Yohana 2 - Biblía Axweesantá Hhohho' ar Mungú 2004

Duuxór Kanár Galilaya

¹ Bál tame duuxo i deer baraá Kana, gixsár yaamaá Galilaya. Nee aayór Yesu i baraadií dirí' sleeme.

² Yesu dinkwa nee eeharuuseerós sleeme kina dahi'is baraá duuxoodá'.

³ Difaái iwa aleén, aayór Yesu iri hardát dír Yesu, iri ó', «Difaái aa aleén.»

⁴ Yesu gari báy, «Aáyo, án nee kiíng gaa a milá? Siiwar'eé' aa xeeriiká.»

⁵ Aayór Yesu sagadiyuuseedá' gadiyuus gari beér, «Umuúqo gaaro ar naa ooi ka tlehhá'.»

⁶ Didaádae sidaá lahhoó' awa taa tleéhh ar tlaa/e i dayá'. Sidoodá' kina didaádí qaás as tlehhemuú múk Yahudi, as hamtlo. Umuúqo sirwiro a har qoomoó deebedaá kooán ay faanqw.

⁷ Yesu iri oó', «Sidoosíng dalaa/aak ma'aywo.» Sidoodá' kiri dalaá/, kay milalaá/.

⁸ Giri báy, «Daxta i hheekaak, nee ki hubá' dír heedá' úr oo muruú /aymár qasmiís.» Kiri huúw.

⁹ Heedaádá' úr oo muruú /aymár qasmiís ma'aydá' naa difaái tleehhitiye' giri tsaáq. Inós difaáirí amór i dahh gaa xuiiká, (ala sagadiyuuseedá' gaa i hhek gaa xú'). Heedaádá' úr oo muruú /aymár qasmiís heé duuxuuxuúm gway ateét,

¹⁰ gway báy, «Umuúqo heewo difaáír tsuu' gan geerií haniis dír muu. Ala muu bira hhe'eés wahaango, aluuwo tidár maánjirí gari duux. Ala kuúng difaáír tsuu' ana aluutís ay hamí.»

¹¹ Layaarí Yesu aa tleéhh amór Kanár Galilayár wa ale, a layaarós ar har geera. Xirfuuwós guri geehhooatís, nee eeharuuseerós guri haratlintí'.

¹² Aluuwo iri aweér ay Kapernaumu, inós nee aayoorós nee hhaeewós nee eeharuuseerós. Tari amoodá' wa hoót deelór niinawe.

Yesu múk baraá Doó Mungú wa weerimiís nguwa gusiisín

¹³ Nee deeloodae deelór ur ar múk Yahudi, tidár Pasaáka, aa naká/. Yesu iri tsa/án ay Yerusalemu.

¹⁴ Muu guri ár oo baraá Doó Mungú i dirií', i hikwaá weerimiis, nee bee/aangw nee hhooka. Nee múk peésár gaamiís i didá' i dirii' sleeme, taa iwiít dír meesaduuín.

¹⁵ Yesu himuú taa tlaatlaáw guri amohhe'eés, mukdá' sleémeero baraá Doó Mungú i dirií' guri guús dinkwa nee bee/angw'ín nee hikwaawo. Mukdá' peésár gaamiís, peésar'ín Yesu gari yaamií ku'uús, nee meesaduuín giri /aankwaratsín.

¹⁶ Mukdá' hhookár weerimiís guri báy, «Muruusíng sleémeero hingeesaak. Doó Baabuúeé' mu doó halaanu'uuma tleehhara'.»

¹⁷ Eeharuuseerós tidá' taa gooín gari insleér, tidá' kah, «Sla'aarír doó Baabuúeé' aníng i gás.»

¹⁸ Múk Yahudi iri oó', «Layár kuúng ta tlehhit ar aleesleemuuwók gu laqaaqaam oo muruuwí kur tlehhit a gaalá?»

¹⁹ Yesu iri oó', «Do'wí oo Mungú fee/aak, daqaní aníng u sihhitís har deelo tame.»

²⁰ Múk Yahudi iri oó', «Do'wí oo Doó Mungú kuna tlehhahhiít ay kureeri mibeeri tsiyáhh nee lahhoó', nee kuúng unqo sihhitísa deelo támií ale?»

²¹ Ala Yesu kángw Doó Mungú oo aa káh a slaqwtós.

²² Aluuwo qoomár inós niwa waasleé/ baraá múk aa qaátl wa aleeró, eeharuuseerós kangwdá' Yesu aa káh guri insleér. Gooidá' gari haratlintí', nee /aymuudá' Yesu aa kaahi.

Yesu muu sleémeero gu xuu'

²³ Qoomár Yesu iwa baraá Yerusalemúr i dirii'i, bál deelór ur ar Pasaákuwo, múk yaariír inós guri haratlintií', as layuudá' inós aa tleéhh kiwa ár.

²⁴ Ala Yesu taa ak amor'íní hanisiiká, asma inós muner'ín gaa ló'wa tsaáhh.

²⁵ Inós lamabu'úngw heé i slai i kaahh daanduú heewo. Asma tidá' baraá muunuú heé i dirii' inós gaa qaroó xuú'.