Yohana 6 - Biblía Axweesantá Hhohho' ar Mungú 2004

Yesu múk kume kooán nguwa /aymiís

¹ Aluuwo Yesu iri tláy, iri waaraáhh amór gayuú tlawtá Galilaya, tida sleeme ta babay tlawtá Tiberia.

² Boo/oó úr oo muu Yesu gway eehár, asma layuudá' Yesu aa dír tiqtuuseérií tleéhh.

³ Yesu iri tsa/án gawaá tloomár i alé, nee eeharuuseerós tari dinkwár i iwiít.

⁴ Ala Pasaáka, deelór ur ar múk Yahudi, naa tseewuúr.

⁵ Yesu iri qaytsiít, boo/oó úr oo muu guna ár, oo inós gwa eehar. Yesu Filipo guri bay, «Mikaátér mukwí i /ayi, dír kawa tlaxwaan a diimá?»

⁶ Adoorí gana oó' as nguwa iiari, ala inós gár i tleehhamór wa slai ga xuu'.

⁷ Filipo guri báy, «Mikaátér shiliíngi tsiire tsár sleeme i bu'utaká, tam ka dir'ín i niinaweemisi.»

⁸ Eeharusmoowós oo hatlá' oo ta bay, Andrea, hhiyoó Simon Petro, iri oó',

⁹ «Garmaako niiná diirihe i deer. Inós mikaátér kooán ga kón, ar taa tleéhh ar puuruú shayiíri, nee siyoó tsár. Ala tí gár i bu' a milá dír múk yaariír kwihe?»

¹⁰ Yesu iri oó', «Muu i yaamií iwiiti.» Didaádae gitsór yaariir i deer. Muu iri iwiít, hhawaate kilooín a kume kooán.

¹¹ Aluuwo Yesu mikaáteedá' gari óh, Mungú guri sluufiís, gari qasmiís dír mukdá' aa iwiit. Tam siyó sleeme aqo guna adoodá' laáq, ar qoomoó inooín taa slai.

¹² Tam qoomár tawa aáx, Yesu eeharuuseerós gari báy, «Parhheemoodá' naa meetiye' burumburaak, tam parhhamtá wák miwa qwát.»

¹³ Parhheemaá naa meetiye' kiri burumbuúr, kudá' mukdá' aa /ayin aa meetiís gawaá mikaátér kooán wa ale ar puuruú shayiíri, katatoó mibaá nee tsár nguri hatsiisiyé'.

¹⁴ Nee muu waa/oo/amoodá' Yesu aa tleéhh ngiwa ár, tari oó', «Aarusmoodá' ni baraá yaamií hardáh a kwí tsuwá alé.»

¹⁵ Yesu adór inooín kur oohár wa slaá' ar /uuru gari tsaáhh, as kuwa waawutmooín wa qaasi. Inós adoodá' ngiwa tsaáhh, tina paraátl dir'ine, iri tsa/án gawaá tlooma malé alé, inós kilós.

Yesu iwa gawaá daanduú tlawtá wa hi'iimiít

¹⁶ Tsiindo niwa xayé', eeharuuseerós iri awét ay afaá tlawi.

¹⁷ Tari tsa/án gawaá miringamo, as tawa waaraahhi ay Kapernaumu. Nee qoomaadae iimi aa gíp, slám Yesu aa dir'íní hardihiiká.

¹⁸ Tlawi iri leexwandút, asma fur'ár yaariir i deer.

¹⁹ Tawa geerií kumiít har qoomoó kilomiíta kooán laqaá lahhoó', Yesu kuri ár, naxés i hi'iimiit gawaá tlawtá wa ale, dír miringamoodá' gaa haranakaá/. Tari da'ayuút.

²⁰ Ala Yesu iri oó', «Hee a aníng. Ma da'ayumitaara'.»

²¹ Aluuwo kuri slaá' iwa baraá miringamoó i tsa/án. Nee siiwadár kilae miringamoó aáng iri hardáh afaá tsee/a amoodá' ta kay.

Múk Yésú leelehhiít

²² Looaytleérós boo/oó muu iri gayuuqá' wa sihhiít amoodá' eeharuuse i dahh. Inooín ka xuu' adór miringamoó hatlá' ir kaáhh, aqo har kudá' wák. Slám Yesu nee eeharuuseerós taa al dahiiká baraá miringamoodá' i alé, ala eeharuuseerós iwa waaráhh a kilooín.

²³ Ala miringér hatlá' ar Tiberiár daahh niri hardát iisaapoó didá' mikaáte kawa /aáy qoomár Aako iwa sluufiís.

²⁴ Boo/aydá' ngiwa ár adór Yesu ir kaáhh didaádae, tam eeharuuseerós, inooína kilá' tari dáh baraá miringe, tari tláy ay Kapernaumu as Yesu kuwa leelehhiiti.

