Yohana 13 - Biblía Axweesantá Hhohho' ar Mungú 2004

Yesu i ya'aá eeharuuseerós hamtliit

¹ Qoomár deeloodá' ur ar Pasaáka iwa xeeriiká. Yesu gaa xuú' adór qoomaarós ira xeér, tidá' iwa quutli baraaká' yaamuwo, iwa tlay amór Baabá. Nee inós mukós kwí oo baraaká' yaamu guna slaá', slám guri ló'wa sla'ati hhe'eés ay alhhe'eesaay.

² Qoomár tsiindoowo Yesu nee eeharuuseerós ta dír muruú /aymár i dirii'. Yuda, garmoó Simon Iskarioti, Neetlaangw gwaa áy gari slaá' Yesu nguwa saki/i.

³ Yesu gaa xuú' adór Baabá mura' sleémeero ngura gawaá dabaawós i qaás, nee adór inós amór naa daáhh tar amór Mungú, nee hám i amór Mungú káy.

⁴ Yesu iri dír muruú /aymár wa tláy, inqwaarirós gari bihhií qaás. Nee inqwaarír niina gari taataáhh gari afeetlí tseék.

⁵ Aluuwo ma'aay giri qaás baraá isaangi, ya'aá eeharuuseerós giri iimu/ún hamtlitooro, nee giri fitsiít ar inqwaaridá' aa afeetlí tseék.

⁶ Iri hardáh dír Simon Petro. Petro iri oó', «Aáko, kuúng ya'aaeé' inqo hámtla?»

⁷ Yesu iri oó', «Gár aníng ni tlehhiit, kuúng a xu'uká hamí, ala aluuwo a tsáhh.»

⁸ Petro iri oó', «Kuúng ya'aaeé' i baloó hamtlaká.» Yesu iri oó', «Án bar ya'aawók i hamaatlaaká, án nee kuúng alqaati i káhh.»

⁹ Simon Petro iri oó', «Aáko, a ya'a' kilooineeká, ala tam daba' nee saga sleeme hamaatleek.»

¹⁰ Yesu iri oó', «Heé aa qaroó hamtlin, gár is malé hamtlin i káhh, aqo har ya'a' hamaatla kilós. Asma slaqwtós sleémeero ka hhoohhoo'. Nee kuungá' tundu hhohhó', ala kuungá' sleémeerowooká.»

¹¹ Asma Yesu heé inós gu sakií/ gu xuu', an gár inós isa oó', «Kuungá' sleémeero tundu hhohhoeeká.»

¹² Qoomár ya'aaín hamtlooro ngiwa hhe'eés, inqwaarirós gari tsiít, iri iwiít, eeharuuseerós gari báy, «Xáy, tí naa kuungá' i tleéhh aga tsahhí'i?

¹³ Aníng kuungá' in Intsaahhatusmór ateetiindá', nee Aako. Ala adoosíng i qoón, asma an adór aníng ni dirii'.

¹⁴ Ala bar anuúwí oo Aako nee Intsaahhatusmo ya'aahúng ngina hamtliít, gár kuungá' tunduwa hariím a tin ya'a' hamtlitá'.

¹⁵ Asma slaqsaay nguna laqaám, as adoorí án naa kuungá' i tleéhh, kuungá' sleeme kawa tlehhita'.

¹⁶ Án a kah, lawaalmo ku ureeká ta aakoowose, laqaá ya/abusmo ku ureeká ta heedaádá' ngwa ya/aawi.

¹⁷ Tí kuungá' bara xué', kuungá' tundu amohhoó bar aga tlehhé'.

¹⁸ «Án kaangwí naa káh oo kuungá' sleémeerowooká. Asma aníng muk'eé' kudá' naa tsawaár u xuú'. Ala tí ina tleehharút as Gooirí iwa bo/, tidá' kah, ‹Kudá' muruú /aymar'eé' gwa /aay, aa wakusmooeé' tleehhiít.›

¹⁹ Kaangwí ngun iimír hamí wa oó', dír ira tleehharuutiiká, asma qoomár bira tleehharuút, kuungá' kawa haratlintia' adór aníng tar inós.

