aníng iga haratlinti'ii'iiká adór aníng tar kudá', daqaní kuungá' aqo qatlá' baraá tlakweemaahúng.› »

²⁵ Múk Yahudi inós kuri báy, «Kuúng a heemá?» Yesu iri oó', «Ahaá baré nuna qaroó geerií ádbáw, gár ni malé oo' a milá?

²⁶ Aníng axweesanoó yaariír u koóm, nee sakwasleemár yaariir ngiwa kah daandeemoohunge. Kudá' aníng iga ya/aaw, inós a looeema. Nee aníng tidá' naa axaás dirós wa ale, an tí ni kah dír múk i alé.»

²⁷ Ala inooín kaa tsaahhiiká adór kángw Baabá ngur káh.

²⁸ Yesu iri oó', «Qoomár bar Garmoó Hee tleesár gawto ugwa hhe'esé', daqaní a tsahhá' adór aníng tar kudá'. Nee daqaní a tsahhá' adór án gaa ngir kilooeé' tleehhaaká, ala adoodá' Baabá aníng ira intsaahhatís, an adoodá' ni axwees.

²⁹ Nee kudá' aníng iga ya/aaw, inós i dinkwa nee aníng. Aníng iga kilooeé' geexayká. Asma umuúqo deelooro tidá' inós gu sla'atimis an tlehhiít.»

³⁰ Yesu axweesanaywí nguwa axweés, múk yaariír guri haratlintií'.

Looeema nu gweeriyá'

³¹ Aluuwo Yesu múk Yahudi kudá' gwa haratlintii' guri báy, «Kuungá' bara kumité' axweesante'eé' iialooeemisuuwo, aga eeharuuser'eé' ar ló' tleehhité'.

³² Slám looeema i tsahhá', nee looeemaaká' nuri gweeriyá'.»

³³ Tari oó', «Atén a xwaylár Abrahamu, slám aga lawaalér hee tleehhitaaniiká baloó alé. Kuúng mas kat, ‹Tundu gweer.› »

³⁴ Yesu giri báy, «Án a kah, umuúqo heé tlakweemaá tlehhahhiít, a lawaalmoó tlakweema.

³⁵ Nee lawaalmo deelo sleémeero do' gu hootiiká. Ala na/aay i doó hoot deelo sleémeero.

³⁶ Gawaá adoorihe Garma burna gweér baraá lawaali'iimaro, tunda kángw kilá' wa gweér.

³⁷ Aníng a xuú', kuungá' a xwaylár Abrahamu. Tam adoorihe kuungá' a pa/ángw leelehhitá' oo aníng ir gasa', asma axweesante'eé' baraahunge i káhh.

³⁸ Tidá' án naa ár dír Baabá wa ale, an tidá' ni axwees. Nee tidá' kuungá' taa axasé' dír baabuúhúng wa ale, an tidá' ta tlehhita'.»

³⁹ Tari oó', «Baabuúrén a Abrahamu.» Yesu iri oó', «Kuungá' geera bar na/aá Abrahamu, geera alók gadiyeérós aga tlehhé'.

⁴⁰ Tidá' ló' naa amór Mungú wa axaás, ngin kuungá' babáw, ala tam adoorihe kuungá' i gaasár wa sla'á'. Ala Abrahamu adoosíng gaa tleehhiiká.

⁴¹ Kuungá' gadiyér ta tlehha' ar baabuúhúng.» Tari oó', «Atén a xwaylár tsaatu'uumarooká. Atén Baabá u koomaán, an Mungú.»

⁴² Yesu iri oó', «Mungú geera bar baabuúhúng, án geera kuungá' iga slaé'. Asma án amór ni daahh a amór Mungú. Niri hardáh amoorí alé. Ala naa hardihiiká as sla'aarir'eé', ala án Mungú ina ya/aáw.

⁴³ Ala tí án ni kah mas tsatsahhaanda'aaká? Asma kuungá' axweesante'eé' iiárií qaasaro a aleesleera'aaká.

⁴⁴ Kuungá' amór ta dahha' a amór baabuúhúng, Neetlaangw, nee ilatleerír baabuúhúng an tidá' ta sla'a' tlehhmuuwo. Inós a tsu/utusmo iimír iimu/uungo, tam aa sihhiitiiká baraá looeemá i alé, asma looeema baraawose i kahhiyá'. Bir lamtá axwees, a tós kilós gan axwees, asma inós a lamusmo nee a baabuú lama.

⁴⁵ Ala aníng looeema in káh, an gár án kuungá' is haratlintatia'aaká.

⁴⁶ Heé baraá tla/angwhunge tlakweemaaeé' ngi laqaám a heemá? Nee bar aníng looeema ngi káh, kuungá' mas ya/a/aanda'aaká?

⁴⁷ Heé Mungú axweesantá Mungú gaa iiárií qamín. Ala kuungá' a axamisa'aaká, asma kuungá' a múk Munguheeká.»

Yesu nee Abrahamu

⁴⁸ Múk Yahudi iri oó', «Ahaá, atén ar ló' aga ooániíke, tawa ooaán kuúng a heé Samaria, nee gídaabá a neetlaamér koón.»

⁴⁹ Yesu iri oó', «Aníng a neetlaamér koomaaká. Ala aníng Baabuúeé' un ilaiwawaá/. Ala kuungá' aníng i ilaiwawa/a'aaká.

⁵⁰ Tam adoorihe aníng xirfuueé' u leelehhiitaaká. Ala oo wák i deer oo aníng i xirfií leelehhiít, nee inós an kudá' sakwasleema ga tleéhh.

⁵¹ Án a kah, hee bar axweesante'eé' gaa óh, i baloó gwaaiiká.»

⁵² Múk Yahudi iri oó', «Daxta aga tsaahhaán adór kuúng tar neetlaamér koón. Abrahamu aa gwaá', aaruuse aa qátl, ala kuúng a kat, ‹Hee bar axweesante'eé' gaa óh, i baloó gwaaiiká.›

⁵³ Baabuúrén Abrahamu aa gwaá'. Inós kuúng u bá/a? Nee aaruuse sleeme aa qátl. Kuúng heé tir slaqamiimis a heemá?»

⁵⁴ Yesu inooín giri mu/aywaáts, «Án kilooeé' birti xirfayeemiís, xirfuueé' a gaarooká. Án Baabuúeé' i xirfayeemiis, inós an kudá' kuungá' tawa kata', ‹A Munguúrén.›

⁵⁵ Kuungá' ugwa xui'iiká, ala aníng u xuú'. Barnaxes aga oó' u xuaaká, aníng a lamusmo tleehhiít adór kuungá' wa ale. Ala án u xuú', nee axweesantós aga óh.

⁵⁶ Abrahamu, baabuúhúng, ina baraá/ asma deelor'eé' ngiwa ari. Inós gay ár, iri qwalalaá/.»

⁵⁷ Múk Yahudi iri oó', «Kuúng kureeraá mibeeraá kooán iga eeriiká, kuúng Abrahamu uga qo aándi?»

⁵⁸ Yesu iri oó', «Án a kah, iimír Abrahamu kuwa laqwaliiká, aníng a qaroó daadeer.»

⁵⁹ Inooín tlaa/e kiri sleemiís as kuwa tlaquuti. Ala Yesu iri nahhaát, iri ti'iít baraá Doó Munguhe.