Yohana 11 - Biblía Axweesantá Hhohho' ar Mungú 2004

Gwa'arár Lasaro

¹ Heeko wák i tiiq, umuuwós a Lasaro. Inós a heé gixsár Betania, gixsadá' Maria i hot, nee hho'oorós Marta.

² Maria tidá' ya'aá Aako gaa slik ar di/tá mooyángw koom, giri fíts ar se'éngw sagós. Hhiyaawós Lasaro i tiiq.

³ Hhaeedá' niri ya/abiné' amór Yesu, kuri báy, «Aáko, mulqumoowók i tiiq.»

⁴ Ala qoomár Yesu kaangwí nguwa axaás, iri oó', «Tiqtisíng ar gwa'araarooká, ala as xirfuú Mungú, as Garmoó Mungú iwa xurfuuti ar tiqtisíng.»

⁵ Yesu Marta nee hho'oorós nee Lasaro gina ló'wa slaá'.

⁶ Yesu ngiwa axaás adór Lasaro ir tiíq, iri amoodií tlaatla/iít deelo tsare.

⁷ Aluudaádae eeharuuseerós gari báy, «Qwalaasé', a malé Yudéár kawaán.»

⁸ Eeharuuse iri ó', «Intsaahhatusámo, lata'aángár /aben múk Yahudi una loohi leelehhiít as tuwa tlaquuti ar tlaa/e. Slám a amoodá' i kí/a?»

⁹ Yesu iri oó', «Ahaá, looár tlaatla/aangw a mibaá nee tsáreéke? Hee bir hi'imiit tlaatla/aango dukutsmo gu tuuiiká. Asma gwa/aateemaá yaamu gi ga/áy.

¹⁰ Ala bir hi'imiit xweeraawo, dukutsmo gu tuu', asma gwa/aateemaá baraawós i kahhiyá'.»

¹¹ Yesu alaá axweesanaywí nguwa he'eés ooaro, iri oó', «Mulqumoorén Lasaro aa guú', nee án hamí a amoodá' káw as nguwa tleesár aw.»

¹² Eeharuuse iri ó', «Aáko, bar ina guú', ahaá ala i hunguú/iíke?»

¹³ Yesu kángw aa káh a daanduú gwa'ara, ala inooín ka xui, kángw i kaahi a daanduú gu'ute.

¹⁴ Yesu kaangwí guri gwa/atís, iri oó', «Lasaro aa gwaá'.

¹⁵ Aníng a qwalalaá/ as kuungá', asma qoomaadae a amoodá' i diriiaaká. As kahhó' kuungá' tawa haratlintia'. Ala gusé' amoorós.»

¹⁶ Tomas, kudá' ta babay Daangamo, iri oó' dír eeharuusér hatlá', «Qwalaasé', atén sleeme a daqawán, as tawa alqatlaan nee inós.»

Yesu a waasle/ nee slafiingw

¹⁷ Baalaadá' Yesu iwa hardáh, Lasaro kwa qaroó foól deelo tsiyáhh aa waaráhh.

¹⁸ Betania ka tseew dír Yerusalemuro adór kilomiíta tám.

¹⁹ Nee múk yaariír oo Yahudi tinda hardáh dír Marta nee Maria, as kiwa gurkwa/amisi as hhiyaaín iwa gwaá'.

²⁰ Marta ngiwa axás adór Yesu ir laweé', guri al'eér. Ala Maria i dó' wa iwiwít.

²¹ Marta Yesu guri beér, «Aáko, kuúng geera bar diirí dirí', hhiyaaeé' geera alók aa gwaaiiká.

²² Ala tam hamí a xuú' adór umuúqo gár ta dír Mungú i firiinda, Mungú ngi haniis.»

²³ Yesu iri oó', «Hhiyaawók i waaslee/.»

²⁴ Marta iri ó', «A xuú' adór ir waasleé/ baraá waasle/uwo bál deelór alhhe'eesaywo.»

²⁵ Yesu gari báy, «Aníng an waasle/ nee slafiingw. Heé aníng iga haratlintii', tim i gwaai, inós i slaaf.

²⁶ Nee kudá' slaáf, nee aníng iri haratlintii', inós i baloó gwaaiiká ay slafíngw alhhe'eesay wásl. Xáy, tí aga haratlintí'i?»

²⁷ Marta iri ó', «Eeít, Aáko, aníng aga haratlintií' adór kuúng tar Kristo, Garmoó Mungú, kudá' baraá yaamií hardáh.»

Yesu iwa /aa/amín

²⁸ Marta adoorí ooaro ngiwa hhe'és, iri amór dó' i kí/, hho'oorós Maria gari bihhií atét, iri ó', «Intsaahhatusmo naa hardáh, kiíng i ateetín.»

²⁹ Maria adoorí ngiwa axás, iri tleér ar gaanslaay, iri hardát amór Yesu.

