Yohana 5 - Biblía Axweesantá Hhohho' ar Mungú 2004

Tiqtuusér dír tlahhsár Betesda

¹ Aluudae deelór ur ar múk Yahudi nay hardát. Yesu sleeme iri tsa/án ay Yerusalemu.

² Nee amoodár Yerusalemuro dír afkuko ta babay afkú Bee/aangw, tlahhsár ma'aay i deer. Tsifrír múk Ebraniaro a Betesda. Nee dír tlahhsaadae isleeraá kooán i dayá'.

³ Baraá isleeridae boo/oó yaariír oo tiqtuuse aa qaqataatín, nee taampu, taqooraay nee múk aa sol'omiit, [ta ma'aá daamaarán iwa dahhiya'.

⁴ Asma siiwarkaaro malaykamoó Aako nin awdaadiit, iri baraá tlahhsadá' i dah, ma'aydá' giri xwaraanxwaar. Nee heé aa giirin baraá ma'aydá' i /etaango, tiqtirós tidá' i kon in hungú/.]

⁵ Nee didaádae heeko i deer, oo tiqaaqiím kureeri mibeeri tám nee dakaát.

⁶ Qoomár Yesu heewí nguwa ár aa qaát gawaá hhaftuuwós, guri tsaáhh adór tar heé aa tiqaaqin deelór yaariire, guri báy, «A slá'a tawa hungu/?»

⁷ Tiqtusmoodá' iri oó', «Aáko, aníng hee u koomaaká oo i /aytiís baraá tlahhasaár i aleeró, qoomár ma'aay birka xwaraanxwaár. Ala qoomár án bar adoorí wa mak /eét, heé hatlá' in geeraaeé' wa /eet.»

⁸ Yesu iri oó', «Sihhiít, hhaftuuwók gagaareek, tláw.»

⁹ Hamtidár kilae heedaádá' iri hunguú/, hhaftuuwós guri gagaár, iri tláy. Nee baalaadá' a deelór Sabaáto.

¹⁰ Múk Yahudi heedá' taa hungu/uús kuri báy, «Laarí a deelór Sabaáto, i hariindaaká kuúng tawa hhaftuú gagariin.»

¹¹ Ala heedaádá' taa hungu/uús giri báy, «Heedá' aníng iga hungu/uus, aníng ina báy, ‹Hhaftuuwók gagaareek, tláw.› »

¹² Kuri yaahaás, «Heesíng kuúng ugwa bay, ‹Hhaftuuwók gagaareek, tláw,› a heemá?»

¹³ Ala heedaádá' inós gwa hungu/uus umuuwós gu xuiiká'. Asma Yesu qoomaadae taa paraátl, asma didaádae muu qoomaadae ku úr.

¹⁴ Aluudae heedaádá' taa hungu/uús kuri harasliqiít nee Yesu baraá Doó Mungú. Yesu iri oó', «Qaytsiít, kuúng hamí aga hungú/. Tlakweema mi malé tleehhaar, as gár tlaakw ar adór tidá' ba/a muwa sleér.»

¹⁵ Heedaádá' iri tláy, múk Yahudi guri xu'utisár áy iwa kaahi, «Heedaádá' aníng iga hungu/uus a Yesu.»

¹⁶ Gawaá adoorihe múk Yahudi Yesu kuri iimu/ún slahh'eemisuuwo, asma adoodá' aa tleéhh bál deelór Sabaátoro.

¹⁷ Ala Yesu inooín giri báy, «Baabuúeé' i gadiyuus tam hamí, nee aníng sleeme an gadiyuús.»

¹⁸ Gawaá adoorihe múk Yahudi loohi kari ak leelehhiít ar Yesu kur gaasi. As gídaabaheeká hara'ayaadá' kilós ar deelór Sabaáto gana sií', ala sleeme as adoodá' Mungú nguwa Baabuúwós ar ateetin, asma adoorihe tin Mungúr qoomeemees.

Aleesleemuú Garma i kon

¹⁹ Yesu iri oó', «Án a kah, Garma gár tleehharo kilós i aleeslay i káhh, aqo har tidá' Baabá i tlehhiiti gan tleehh. Asma tidá' sleémeero Baabá i tlehhiiti an tidá' Garma i tlehhiiti.

²⁰ Baabá Garma gu slaa'. Nee tidá' sleémeero inósuú kilá' i tlehhiiti gan laqaaqán. Tam gadiyér ak ur tidá' ba/a gan laqán, as kuungá' tawa waa/o/a'.

²¹ Asma adoodá' Baabá tu'u ngir waaslee/atimisi nee ngir slafimisi, Garma sleeme mukdá' inós aa tsawaár, gun slafimis.

²² Slám Baabá heé i sakwasleemuuti i kaahh. Ala sakwasleema sleémeero gaa Garmií haniís,

²³ as muu sleémeero Garma nguwa ilaiwawa/i, adoodá' Baabá kur ilaiwawa/i. Heé Garma gu ilaiwawa/aaká, tam Baabuúdá' Garma ngwaa ya/aaw gu ilaiwawa/iiká sleeme.