Yesu a mikaátér slafiingw

²⁵ Kuri amoodá' wa ár kuri báy, «Intsaahhatusámo, xaylá kuúng naa amoorí hardát?»

²⁶ Yesu iri oó', «Án a kah, án kuungá' i leelehhita'aaká as layaadá' taa aandé', ala gár is leelehhita' a mikaáteedá' taa /agé', tay axé'.

²⁷ Muruú /aymaadá' hhitiruút mu sagadiyuusara', ala kudá' hotaatiím oo slafíngw alhhe'eesay wásl ngu huúw na sagadiyuusaak. Muruú /aymaarí Garmoó Hee ngu kuungá' i haniis. Asma Mungú Baabá inós gwa ya/án, guri aleesleemuuwós i haniís.»

²⁸ Tari oó', «Adór ta laqaan a adoomá, as gadiyér Mungú kawa tleehhaan?»

²⁹ Yesu iri oó', «Gadiyér Mungú a tí, ‹Kudá' inós naa ya/aáw, haratlintiaak.› »

³⁰ Tari oó', «Layár kuúng ta tlehh a gaalá? Atén i laqaamang, as atén kawa araan, nee kuúng uri haratlintiaán. Gadiyér kuúng ta tlehh a milá?

³¹ Baabi'iirén maána ngina /ayiyé', baraá xaanxáy wa ale, adoodá' kara gooín, ‹Mikaátér dooraá daahh gana haniís as ngiwa /ayiya'.› »

³² Yesu iri oó', «Án a kah, Mose mikaátér dooraá daahh ngaa haniisiiká, ala a Baabuúeé' mikaátér ló' ar dooraá daahh, ngin hanimiis dirhúng i alé.

³³ Asma mikaátér Mungú a tidá' awdiit gawaá doorí wa ale, nee muu guri slafíngw i hanís.»

³⁴ Tari oó', «Aáko, mikaáteesíng umuúqo deelooro hanimiisang.»

³⁵ Yesu iri oó', «Aníng an mikaátér slafíngw huwaahuuw dír heewo. Heé amor'eé' hardáh, i baloó qwariitiiká. Slám heé aníng iga haratlintii', i baloó waxiitiiká sleeme.

³⁶ Ala án kuungá' nuna qaroó báw, án kuungá' iga aandé', ala i haratlintatia'aaká.

³⁷ Kudá' sleémeero Baabá naa aníng i haniís, i amor'eé' hardihiyá'. Slám umuúqo heewo oo amor'eé' hardáh, u baloó tsee/aá i kwahhaaká.

³⁸ Asma aníng naa gawaá doorí wa aweeriiká tidá' ni slaa' ngiwa tleehh, ala a sla'aarír kudá' aníng iga ya/aaw ngiwa tleehh.

³⁹ Kudá' aníng iga ya/aaw gár i slai a tí, ‹Aníng tam heé wák muwa qwaareés baraá kudá' sleémeero naa aníng i haniisi, ala masók un waaslee/atís bál deelór alhhe'eesaywo.›

⁴⁰ Asma Baabuúeé' gár i slai a tí, ‹Umuúqo heewo oo Garma gwa i qaytsiit, nee guri haratlintií', masók slafíngw alhhe'eesay wásl gu kón. Nee aníng nguri waaslee/atís bál deelór alhhe'eesaywo.› »

⁴¹ Aluuwo múk Yahudi iri qununuú/, tari oó', «Ahaá, mis kaahi, ‹Aníng a mikaáteedá' naa gawaá doorí wa awet.› »

⁴² Tari oó', «Ahaá, inós a Yesúwoóke, garmoó Yosefu. Slám baabuúwós nee aayoorós a kudá' ni xuaánaáke? Ahaá, mis kaahi, ‹Aníng nina gawaá doorí wa aweér.› »

⁴³ Yesu iri oó', «Ma kiloohúng qununu/aara'.

⁴⁴ Heé hardahamuú amor'eé' gu aleesláw i kaahh, barnaxes kunga uuruuxiiká nee Baabuúdá' aníng iga ya/aaw. Nee aníng heedaádá' nguri waasle/atís bál deelór alhhe'eesaywo.

⁴⁵ Kaa gooín baraá gooír aaruuseero tawa kaahi, ‹Muu sleémeero ku intsaahhatis nee Mungú.› Gawaá adoorihe, umuúqo heewo oo Baabá gwa axaas, nee gari dirós wa intsaatsaáhh, i amor'eé' hardah.

⁴⁶ A kaahaaká heé Baabá gwaa ar i deer. Ala heé Baabá gwa ar, a kudá' amór Mungú daáhh. Kwí an kudá' Baabá ngwa ar.

⁴⁷ Án a kah, heé aníng iga haratlintii', slafíngw alhhe'eesay wásl gu kón.

⁴⁸ Aníng a mikaátér slafíngw huwaahuuw dír heewo.

