Yohana 20 - Biblía Axweesantá Hhohho' ar Mungú 2004

Waasle/uú Yesu

¹ Bál Jumapiíliro Maria Magdalene ina amór /aantár keér matlaatlér boo/e, qoomár iimi iwa boo/ár i kahh. Tlaa/adá' gari aán naxés kaa hingeés afkú /aantaro.

² Iri ta'aaiín, iri hardát dír Simon Petro nee ay dír eeharusmooduú hatlá' Yesu aa slaá', giri beér, «Aako kwaa hingeés baraá /aantaro, ala atén amór kway qaás a xuaanaaká.»

³ Aluuwo Petro nee eeharusmooduú hatlá' tari tláy tawa amór /aantár kay.

⁴ Ala eeharusmooduú hatlá' ina ak ta'aaín ta Petrowo, iri geerií hardáh dír /aanta.

⁵ Iri xupuú', iri qaytsiít baraá /aanta. Inqwaruudá' taa tleéhh ar kitaáni kudá' kura untsuús guri ár, ala inós aa baraadií dahiiká.

⁶ Simon Petro iri hardáh, iri dáh baraá /aanta. Inqwaruudá' taa tleéhh ar kitaáni, kudá' kura untsuús guri ár i didaádií dirii',

⁷ nee warqamoodá' taa sagós ar untsuús, i dinkwár i dirii'iiká nee inqwaruuduú hatlá' oo kitaáni. Ala kuna amohhe'eés kway qaás dimbé alé.

⁸ Eeharusmooduú hatlá' aa geerií hardah, ina dáh sleeme. Gari ár, iri haratlintií'.

⁹ Asma inooín tidá' Gooi i kat kaa tsaahhiiká, tidá' kah, inós gár kuwa hariím aqo in waaslee/.

¹⁰ Eeharuuseedá' iri tleér iri wátl.

Yesu tiwa geehhooatís dír Maria Magdalene

¹¹ Ala Maria i afkú /aantár wa sihhimít i /aa/amiín. Qoomár iwa /aa/amiin iri xupú', iri qaytsít baraá /aanta.

¹² Malaykér tsár gari aán, ar inqwaruú /awák koom. Oo wák amór saga nee oo wák amór ya'a', didár slaqwtá Yesu geera kay qaás.

¹³ Malaykeedá' iri ó', «Aáyo, gár ta /aa/amiin a milá?» Inós iri ó', «Asma Aakooeé' kwa hingeés, nee aníng a xuaaká amór kway qaás.»

¹⁴ Tí ooaro ngiwa hhe'és iri alií warqeér, Yesu guri aán, i didá' wa sihhimiit, ala gwa tsahhiká adór tar Yesu.

¹⁵ Yesu gari báy, «Aáyo, ma /aa/amiín? Heé ta leelehhit a heemá?» Inós geera ngi xu', a heé asalmoó amohhe'eemamiís, iri ó', «Aáko, barnaxes kuúng una hingés, amór kway qás ooang, aníng daqaní u leéhh.»

¹⁶ Yesu iri oó', «Mariá.» Maria iri warqeér, iri ilawáts ar tsifrír Ebrania, iri ó', «Raboni.» (Gídaabárós a «Intsaahhatusámo».)

¹⁷ Yesu Maria gari báy, «Aníng mi kwatiitaar asma aga ki/iiká amór Baabá. Ala kiíng tláw amór hhaee'eé', ki beer, ‹Aníng a tsa/ám amór Baabuúeé', nee inós a Baabuúhúng sleeme, amór Munguúeé', nee inós a Munguúhúng sleeme.› »

¹⁸ Maria Magdalene iri tleér, eeharuuse gari beér, «Án Aako ugwa ár.» /Aymi'iidá' Aako aa dirós i káh, giri dir'íní alki/ít.

Yesu tiwa geehhooatís dír eeharuuseerós

¹⁹ Bál deelór Jumapiíliro, looa iwa dát, eeharuuse i dinkwár i dirí'. Afkú do' kwaa tseék, asma múk Yahudi kuwa da'ayumiti. Yesu iri dir'íní hardáh, iri tla/angw'ín i sihhiít, giri báy, «Wayda masók i dirhúng.»

²⁰ Qoomár /aymuuwí ooaro nguwa hhe'eés, dabaawós giri laqán, nee bihiiwós. Eeharuuseerós iri qwalaalá/ asma Aako nguwa aán.

²¹ Yesu giri malé báy, «Wayda masók i dirhúng. Adór Baabá aníng ira ya/aáw, aníng kuungá' sleeme nun ya/aáw.»

²² Aluuwo tí ooaro ngiwa hhe'eés, giri i hiínsl, giri báy, «Qeeruú hhoohhoó' oo Mungú ilaoohaak.

²³ Bar kuungá' tlakweemaá muu iga gurtleeré', kaa gurtláy. Kuungá' bira gurtleeri'iiká, kaa gurtlayká.»

Yesu nee Tomas

²⁴ Qoomár Yesu niwa dir'íní hardáh, Tomas i kaahh didae. Inós a kudá' ta babay Daangamo, oo wák baraá eeharuuseedá' mibaá nee tsare.

²⁵ Eeharuuseedár hatlá' guri beér, «Atén Aako ugwa araán.» Tomas giri báy, «Aníng barnaxes mulkayduú misumari oo gawaá dabaawós bura ariiká, nee diitsar'eé' bara qaasiiká baraá mulkáydá', nee slám dakw'eé' bura qaasiiká baraá bihhiiwós i alé, aníng a baloó ya/aamaaká.»

²⁶ Alaá deelo dakaát iwa waaráhh, eeharuuse i malé dinkwár i dirí' baraá do', nee Tomas i dinkwa nee inooín. Tam afkú do' kwa tseegi. Ala Yesu nay dir'íní hardáh, iri tla/angw'ín i sihhiít, giri báy, «Wayda masók i dirhúng.»

²⁷ Aluuwo Yesu iri oó' dír Tomas, «Diitsarók diirí qaaseek, nee dabaaeé' i qaytsiteegáy. Bihhiieé' kwatiiteek dakoge. Insareehhi maweek, ala haratlintií'.»

²⁸ Tomas guri báy, «Aakooeé' nee Munguúeé'.»

²⁹ Yesu iri oó', «Daxta iga haratlintí' asma iga aán. Múk amohhoó' a kudá' ga haratlintatií' tam iga ariikahe.»

Gár kitaábuuwí kusa gooín

³⁰ Yesu layaá hatlá' awa yaariir gina tleéhh dír ilaá eeharuuseerós wa ale, awa taa baraá kitaábuuwí gooinká.

³¹ Ala kuká' kingina gooín, asma kuungá' kawa haratlintia' adór Yesu tar Kristo, Garmoó Mungú, nee ar haratlintaooro slafiingw kuwa umuuwós ar sleera'.