Yohana 4 - Biblía Axweesantá Hhohho' ar Mungú 2004

Yesu nee /ameenír Samaria

¹ Yesu gay tsaáhh adór múk Farisayo ngira axaás gídaabá, Yesu eeharuusér yaariir gaa sláy ta Yohanewo, nee giri baatimiís.

² (Ala Yesu inósuú kilá' aa baatimiisiiká, eeharuuse ina baatimís).

³ Yesu adoodá' ngiwa tsaáhh, yaamaá Yudea gay geexáy, iri malé tláy ay yaamaá Galilaya.

⁴ Iri waaraáhh ar tla/ángw Samaria asma adór yaamuudá' ooharo ngir may i káhh.

⁵ Iri hardáh dír gixsár Samaria ar ta bay Sikari, bihhaá qaymoodá' Yakobo aa garmaawós Yosefú i haniís.

⁶ Hhalángw Yakobo i didií dirii'. Yesu iwa slaaqaát aaiiwo, iri dír afaá hhalangwdií iwiít. Qoomaadá' a looár lahhoó'.

⁷ /Ameenirkar Samaria niri hhék. Yesu gari báy, «Ma'aá wahaango qawáng.»

⁸ Siiwadae eeharuuseerós aa muruú /aymár tlaxór eér baraá gixsa.

⁹ /Ameenidár Samaria guri beér, «Adór kuúng heé Yahudi ma'aay ngir aní firiin, aníng bar /ameenír Samaria?» (Asma múk Yahudi nee oo Samaria ti haradaafiaaká).

¹⁰ Yesu gari báy, «Kiíng geera bar gurtleemuú Mungú ugwa xú', slám geera heewí kiíng i babáw, ‹Ma'aá wahaango qawáng,› bura xú', geera alók inós ugwa firiín, inós geera ma'aá slafíngw koomá' ngi haniis.»

¹¹ /Ameenidá' guri beér, «Aáko, gár ma'aay kir iihhek a koondaaká, slám hhalaangw ku saáw. Daxta kuúng ma'aá slafíngw koomá' dír kiwa sleer a diimá?

¹² Ahaá, kuúng tu ak úre ta baabuúrén Yakobowo, kudá' hhalaangwí ngwa dirénií haniis, inósuú kilá' ma'aá hhalaangwí gina /aáy, nee na/iiwós nee hikwaawose?»

¹³ Yesu gari báy, «Umuúqo heewo oo ma'ayká' gi wahaám, i malé waxiit.

¹⁴ Ala umuúqo heewo oo ma'ayká' aníng ni haniis gi wáh, i baloó waxiitiiká. Asma ma'aydá' án ni haniis ni kutltá ma'aá slafiingw tleehhitiyá', niri baraawós wa ti'imiitiyá', slafíngw alhhe'eesay wásl nguri huwiyá'.»

¹⁵ /Ameenidá' guri beér, «Aáko, ma'aysíng haniisang, as kahhó' aníng mawa baloó waxiít, tam mawa sangw malé hheék.»

¹⁶ Yesu gari báy, «Tláw, hhawaatuuwók ateetang, ni diirí hardatá' nee inós.»

¹⁷ /Ameenidá' Yesu guri beér, «Hhawaata u koomaaká.» Yesu gari báy, «Adoosíng taa ó' i qoón, tawa kat, ‹Hhawaata u koomaaká.›

¹⁸ Asma hhawaataá iga duxuutiye' a kooán. Nee kwisíng hám ta koon a hhawaatuuwogeeká. Adoosíng taa ó' ar ló'.»

¹⁹ /Ameenidá' guri beér, «Aáko, án kuúng ugwa tsaáhh adór kuúng tar aarusmo.

²⁰ Baabi'iirén Mungú nguna sluufmiisiyé' gawaá tloomarí wa ale, ala kuungá' a kata' Yerusalemu an dír Mungú iwa harin sluufmisuuwo.»

²¹ Yesu gari báy, «Aáyo, tí ni kah haratlintieek, Qooma ni hardát, ar Baabá kuwa sluufmisa'aaká gawaá tloomarí wa ale, laqaá baraá Yerusalemu.

²² Kuungá' oo ta sluufmisa' u xua'aaká. Ala atén Mungú ta sluufmisaan u xuaán. Asma ba/ama amór ni dahh a amór múk Yahudi.

²³ Ala qooma i hardát, nee hám naa hardát, ar mukdá' sluufmiís ló' wa ale, Baabá kuwa sluufmiisi ar qeeru nee looeema, asma Baabá múk adór kwí gu leelehhiit oo gu sluufmiís.

²⁴ Mungú a qeeru, nee mukdá' inós gu sluufmiís, gár kuwa hariím a kun sluufmiis ar baraá qeeru nee looeema.»

²⁵ /Ameenidá' Yesu guri beér, «Aníng a xuú' adór Masihi nir hardáh, kudá' ta bay Kristo. Qoomár inós binda hardáh, mura' sleémeero ngu dirén i alki/iit.»

²⁶ Yesu gari báy, «Anuúwí nee kiíng axweesá' an inós.»