²⁰ Án a kah, umuúqo heewo oo aníng naa ya/aáw, nee inós kuri ilaaóh, heedaádá' gwa ilaaoh a aníng ina ilaóh. Nee kudá' aníng iga ilaaoh, a kudá' aníng iga ya/aaw guna ilaaóh.»

Yesu adór kur saki/i ga geerií alki/iit

²¹ Yesu axweesanaywí ooaro nguwa hhe'eés, iri amoqwaár baraá muunaáwose. Iri oó', «Án a kah, heé wák baraá tla/angwhunge aníng i sakii/.»

²² Eeharuuse tiri kilooín i qaytsimít, tari xuruút tawa kaahi, «Heé i daanda axweesi a heemá?»

²³ Eeharusmooko wák i deer, oo aa tlintii' gawaá da/eewaá Yesu. Inós an kudá' Yesu aa slaá'.

²⁴ Simon Petro eeharusmoodá' guri kuútl ar dawa, iwa kaahi, «Yaahaaseek, heé i daanda kaahi a heemá?»

²⁵ Eeharusmoodá' iri suruúk ak alé dír Yesu, iri oó', «Aáko, a heemá?»

²⁶ Yesu iri oó', «Án /aarmoó fa/a bura tsaákw nee heedaádá' ngway haniis, an inós.» /Aarmo guri tsaákw, guri haniís dír Yuda, garmoó Simon Iskarioti.

²⁷ Yuda /aarmoodá' /aymaaro nguwa hhe'eés, Neetlaangw guri áy. Yesu iri oó', «Tidá' ta tleehhamór wa sla', tleehheek ar gaanslaay.»

²⁸ Ala baraá mukdá' aa dír muruú /aymár i iwiiti, tam heé wák i kaahh, oo gaa xuu', gár kusa adoodá' báy.

²⁹ Eeharuuse bahh'alé geera ngi xu', Yesu Yuda guna báy, «Muruudá' ta sla'aan as deelór ur tlaxwang,» laqaá liitlakuuse ngiwa gaárí haniisi, asma Yuda tawa heé tlakoó peésár amohhe'eemaamiís.

³⁰ Alaá /aarmoodá' /aymaaro nguwa hhe'eés, iri ti'iít hamtidár kilae. Qoomaadaádae iimi a xweera.

Hara'ayár /aben

³¹ Alaá Yuda iwa ti'iít, Yesu iri oó', «Daxta Garmoó Hee kwa xirfayeés, nee Mungú kwa xirfayeés baraawós ar alé.

³² Ala Mungú bar kwa xirfayeés ar baraá Garmoó Hee, Mungú sleeme inós gun xirfayees ar baraawós, nee guri xirfayees ar gaanslaay.

³³ Kuungá' na/aá ninakw, deelór aa met ka ureeká, án nee kuungá' tawa dinkwa. Án kuungá' iri leelehhitá', nee adoodá' múk Yahudi ngwa báw, án kuungá' sleeme nun adoodá' báw, niwa kah, ‹Amoodá' án ni kaw, kuungá' hardahamu ngu aleesleera'aaká.›

³⁴ Hara'ayár /aben ngi oó', ‹Ti sla'aaslae'. Adoodá' án kuungá' nura slaá', kuungá' sleeme ti adoodár sla'aaslae'.

³⁵ Gawaá adoorihe muu sleémeero gay tsaahh adór kuungá' tar eeharuuser'eé', barnaxes kuungá' kiloohúng taa sla'aaslaé'.› »

Yesu tlaankuú Petro nguwa geerií oó'

³⁶ Simon Petro iri oó', «Aáko, amór kuúng ta keer a amá?» Yesu iri oó', «Amór án ni kaw, kuúng eeharto i aleesleeraaká hamí. Ala i eehát aluuwo.»

³⁷ Petro iri oó', «Aáko, asma milá án kuúng eeharto mus aleeslawaaká hamí? Aníng slafingw'eé' u haniís as daanduuwók.»

³⁸ Yesu iri oó', «Ar lóe, kuúng slafiingók uqo hanísa as aníng? Án a kah, konkomo iwa uui, án kuúng iga tlánk sagaáwa tám wa ale.»