²⁴ «Án a kah, heé axweesante'eé' ga axamiís, nee kudaádá' aníng iga ya/aaw guri haratlintii', slafíngw alhhe'eesay wásl gu kón, slám i dahiiká baraá sakwasleema. Ala ina waaraáhh ar baraá gwa'ara, iri hardáh baraá slafiingw.

²⁵ Án a kah, qooma ni hardát, nee hám naa hardát, ar tu'u afór Garmoó Hee ngiwa axaasiya', nee kudá' afo ngaa axaasiye' tari slaaf.

²⁶ Asma adoodá' Baabá ir slafíngw kon, nee Garma sleeme gwa slafíngw i haniís.

²⁷ Slám aleesleemuú sakwasleema gwa amoorós i haniís asma tawa Garmoó Hee.

²⁸ Axweesanaywí mu waa/oo/amiimara', asma qooma ni hardát ar muu sleémeero, kuduú baraá /aantu, afór Garmoó Hee kawa axaasi.

²⁹ Nee inooín tindiri ti'iit. Mukdá' tlehhema'aá hho' gaa tleehh, kun waasle/atis tari dah baraá slafiingw, ala mukdá' tlehhema'aá tlakw gaa tleehh, kun waasle/atis kuri sakwasleemuut.»

Lamabu'uusér Yesu

³⁰ «Aníng gár ni kilooeé' tleehh i káhh. Aníng an sakwasleemuút ar adoodá' Baabá naa oó'. Nee sakwasleemar'eé' i ganá', asma aníng sla'aarir'eé' a leelehhiitaaká, ala ar Baabá, kudá' aníng iga ya/aaw.

³¹ «Án birti kilooeé' lamabu'uúm, lamabu'ungw'eé' oo loeeká.

³² Heé hatlá' i deer oo aníng i lamabu'uúm. Nee aníng a xuú' adór lamabu'uungós kudá' aníng iwa lamabu'un tar oo ló'.

³³ Kuungá' muu una ya/abé' amór Yohane, nee inós looeema ngiri lamabu'ún.

³⁴ Ala aníng lamabu'úngw muu u ilaohiimaaká. Ala aníng muruuwí ngun dirhúngií káh, as kahhó' kuungá' tawa ba/aanda'.

³⁵ Yohane a tsaa'asi tidá' tsaa'amiis nee ar gwa/aat. Nee kuungá' gwa/aateemaadá' ina slaé', kay sa qwalaala/é' ar har qoomár niina.

³⁶ Ala lamabu'úngw án ni koom ku ak úr ta kuduú Yohanewo. Asma gadiyeédár Baabuúeé' naa haniís ngiwa alhhe'ees. Nee gadiyeédár kilá' án ni tleehh, aníng i lamabu'uún sleeme adór aníng Baabá ira ya/aáw.

³⁷ Slám Baabuúdá' aníng iga ya/aaw, aníng iga lamabu'ún. Kuungá' afoorós ar kilá' qoomár kawa axasé' i káhh, slám slaqsaywós ugwa aandi'iiká.

³⁸ Nee axweesantós i baraahúng wa hotká, asma kuungá' kudá' inós naa ya/aáw u haratlintatia'aaká.

³⁹ Kuungá' tidá' taa gooín baraá Gooiro a mak tsee/ariindá', asma kawa xua', kuungá' slafíngw alhhe'eesay wásl u koondá' baraawose. Nee Gooisíng an tidá' aníng i lamabu'uum.

⁴⁰ Ala kuungá' a sla'a'aaká niwa amor'eé' hardata' as slafiingw kuwa sleera'.

⁴¹ «Aníng xirfuú amór múk daáhh u ilaohiimaaká.

⁴² Ala án kuungá' naa tsaáhh adór sla'aarír Mungú ir káhh baraahunge.

⁴³ Aníng nina hardáh ar umuú Baabuúeé'. Ala án kuungá' i ilaohiinda'aaká. Heé hatlá' bar naa hardáh ar umuuwós, kuungá' heedá' u ilaotá'.

⁴⁴ Kuungá' adór tar haratlintia' a adoomá, kuungaásingá' ti kiloohúng xirfayeemisá'. Nee xirfuudá' amór Mungú kudá' wák daáhh u leelehhita'aaká.

⁴⁵ Ma kaahara' aníng kuungá' nun sakwasleemuút dír Baabahe. Heé kuungá' nu sakwasleemuút i deer. An Mose, kudá' kuungá' taa harahhifé'.

⁴⁶ Asma kuungá' geera Mose bura haratlintié', aníng sleeme geera iga haratlintié'. Asma inós kángw daanduueé' guna gooín.

⁴⁷ Ala bar kuungá' gooirós haratlintaaooro aga sié', kuungá' adór axweesanay'eé' kur haratlintia' a adoomá?»