Yohana 3 - Biblía Axweesantá Hhohho' ar Mungú 2004

Yesu nee Nikodemu

¹ Heeko wák i deer oo Farisayo, umuuwós a Nikodemu. A geeraharusmoó múk Yahudi.

² Heewí ina amór Yésú káy xweeraá ale, guri báy, «Intsaahhatusámo, a xuaán adór kuúng tar intsaahhatusmoó amór Mungú daáhh, asma heé muruuwí xuawaslén kuúng ta tlehhahhit gu aleesláw i kaahh, aqo har heé nee Mungú dinkwa.»

³ Yesu guri mu/aywaáts guri báy, «Ar ló' án a kah, hee burkwa sagaáwa tsár wa laqwaaliiká, waawuti'iimár Mungú ga ariiká.»

⁴ Nikodemu iri oó', «Adór hee kur malé laqwaali a adoomá, bira heé úr tleehhiít. Adór ir guruú aayí ki/i as kunguwa sagaáwa tsár wa laqwaali?»

⁵ Yesu iri oó', «Ar ló' án a kah, hee burkwa laqwaaliiká ar ma'aay nee Qeeruú Mungú, dahmuú baraá waawuti'iimár Mungú gu aslayká.

⁶ Umuúqo gár taa laqwaál ar slaqwa aqo slaqwa, nee umuúqo gár taa laqwaál ar Qeeru aqo qeeru.

⁷ Tí ugwa báw ma waa/oo/amiimaar, niwa kah, ‹Gár tuwa hariím a tun sagaáwa tsár wa laqwaal.›

⁸ Fur'a i fukuukú' amoodií keer. Afoorós an axamís, ala a xu'uká amór i dahh, laqaá amór i keer. Heé taa laqwaál ar Qeeru, kangós an adoorí.»

⁹ Nikodemu iri oó', «Adór kaangwí ir tleehharuuti a adoomá?»

¹⁰ Yesu guri báy, «Kuúng a intsaahhatusmoó múk Israeli. Ay hamí kaangwí u xu'ukáhe?

¹¹ Ar ló' án a kah, tidá' ta xuaan an kaahaán, nee tidá' taa araán an lamabu'uumaán, ala lamabu'ungwrén kuungá' u ya/a/aanda'aaká.

¹² Barnaxes kángw baraá yaamu ngwa oó', kuungá' a ya/a/aanda'aaká, ala adór kángw gawaá doori kur ya/aanda' tam ngu ooa.

¹³ Slám heé aa gawaá doorí tsa/an i kaahh, aqo har Garmoó Hee kudá' naa gawaá doorí wa aweer.

¹⁴ «Adoodá' Mose dayshamo ngura gáwtí tleés baraá xaanxáy wa ale, tam Garmoó Hee gár kuwa hariím kun adoodár gáwtí tlees.

¹⁵ As kahhó' umuúqo heewo oo inós gwa haratlintii', slafíngw alhhe'eesay wásl nguwa slay.

¹⁶ Asma Mungú múk baraaká' yaamu guna ló'wa slaá', tam Garmaawós oo kilós nguri haniís, as umuúqo heewo oo inós gwa haratlintii', miwa qwaár, ala masók slafíngw alhhe'eesay wásl gun sláy.

¹⁷ Asma Mungú Garma ngwa ya/aawiiká as muu nguwa sakwasleemuuti, ala as muu nguwa ba/amisi.

¹⁸ «Heé Garma gwa haratlintii' ku sakwasleemuutiiká. Ala heé Garma gwa haratlintii'iiká, kwa hhe'eés sakwasleemaro, asma Garmaaduú kilós oo Mungú gwa haratlintii'iiká.

¹⁹ Sakwasleema an tí, gwa/aateema nina baraá yaamií hardihiyé', ala muu giwti gana slaá' ta gwa/aateemaawo, asma muruú ta tlehhahhiti ku tlákw.

²⁰ Asma heé muruú tlákw tlehhahhiít, gwa/aateema gi slaiiká, slám amór gwa/aateemaawo sleeme i daqayká, asma muruudá' tlákw i tlehhahhiti miwa geehhooúy.

²¹ Ala heé muruú ló' tlehhahhiít in hardah amór gwa/aateema, as muruudá' i tlehhahhiti iwa geehhoouy adór sleémeero kura tleéhh ar /uuruú Mungú.»

Yesu nee Yohane

²² Aluuwo Yesu nee eeharuuseerós tari tláy ay yaamaá Yudea, tari amoodá' wa hoót deelór niinaawe, iri baatimiís.

²³ Qoomaadae Yohane sleeme i baatimiis baraá yaamaá Ainónír wa ale, inslaawoó Salimu, asma ma'aay amoodae ki ur. Muu iri amór Yoháné daqaaqáy, giri baatimiís.

²⁴ Asma qoomaadae Yohane kwaa tseegiiká.

²⁵ Qoomaadae eeharuusér Yohane nee heeko wák oo Yahudi tay kaanganuús daanduú kángw hhoohhooeemisuuwo.

²⁶ Yohane kuri i daqáy kuri báy, «Intsaahhatusámo, heedá' nee kuúng ti koomá' gayuú Yordaniro, kudá' kuúng taa lamabu'uún, ga/aaweek hamí i múk baatimiis, nee muu sleémeero i amoorós i daqaqáy.»

²⁷ Yohane iri oó', «Hee gár i slay i káhh birkinga haniisiiká amór Mungú wa ale.

²⁸ Kuungá' kilá' aníng ina lamabu'uundé' niwa oó', ‹Aníng a Kristowooká, ala án tina ya/aáw geeraawós wa ale.›

²⁹ Heé nee /ameenír ta duxuuti ti koomá', an heedá' duuxuxuúm, ala mulqumoó heedaádá' duuxuxuúm oo didaádí dirií', inós gun iiárií qamín, slám afór heedaádá' duuxuxuúm gan sa qwalalaa/. Gawaá adoorihe qwal/uueé' aa boó/.

³⁰ Inós gár kuwa hariím in doogiigín, ala aníng an /aaruurúw.»

Kudá' dooraá daáhh

³¹ «Inósuudá' ni gáwtá wa hardáh, ku úr múk hatlá' sleémeero ba/a. Heé baraá yaamaá daáhh, a heé baraá yaamu, nee inós axweesanoó i axweesi oo baraá yaamu. Kudá' ni gawaá doorí wa hardáh ku úr muu sleémeero ba/a.

³² Muruudá' aa ár nee aa axamiís an kudá' i lamabu'un, ala heé lamabu'uungós gu ya/a/aám i kaahh.

³³ Heé lamabu'uungós gwa ya/an, duguno gwa qaás adór Mungú tar looeema.

³⁴ Asma heé Mungú naa ya/aáw, kángw i axweesi oo Mungú. Asma Mungú Qeeruú hhoohhoó' gu haniisiiká ar qoomeemes.

³⁵ Baabá Garma gu slaa'. Inós mura' sleémeero gwa dabaá Garmií qaás.

³⁶ Heé Garma gwa haratlintii', slafíngw alhhe'eesay wásl gu kón. Heé Garma gwa haratlintii'iiká slafiingw gu ariiká, aqo har sakwasleemár Mungú gun i dirí' daqisleém.»