Yohana 7 - Biblía Axweesantá Hhohho' ar Mungú 2004

Yesu nee hhaeewós

¹ Aluudaádae Yesu ina baraá yaamaá Galilayár wa hi'iimiít, asma gaa slaiiká iwa baraá yaamaá Yudeár wa hi'iimiiti, asma múk Yahudi i pa/ángw leelehhiit oo inós kur gaasi.

² Qoomaadae deelór ur ar múk Yahudi, deeloodá' ur ar Isleeri aa naká/.

³ Hhaeewós nguri bayé', «Quútl diirihe, tláw baraá Yudea, as eeharuuseerók tlehhemi'iiwók kudá' ta tlehhahhit, ngiwa ariya'.

⁴ Asma hee barnaxes ti xu'utisár wa slaa', tlehhemi'iiwós gi tleehhiiká ar naaqo. Kuúng bar tlehhemi'iiká' tlehhít, ti laqaan dír múk baraaká' yaamu, kuúngú kilá'.»

⁵ Asma tam hhaeewós awa kilá' ngwa haratlinti'ii'iiká.

⁶ Yesu inooín giri báy, «Qoomar'eé' naa xeeriiká, ala qoomarhúng i deer deelo sleémeerowo.

⁷ Múk aa haratlintii'iiká kuungá' nu aahhiiká, ala aníng iga aáhh. Asma án inooín in ádbabáw adór tlehhemi'ii'ín kir tlákw.

⁸ Kuungá' tsa/amé', deeloorí ur awaak. Aníng deeloorí ur a awaaká hamihe, asma qoomar'eé' aa xeeriiká.»

⁹ Axweesanaywí ooaro nguwa hhe'eés, iri Galilayár i meét.

Yesu deelór ur ar Isleeri ngiwa áy

¹⁰ Alaá hhaeewós niwa tlayé' as tawa deelór úr ay, inós sleeme iri qawti daqáy.

¹¹ Múk Yahudi Yesu kuri leelehhiít baraá deeloodá' ure, tari oó', «Heedaádá' i amá?»

¹² Múk yaariír iri qununuú/ baraá boo/aydae daanduú Yesuwo. Bahh'alé tari oó', «A heé hhoó'.» Bahh'alé ta kaahi, «Aasla'áy, in múk al/agín.»

¹³ Ala heé gwa daanda axwees ar geehhoeema i kaahh, asma ta múk Yahúdír da'ayuumiit.

¹⁴ Qoomár tawa tla/aaohú deelór úr i dirii'i, Yesu iri dáh baraá Doó Mungú, iri intsaahhatimís.

¹⁵ Múk Yahudi tari waa/oo/amín tari oó', «Heewí sagalooár adór tí adór ngira sláy, inós bira soomuusiiká?»

¹⁶ Yesu iri oó', «Intsaahhasar'eé' a te'eeneeká, ala ar kudá' aníng iga ya/aaw.

¹⁷ Hee barnaxes sla'aarír kudá' aníng iga ya/aaw gaa ya/án tleehhamooro, kángw intsaahhastadá' daqaní gu tsaahh, áx amór i dahh a amór Mungúhe, laqaá án kilooeé' an axweés.

¹⁸ Heé sagós ar axweés, xirfuú i leelehhiiti a kós kilós. Ala heé xirfuú heé inós ngwa ya/aaw gu leelehhiít, heedá' a heé ló', nee baraawose al/ayma i káhh.

¹⁹ Ahaá, Mose hara'aya ngaa dirhúng i haniísiíke? Ala baraahunge tam heé wák oo hara'aya gaa boo/ees i kaahh. Ala kuungá' pa/ángw anír gasa' mus leelehhitá'?»

²⁰ Boo/aydá' iri oó', «Ahaá, kuúng a neetlaamér koónda? Ahaá, heé kuúng u gaasár wa slaá' a heemá?»

²¹ Yesu iri oó', «Aníng /aymuú wák oo waa/oo/amo una tleéhh, kuungá' sleémeero tari waa/oo/é'.

²² Mose hara'ayár al/utlo ngina haniís, ala a gídaabaheeká hara'ayaarí in amór Mosé dáhh, ala a amór baabi'i. Nee kuungá' tam bál deelór Sabaátoro hee u al/utlá'.

²³ Ala hee bir harín al/utlooro bál deelór Sabaátoro, as hara'ayár Mose makawa sií', ala án kuungá' adór ir i buhhaabuhha' a adoomá, bar hee una hungu/uús deelór Sabaátoro.

²⁴ Muu mu sakwasleemuutara' ar barqaanti, ala sakwasleema na tlehhitaak ar loohír ganaa'.»

Heewí a Krístówo?

²⁵ Múk Yerusalemu bahh'alé tari oó', «Ahaá, heewí a kudá' ta leelehhiítiíke, as kuwa gaasár wa slai?

²⁶ U ga/eéraáke, i axwees ar geehhoeema, ala inooín gár ku babay i káhh. Dooqa mukwí urén gaa xuú' adór heewí tar Krísto.

²⁷ Ala heewí atén u xuaán amór i dahhi. Ala Kristo bál bindi hardah, amór i dahhi heé ga xuú' i kaahh.»

