Yohana 12 - Biblía Axweesantá Hhohho' ar Mungú 2004

Yesu kuwa Betaniár wa sliík ar mooyaangw

¹ Bál Pasaákuwo deelór aa met tawa lahhoó', Yesu iri hardáh amór Betania, amoodá' Lasaro i dirii'i. Inós a kudá' taa waaslee/atís baraá múk aa qaátl wa ale.

² Yesu kuri deelór úr i tleéhh amoodá' wa ale. Marta guri sagadiyús, nee Lasaro a heé wák dír mukdá' aa dír muruú /aymár i iwiiti.

³ Maria mooyángw ta babay nardo guri taatáhh, oo har qoomoó tlaqtá kílo. Ku hhohhó', slám tlaxoorós ka ló'wa ur. Ya'aá Yesu giri slík, giri fíts ar se'éngw sagós. Nee do'da' iri haáts mooyangwdae.

⁴ Ala Yuda Iskarioti, kudá' wák baraá eeharuusér Yesuwo, inós an kudá' Yesu gu sakií/. Inós iri oó',

⁵ «Ahaá, mooyaangwí mus kwa weerisiiká ar shiliíngi tsiire tám, nee shiliíngirí kari liitlakuusér i haniis?»

⁶ Inós adoorí gaa ooiiká as liitlakuuse ngiwa gurtláy, ala asma inós tawa fisusmo. Nee inós a heé tlakwayduú peésa gu amohhe'eemamiís. Inós peésaadá' ta baraadií qamaamin gan fisaasín.

⁷ Yesu iri oó', «Maweek, ngi qas ay bál deelór foolar'eé'.

⁸ Asma liitlakuuse umuú daqto nee kuungá' a dinkwa, ala aníng nee kuungá' a dinkwaarooká umuú daqto.»

Ta loohír leelehhiit ar Lasaro kur gaasi

⁹ Múk yaariír oo Yahudi kaangw nguwa sláy adór Yesu ir amoodá' i dirií', tari hardáh. Ala gár nisa hardihiyé' a Yesu kiloseeká, ala as Lasaroodá' Yesu aa waasle/atís baraá múk aa qaátl wa ale nguwa ariya' sleeme.

¹⁰ Gawaá adoorihe kaahamuusér uren ar Mungú tari al'axweés as Lasaro sleeme kuwa gaasi.

¹¹ Asma múk Yahudi oo yaariír tina paraátl nee inooín asma Lasaro, Yesu kuri haratlintií'.

Yesu iwa bar/úr dáh Yerusalemu

¹² Bál tsár múk yaariír nina hardáh as deelór ur. Kari axaás adór Yesu nir hardáh baraá gixsár Yerusalemu.

¹³ Haleemaá slaansla kiri taataáhh, tari tsee/ií ti'iít as kuwa al'ay. Tari tsimahhuús ar afór ur, ta kaahi, «Hosana, i xirfuuti kudá' hardáh ar umuú Aako, Waawutmoó múk Israeli.»

¹⁴ Yesu gwarendmoó daqwaay ngwa i tsa/án, adoodá' kara gooín,

¹⁵ «Múk gixsár Siyoni, ma da'ayumiitaara', Qaytsité', waawutmoohúng naa hardáh, aa tsa/án gawaá daanduú gwarendmoó daqwaay.»

¹⁶ Hargeeraawo muruuwí eeharuuseerós gwa tsahhiká. Ala Yesu kuwa xirfayeés, kari insláy adór muruuwí kura daanduuwósí gooín, nee adór ira tleehharuút.

¹⁷ Mukdaádá' dáw bál Yesu Lasaro nguwa ateét baraá /aantár wa ale, nguri waasle/atís, kaangwí kuna alki/iít dír muu.

¹⁸ An gár Yesu kusa al'áy nee múk yaariír, asma kángw layaadá' aa tleéhh kuna axaás.

¹⁹ Múk Farisayo tari kilooín axweés, tawa kaahi, «Aga aandí'iíke, gár kuungá' ta aleesleera' i káhh. Qaytsiité', muu sleémeero gwa eehár.»

Múk Yunani i Yesú artá wa slaa'

²⁰ Mukko Yunani i deer baraá tla/ángw mukdá' aa sluufmisuú ay, bál deeloodá' ure.

²¹ Mukwí ina hardáh dír Filipo, heé gixsár Bet-saida ar yaamaá Galilaya, kuri báy, «Aáko, atén Yesu u artá wa sla'aán.»

²² Filipo iri hardáh dír Andrea, kaangwí guri oó'. Andrea nee Filipo Yesu kuri ádbáy.

²³ Yesu inooín giri báy, «Siiwa aa xeér ar Garmoó Hee kuwa xirfayeesi.

²⁴ Án a kah, ilmoó angaáno bira huuiiká baraá hhapér i alé, iri gwaa', aqo in hootatín adoodá' i dirii'i kilós alé. Ala bira gwaá', mamaá yaariir gin laqwaal.

²⁵ Heé slafiingós gu slaá', gu qwaarees, nee heé slafiingós gu aáhh baraá yaamuukaákae, gu ba/amis tam ay slafíngw alhhe'eesay wásl.

