Yohana 16 - Biblía Axweesantá Hhohho' ar Mungú 2004

¹ «/Aymi'iiká' ngina dirhúng i oó' as kuungá' mutunduwa gee/aásl tari alií ki/á'.

² Kuungá' tundu baynitis dír maraá saalingo. Slám qooma i hardát ar umuúqo heewo oo kuungá' nu tsuú/, ngiwa xui i Munguú sagadiyuus.

³ Adoorí kan tlehhiit asma Baabá kuwa xuiiká, nee aníng sleeme ti xuiiká.

⁴ Ala án tí ngina dirhúng i oó' as kahhó' qoomaadá' bira xeér, kuungá' tí ka insleerá' asma ngaa geerií oó'.» «Tí iimu/uungo gár ngisa ooiiká, asma án nee kuungá' a dinkwa.

Gadiyér Qeeruú hhoohhoó' oo Mungú

⁵ Ala án hám daxta a tláw amór kudá' aníng iga ya/aaw. Slám dirhunge heé aníng i yaahamiís i kaahh oo káh, ‹Amór ta keer a amá?›

⁶ Ala munerhúng gurhaamiro aa háts asma tí án naa dirhúng i oó'.

⁷ Ala ar aníng ni dirhúng i oo' ar ló', ‹Dirhunge a tsiní án barnaxes aga tláw. Asma aníng bara tlawiiká, Alee/isusmo i amorhúngí hardihiiká. Ala bar án aga tláw, án ngu amorhúngií ya/aáw.›

⁸ Nee Alee/isusmoodá' birna hardáh, inós kángw tlakweema nee gan'amu, nee sakwasleema gun dír múk i gwa/atis.

⁹ Daanduú tlakweemaawo, asma án ti haratlintati'iiká,

¹⁰ nee daanduú gan'amuuwo, asma aníng a tláw amór Baabá nee slám i aanda'aaká.

¹¹ Daanduú sakwasleemaro asma kudaádá' úr oo yaamu kwaa qaroó sakwasleemuút.

¹² «Tam hamí /ayma'aá yaariir i koóm, awa ni kuungá' i oiim, ala kuungá' i aleesleera'aaká hamí.

¹³ Ala Qeeruuduú looeema bar inós naa hardáh, kuungá' nu gan'aas baraá looeema sleémeero, asma ar i axweesi a toseeká, ala sleémeero tidá' i axaasi gan oo', nee muruudá' aluúwaá hardaha nu xu'utis.

¹⁴ Inós aníng i xirfayees, asma tidá' i dir'eé' wa slay, ngin dirhúngí oo'.

¹⁵ Muruudá' sleémeero Baabá i kon a kwe'eé'. An gár nisa oó', inós tidá' i dir'eé' wa slay ngin dirhúngí oo'.»

Gurhaami nee qwala/

¹⁶ «Alaá deelór niina bira waaráhh, án kuungá' i aanda'aaká. Nee slám alaá deelór niina bira malé waaráhh, án kuungá' i aandá'.»

¹⁷ Bahh'alé baraá eeharuuseerose tiri kilooín yaahamisiyé', «Axweesanaywí a milá iwa kaahi, ‹Alaá deelór niina bira waaráhh, án kuungá' i aanda'aaká. Nee slám alaá deelór niina bira malé waaráhh, án kuungá' i aandá'.› Nee ar iwa kaahi, ‹Asma aníng a tláw amór Baabá.› »

¹⁸ Tari káh, «Gídaabárós a milá, tí iwa kaahi, ‹Alaá deelór niina.› Gár i axweesi a tsatsahhaamanaaká.»

¹⁹ Yesu gari tsaáhh adór eeharuuseerós ngur yaahaasár wa slá', gari báy, «Gár tiwa yaahamisa' a tidá' nuwa báwi, ‹Alaá deelór niina bira waaráhh, án kuungá' i aanda'aaká, nee slám alaá deelór niina bira malé waaráhh, án kuungá' i malé aandá'.›

²⁰ Án a kah, kuungá' a /a/á', nee tay tsuunqumisá', ala múk aa haratlintii'iiká iri qwalaa/. Kuungá' tay gurhaamutá', ala gurhaamirhúng i warqeér tawa qwala/.

²¹ /Ameeni in gurhaamút deelór xwaylarós binda xeér, asma slahh'amuuduú siiwár xwayla. Ala bira xwayluúr, slahh'amaayeedá' ga insleeraaká, asma qwal/uudá' na/aay kuwa sláy baraá yaamuwo.

²² Ala dirhunge a adoorí sleeme, a gurhaamutá', ala án kuungá' nu malé ár, nee munerhúng iri qwalá/, nee qwal/uuhúng heé gu hingeés i kaahh.

²³ «Slám baldá' gár iwa yaahasa' i káhh. Ar ló' án a kah, Baabá bura firiindé' umuúqo gaaro, inós ngi haniis ar umuueé'.

²⁴ Ay hamí gár taa firiindé' i káhh ar umuueé'. Fiririimé', a sleerá', as qwal/uuhúng iwa boo/i.»

Aníng yaamu iga ar baá/

²⁵ «Muruuwí nguna dirhúngí oó' ar slaqsi'i. Ala qooma i hardát ar aníng niwa baloó dirhúngí ilawatsaaká ar slaqsi'i. Ala kángw Baabá ngun dirhúng i alki/iít ar geehhoeema.

²⁶ Baldá' a firiindá' ar umuueé', slám nu bawaaká aníng nu aleefiriím dír Baabahe.

²⁷ Asma Baabá inósuú kilá' kuungá' nu slaa', asma án kuungá' i sla'á', nee kari haratlintié' adór aníng nir amór Baabá daáhh.

²⁸ Aníng an amór Baabá daáhh, nay baraaká' yaamií hardáh, slám án daxta yaamu i geexáw, nay tláw amór Baabá.»

²⁹ Eeharuuseerós guri beér, «Ga/aaweegáy, daxta a axwés ar adór geehhoo', slám a axweská ar slaqsi'i.

³⁰ Atén aga xuaán adór mura' sleémeero kuúng kur xú', nee slám gaa i káhh ar hee kuúng uwa yaahasi. Gawaá adoorihe aga haratlintiaán adór kuúng tar amór Mungú dáhh.»

³¹ Yesu giri báy, «Daxta aga haratlinti'í'i?

³² Ga/aawaagáy, qooma i hardát, slám qooma naa qaroó hardát, ar kuungá' sleémeero tawa diyaya/ata', umuú heewo amoorós, nee aníng iri kilooeé' geexeerá'. Ala aníng a kilooeeneeká, asma Baabá nee aníng a dinkwa.

³³ Tí án ngina kuungá' báw, as wayda kuwa sleera' baraaeene. Baraaká' yaamuwo slahh'amu u sleerá'. Ala ma mune siaara', asma aníng yaamu iga ar baá/.»