²⁸ Yesu iri tseé' ar afór ur baraá Doó Mungú wa ale iwa intsaahhatimisi, iri oó', «Án kuungá' i xuá', nee amoodá' ni daahh a xuá' sleeme. Ala án naa hardihiiká as sla'aarir'eé'. Kudá' aníng iga ya/aaw, inós a looeema, slám kuungá' inós u xua'aaká.

²⁹ Inós aníng u xuú', asma aníng a amoorós daáhh. Nee inós an kudá' aníng iga ya/aaw.»

³⁰ Gawaá adoorihe kuri oohár wa slaá', ala heé gwa oh i kaahh, asma qoomaarós aa xeeriiká.

³¹ Tam adoorihe múk yaariír baraá boo/aydae Yesu guri haratlintií', tari oó', «Ahaá, Krísto bál bindi hardah, layár yaariir ar tír heewí ga baa/ ga tleéhhi?»

Xuumuuse kawa ya/aáw as Yesu nguwa ot

³² Múk Farisayo boo/aay guri axaás adór ira qununuú/ daanduuwose. Inooín nee kaahamuusér uren ar Mungú askaári kari ya/aáw as Yesu kuwa oohi.

³³ Yesu iri oó', «Har qoomár niinawe án nee kuungá' a dinkwa. Aluuwo aníng a tláw amór kudaádá' aníng iga ya/aaw.

³⁴ Aníng kuungá' i leelehhá', ala i sleera'aaká, slám aníng didaádá' ni dirii', kuungá' hardahamu u aleesleera'aaká.»

³⁵ Múk Yahudi tiri kilooín yaahamiís, «Heewí amór i kay a amá, diirí atén kuwa araanaaká a diimá? Amór i kay a amór múk Yahudi kudá' aa diyaa/áti amór xoordaá hatlá', nee giri intsaahhatimísi?

³⁶ /Aymuuwí i kaahi gídaabárós a milá? Kwí iwa kaahi, ‹Aníng kuungá' i leelehhá', ala i sleera'aaká, slám aníng didaádá' ni dirii', kuungá' hardahamu u aleesleera'aaká.› »

Ya'aá ma'aá slafíngw koomá'

³⁷ Baalaadár alhhe'eesaay an deeloodá' ak ur. Baalaadae Yesu ina sihhiít iri tseé' ar afór ur iri oó', «Hee bira waxiít, ni amor'eé' hardihi, as iwa wahi.

³⁸ Asma Gooi i kat, ‹Heé aníng iga haratlintii', ya'aá ma'aá slafíngw koomá' i baraawós wa ti'iitiyá'.› »

³⁹ Yesu axweesanaywí guna axweés daanduú Qeeruú hhoohhoó' oo Mungú, kudá' ta haniisi dír mukdá' sleémeero inós gwa haratlintii'. Qeeru naa hardihiiká qoomaadae, asma qoomaadae Yesu kwaa xirfayeesiiká.

Muu tina partliít daanduú Yesuwo

⁴⁰ Muu bahh'alé baraá boo/aydae /aymi'iiká' kiwa axaás, tari oó', «Ar ló', heewí a aarusmoodá'.»

⁴¹ Bahh'alé tari oó', «Heewí a Kristo.» Ala bahh'alé tari oó' sleeme, «Ahaá, Kristo i Galiláyár dáhhi?

⁴² Gooi baré i kat, Kristo i ti'iit baraá xwaylár Daudí wa ale, nee amór ni dahhi a baraá Betilehemu, gixsadá' Daudi iwa hoót.»

⁴³ Gawaá adoorihe boo/aydá' tiri partliít as daanduú Yesuwo.

⁴⁴ Bahh'alé baraá boo/aydae Yesu kuri oohár wa slaá', ala heé gwa oh i kaahh.

Geeraharuusér múk Yahudi i haratlintaaór koondaaká

⁴⁵ Askaáridá' taa ya/aáw, iri kí/ amór kaahamuusér uren ar Mungú nee múk Farisayo. Inooín tari oó', «Ahaá, gaálay ngwa ote'?»

⁴⁶ Askaáridá' iri ó', «Heé aa adór heedaádár axwees i kaahh tam looár wake.»

⁴⁷ Múk Farisayo iri oó', «Kuungá' sleeme tunda al/áyi?

⁴⁸ Baraá múk urén nee múk Farisayowo heé gwa haratlintii' a heemá?

⁴⁹ Ala boo/aywí hara'aya ga xuaaká, kwa qaroó lu'ús.»

⁵⁰ Aluuwo Nikodemudá' aáng Yesu gwaa i daqáy xweeraawo a heé wák di'ine. Inós giri yaahaás,

⁵¹ «Ahaá, hara'ayarén hee gu sakwasleemúta, barnaxes axweesantós kaa axaasiiká geerií alé, nee barnaxes kaa xuiiká tidá' aa tleéhh?»

⁵² Inooín tari oó', «Kuúng sleeme kár amór ni dahh a Galiláyáro? Áx leelehheek baraá Gooiro aarusmoó Galiláyár wa ti'iít i deéro?» [

/Ameenír tinda baraá fuqtá wa óh

⁵³ Umuú heewo iri waátl amór do'ós.