²⁶ Aníng hee bir sagadiyuus, i eehari. Daqaní didaádá' aníng ni diriia, an didá' sagadiyusmooeé' sleeme i dirii'i. Slám aníng hee bir sagadiyuus, heewí ku ilaiwawaa/ nee Baabá.»

Yesu i gwa'araarós alki/iit

²⁷ «Muunaáeé' daxta aa amoqwaár. Aníng hám ma oó'? An oóa, ‹Baabá, án ba/amisáng baraá siiwarihe.› Ala adoorí a ooaaká, asma gaarí an gár siiwarí ngisa i hardáh.

²⁸ Baabá, kuúng umuuwók xirfayeeseek.» Aluuwo afo niri gawaá doorií wa ilaawáts, ar kah, «Ugwa xirfayeés, nee hám u malé xirfayeés.»

²⁹ Boo/aydá' didá' wa sihhimiít, adoodá' ngiwa axaás, tari oó', «Kududuhaay i deer.» Bahh'alé tari oó', «Malaykamo nee inós nina axweesiyé'.»

³⁰ Yesu iri oó', «Afoorí naa hardatká as aníng, ala as kuungá'.

³¹ Daxta sakwasleemár múk baraaká' yaamu naa xeér. Hám heedá' úr oo yaamuuká' ku tsee/ií kwaahh.

³² Aníng birta gáwtí tleés, muu sleémeero u amor'eé' uuruúx.»

³³ Adoorí gana axweés as ngiwa laqan adór inós ir gwaai a adoomá.

³⁴ Boo/aay iri oó', «Atén gár naa axasaán baraá hara'ayaaro Kristo in slafaafín ay alhhe'eesay wasle. Nee ala kuúng mas kat, Garmoó Hee gár kuwa hariím a gáwtí tleesa? Garmaawí oo Hee a heemá?»

³⁵ Yesu iri oó', «Qoomár niinawe gwa/aateema i kumiitiyá' iwa gwa/aatiya' dirhunge. Hi'iimité' ar baraá gwa/aateemaaká', giwti munduwa ót. Asma hee bir baraá giwtír wa hi'iimiit, amór i kay ga xuiiká.

³⁶ Qoomaarí gwa/aateema kiwa koonda', gwa/aateemaaká' haratlintiaak, as tawa múk gwa/aateemaaká' tleehhita'.» Yesu adoorí gari oó', iri tláy, iri nahhaatár áy, as mukuwa ár.

Múk Yahudi Yesu gwa haratlinti'iiká

³⁷ Yesu tam layaá yaariir gaa tlehhahhiiti geeraaín wa ale, ala kwa haratlinti'iiká.

³⁸ Asma /aymuudá' aarusmo Isaya aa oó' iwa boo/i, kudá' iwa káh, «Aáko, heé axweesanayrén gwa haratlintii' a heemá? Nee /uuruú Aako heé kway laqán a heemá?»

³⁹ Gawaá adoorihe ngwa haratlinti'iiká, asma aarusmo Isaya ina malé oó',

⁴⁰ «Ilaaín gaa taampúy, nee muner'ín gaa gawdeés, as makawa ár ar ilaaín, nee makawa tsaáhh ar muner'ín, tari hhu'u'ún, án ngiri hungu/uús.»

⁴¹ Axweesanaywí aarusmo Isaya guna oó', asma inós xirfuú Yesu guna ár, nee kangós guri axweés.

⁴² Ala tam adoorihe baraá mukdá' urene múk yaariír i deer oo Yesu gwa haratlintii'. Ala mukwí taa laqaniká, asma múk Farisayo, as mikiwa baynitís dír doó saaliingo.

⁴³ Asma inooín gár ta slai a muu gin xirfayeemiis ta ak Mungú ngiwa xirfayeesi.

Axweesantá Yesu hee gu sakwasleemút

⁴⁴ Yesu iri tseé' ar afór ur, iri oó', «Hee bar aníng iga haratlintií', heé aa haratlintií' a aningeeká, ala a kudá' aníng iga ya/aaw guna haratlintií'.

⁴⁵ Nee kudá' aníng i ga/áw, heé i ga/ay a aningeeká, ala a kudá' aníng iga ya/aaw gun ga/áy.

⁴⁶ Aníng nina baraá yaamií hardáh, as niwa gwa/aateemaá yaamu tleehhiit, asma kudá' aníng iga haratlintii' miwa baraá giwtír wa hoót.

⁴⁷ Hee bar axweesanay'eé' gwa axaás, ala gwa oohiiká, aníng u sakwasleemuutaaká. Asma aníng naa hardihiiká as muu nguwa sakwasleemuut, gár nisa hardáh a muu nguwa ba/amis.

⁴⁸ Hee bar aníng iga sií', nee bar axweesanay'eé' gwa ya/aniká, heewí heé gu sakwasleemuút i deer. Axweesantí hám naa axweés, gun sakwasleemút bál deelór alhhe'eesaywo.

⁴⁹ Asma aníng aga axweesiiká ar sla'aarir'eé' kilós. Ala Baabuúdá' aníng iga ya/aaw, inósuú kilá' ina hara'ayín daanduú tidá' ni ooa nee tidá' ni axweesa.

⁵⁰ Nee aníng a xuú' adór hara'ayaarós tar slafíngw alhhe'eesay wásl. Gawaá adoorihe axweesantá án ni axwees, a tidá' Baabá aníng iga báy.»