²⁷ Qoomaadár kilae eeharuuseerós niri hardát, naxés nee /ameeni tawa axweesi tari waa/oó/. Ala heé gwa yaahaas i kaahh, iwa ooi, «Ma slá'?» laqaá, «Mas axwesá' nee inós?»

²⁸ Ala /ameenidá' sirwirós gay geexeér, iri tleér baraá gixsa, muu guri beér,

²⁹ «Qwalaasé', heewí artá awaare', oo muruueé' sleémeero naa tleéhh ngwa oo'. Xaysé', heewí a Kristowookáhe?»

³⁰ Muu nay ti'iít baraá gixsár wa ale, kuri i daqáy.

³¹ Qoomár muu iwa hi'iiti, eeharuuseerós guna harhheehhe'eemís guri beér, «Intsaahhatusámo, ala /ayiím.»

³² Yesu giri báy, «Aníng muruú /aymár kuungá' ta xua'aaká u koóm.»

³³ Eeharuuse iri kilooín axwés iwa kat, «Heé gwa muruú /aymár i huuw in deéro?»

³⁴ Yesu giri báy, «Muruú /aymar'eé' a kwí, sla'aarír kudá' aníng iga ya/aaw an tleéhh, as gadiyeérós ngiwa alhhe'ees.

³⁵ Kuungá' a kata'aakáhe, ‹Slahheeri naa meetiyé' a tsiyáhh, daqaní bu'uungw aa xáy.› Ala án a kah, baraá qamu i qaytsitaak, ki aandá' adór nira /awaakuyé', bu'uungo a ido.

³⁶ Heé bu'úngw aa'áw bu'utu gu sláy, balaangw guri burumbuur. Bu'uungwí an mukdá' slafíngw alhhe'eesay wásl gu sláw. Gawaá adoorihe heé aa dahaasin nee oo aa bu'un ta al qwalalaa/.

³⁷ Asma /aymuuwí daqaní a ló', ‹Heeko in dahaasín, kuqá' iri bu'ún.›

³⁸ Aníng nuna ya/aáw kawa bu'uunda' tidá' tasa daawimiti'iiká, bartaka ina daawimít, kuungá' daawitamer'ín aga i daté'.»

³⁹ Baraá gixsadae múk yaariír oo Samaria Yesu guri haratlintií', asma axweesantadá' /ameenidá' iwa ó', «Muruú aníng naa tleéhh sleémeero inós nguna oó'.»

⁴⁰ Mukduú Samaria iri daqáy amór Yesu, kuri harhheehhe'eés iwa ayaaíní deeli. Inós iri amoodií tlaatla/iít deelo tsare.

⁴¹ Múk yaariír iri doogín oo gwa haratlintii' asma axweesantós.

⁴² /Ameenidá' kari báy, «Daxta aga haratlintiaán as axweesantók kiloseeká, asma ataá kilá' aga axaasaán, slám aga xuaán adór kwí tar ba/amusmoó muu.»

Yesu garmoó geeraharusmooko nguwa hungu/uús

⁴³ Alaá deeloodá' tsare iri tláy didae ay Galilaya.

⁴⁴ Asma Yesu inósuú kilá' gana lamabu'ún adór aarusmo kur ilaiwawa/iiká baraá ayaawósuú kilae.

⁴⁵ Yesu iwa Galiláyár i hardáh, múk Galilaya guri ilaóh asma tlehhemi'iiwós sleémeero, kudá' aa tleéhh Yerusalemuwo kaa ár, qoomár deelór ure. Asma mukwí sleeme i baraadií dirii' bál deelór ure.

⁴⁶ Naagáy iri hardáh malé alé baraá gixsár Kanár Galilaya, didaádá' ma'aay ngiwa difaái tleéhh. Nee geeraharusmooko i deer oo na/aywós amór Kapernaumúr wa tiíq.

⁴⁷ Heewí ngiwa axaás adór Yesu nira amór yaamaá Galilayár i hardáh i yaamaá Yahudeár daahh, guri i daqáy, guri harhheehhe'eés tiwa kona', as na/aywós nguwa hungu/uusi, asma i afkú bohoóngwí dirii'.

⁴⁸ Aluuwo Yesu iri oó', «Bar laya nee waa/oo/amo aga aandi'iiká a haratlintia'aakáhe ló'wa ale?»

⁴⁹ Geeraharusmoodá' iri oó', «Aáko, qwaláng dír na/ay'eé' ira gwaaiiká.»

⁵⁰ Yesu iri oó', «Tláw, na/aywók i slaaf.» Heedaádá' axweesantadá' kwaa báy nee Yesu, gari haratlintií', iri tláy.

⁵¹ Qoomár iwa laweei, lawaaleerós guri al'eér, kuri báy, «Na/aywók i slaaf.»

⁵² Qoomár iwa hunguú/ gari yaahaás. Inooín kuri báy, «/Isá' looár faanqwe ga/atani guna geemeér.»

⁵³ Baabá gari tsaáhh adór tar siiwadaádár kilá' inós kuwa báy nee Yesu, «Na/aywók i slaaf.» Inós nee múk do'ose Yesu kuri haratlintií'.

⁵⁴ Gaarí a layár tsár ar Yesu aa tleéhh qoomár iwa yaamaá Yudeár dahhi, iwa Galilayár i hardáh.