⁴⁹ Baabi'iihúng maána kana /aáy baraá xaanxáy wa ale, ala qatlo kaa mayká.

⁵⁰ Ala tí an mikaáteedá' naa gawaá doorí wa awet. Hee bar ngaa /aáy i baloó gwaiiká.

⁵¹ Aníng an mikaáteedá' slafíngw koom, tidá' naa awet gawaá doorí wa ale. Hee bar mikaáteerí ngaa /aáy, i slafaafín ay alhhe'eesay wasle. Nee mikaáteerí án ni haniis a slaqwte'eé' ar kilá', as muu slafiingw nguwa slay.»

⁵² Múk Yahudi tari kilooín kaangaanuús tari oó', «Ahaá, heewí adór slaqwtós ngir atén i haniisi a adoomá kawa /ayaan?»

⁵³ Yesu iri oó', «Án a kah, kuungá' barnaxes slaqwtá Garmoó Hee aga /agi'iiká, nee tseereerós aga wati'iiká, slafiingw i kaahh baraahunge.

⁵⁴ Heé slaqwte'eé' ga /aáy, nee oo tseerer'eé' ga wáh, slafíngw alhhe'eesay wásl gu kón. Nee án u waasle/atís bál deelór alhhe'eesaywo.

⁵⁵ Asma slaqwte'eé' a mikaáteedár ló', nee tseerer'eé' a wahtadár ló'.

⁵⁶ Heé slaqwte'eé' ga /aáy, nee heé tseerer'eé' ga wáh, inós i baraaeé' wa hoot, nee aníng a baraawós wa hoót.

⁵⁷ Asma adoodá' Baabuúeé' kudá' slaáf aníng ira ya/aáw, nee aníng a slaáf as Baabá, gawaá adoorihe heé aníng iga /aay i slaaf sleeme as aníng.

⁵⁸ Tí an mikaáteedá' naa gawaá doorí wa awet. Mikaáteerí nee tidá' baabi'iihúng naa /ayiyé' a wakeeká. Asma inooín tam mikaáteedá' kaa /ayi, ala qatlo kaa mayká. Ala heé mikaáteerí ga /aáy i slaaf ay alhhe'eesay wasle.»

⁵⁹ Yesu axweesanaywí guna baraá doó saalíngw wa intsaahhatimís, qoomár iwa baraá Kapernaumúr i dirii'i.

Axweesantá slafíngw alhhe'eesay wásl

⁶⁰ Múk yaariír baraá tla/ángw eeharuusér Yesuwo axweesanaydá' kuwa axaás, tari oó', «/Aymuuwí ku gawít, heé ya/aamaro gu aleesláw a heemá?»

⁶¹ Yesu baraá muunaáwose adór eeharuuse /aymuudá' ngur qununú/, gari tsáhh iri oó', «/Aymuuwí i dukutsumo tleehhimíti dirhunge?

⁶² Ala a adoomá bál Garmoó Hee bura aandé', bir tsa/a/án amoodá' geera i dahhi?

⁶³ Qeeru an kudá' slafíngw hanmiís, slaqwa gár i bu' i káhh. /Aymi'iiká' naa kuungá' i oó' a qeeru, slám a slafiingw.

⁶⁴ Ala baraá tla/angwhunge muu i deer oo aa haratlinti'iiká.» Asma Yesu mukdá' gwa haratlinti'iiká gu qaroó geerií xuu', tam heedaádá' gu sakií/ sleeme.

⁶⁵ Yesu iri oó', «Gawaá adoorihe gaarí an gár án kuungá' nusa báw, ‹Hee i kaahh oo hardahamuú amor'eé' gu aleesláw burkwa aleesleemuú i haniisiiká nee Baabuúeé'.› »

⁶⁶ Iimír qoomaadae múk yaariír baraá eeharuuseerose iri alií kií/, Yesu kwa sangw eehariiká.

⁶⁷ Gawaá adoorihe Yesu eeharuuseerós tidá' mibaá nee tsár gari báy, «Xáy, kuungá' sleeme aníng i geexeemuú wa sla'á'a?»

⁶⁸ Simon Petro Yesu guri báy, «Aáko, amór ta kawaan a amór heemá? Asma kuúng axweesantá slafíngw alhhe'eesay wásl a koón.

⁶⁹ Atén aga haratlintiaán, slám aga xuaán adór kuúng tar Kudá' hhoohhoó' oo Mungú.»

⁷⁰ Yesu iri oó', «Ahaá, án kuungaásingá' mibaá nee tsár naa tsawaáriíke? Ala oo wák baraahunge a neetlaangw.»

⁷¹ Gawaá axweesantihe daanduú Yuda guna axweés, garmoó Simon Iskarioti, asma inós an kudá' gu sakií/, nee inós an heé wák baraá eeharuuseedá' mibaá nee tsare.