³⁰ Nee Yesu qoomaadae aa hardihiiká baraá gixsadá', i didaádá' i kaahh, didár Marta ngway al'eér.

³¹ Múk Yahudi, kudá' nee Maria al'iwiwitá' dír dó' wa ale as gurkwa/amis, kawa ár adór Maria ira tleér ar gaanslaay, tari ti'iít, kari aluú wa eehár. Inooín geera ka xui in /aa/aá eér amór /aanta.

³² Maria iwa hardát didá' Yesu i dirii'i, nee qoomár nguwa aán, iri tumbarara'át dír ya'aá Yesu, iri ó', «Aáko, kuúng geera bar diirí dirí', hhiyaaeé' geera alók aa gwaaiiká.»

³³ Yesu Maria ngiwa ár iwa /aa/amiin, nee mukduú Yahudi nee inós ti alkoomá' i /aa/amín sleeme, guruuwós iri tláy, muunaáwós iri amoqwaár,

³⁴ iri oó', «Dír kway qasé' a diimá?» Tari oó', «Aáko, qwaláng areek.»

³⁵ Yesu iri /aá/.

³⁶ Múk Yahudi iri oó', «Qaytsité' adór ngura slaá'.»

³⁷ Bahh'alé ta kaahi, «Kwí bar taampa gana ila' qaytsitís, ala gwa'arár heewí ila/aro geera gaa aleeslaykáhe?»

Lasaro kuwa waaslee/atís

³⁸ Yesu iri amoqwaqwadín malé alé baraá muunaáwose, iri hardáh ay dír /aanta. /Aantadá' kaa baraá guruú tlaa/ár i foól, nee tlaa/ár hatlá' kari afkudí qaás.

³⁹ Yesu iri oó', «Tlaa/a hingeesaak.» Marta, hho'ór heedaádá' aa gwaa', iri ó', «Aáko, aa tsutsuú', asma aa hoót baraá /aantár wa ale deelo tsiyáhh.»

⁴⁰ Yesu iri oó', «Án kiíng iga báwiíke, bara haratlintí', xirfuú Mungú u aán.»

⁴¹ Tlaa/adá' kari hingeés. Yesu iri gáwtí qaytsiít, iri oó', «Baabá, án kuúng un sluufiís, asma án kuúng iga iiárií qás.

⁴² Aníng aga xuú' adór kuúng ir iiárií qamaamiín umuú deelooro. Ala tí aníng gár ngisa oó', a as boo/aywí oo muu, kwí diirí dirií', kawa haratlinti'i adór án kuúng ira ya/áp.»

⁴³ Yesu adoorí ooaro ngiwa hhe'eés, iri tseé' ar afór ur, «Lasáro, ti'iitáng.»

⁴⁴ Inósuudá' aa gwaa' niri ti'iít, kwaa untsuús ar inqwaruú tuua, iimír ya'aá wa ale ay daba', nee gitse/awós kaa tseék ar warqamo. Yesu iri oó', «Gweeraak, i tlay.»

Ta loohír leelehhiit ar Yesu kur oohi

⁴⁵ Múk Yahudi oo yaariír oo naa hardah amór Maria, adoodá' Yesu aa tleéhh kawa ár, kuri haratlintií'.

⁴⁶ Ala múk Yahudi bahh'alé tari tláy amór múk Farisayo, adoodá' Yesu aa tleéhh kari alki/iít.

⁴⁷ Kaahamuusér uren ar Mungú nee múk Farisayo, mukduú doó kwasleemár ur kuri ateét tari oó', «Adór heewí ku laqaan a adoomá? Asma heewí layaá yaariir gi tlehhiit.

⁴⁸ Nee atén bura tawó mawaán, muu sleémeero gu haratlintii'. Nee múk Roma niri hardah, doorén kwí oo Doó Mungú kuri fee/, nee xooroorén kari waawuti'iima hayoh.»

⁴⁹ Heeko wák baraá tla/angw'ine, umuuwós a Kayafa, inós a kaahamusmoó úr oo Mungú kurkudae, ina oó', «Kuungá' gár ta baloó xua' i káhh,

⁵⁰ slám a aldakuta'aaká adór ir hariín heé wák iwa gwaai as daanduú muu, asma xooro sleémeero miwa qwát.»

⁵¹ Kayafa /aymuuwí inós kilós gwa ooiiká. Ala inós kurkudae a kaahamusmoó úr oo Mungú. Gawaá adoorihe axweesantós tí a aari adór Yesu ir gwaá' as daanduú xooroorí.

⁵² Ala as xooroorí kiloseeká. Nee tam as mukdá' Mungú gu haratlintií' baraá xoorduuwo nguwa burumburi as tawa wák tleehhiti.

⁵³ Iimír baldá' adór Yesu kur gaasi kari al'axweés.

⁵⁴ Gawaá adoorihe Yesu aa hi'imiitiiká malé alé ar geehhoeema baraá tla/ángw múk Yahudiro. Iri quútl amoodae, iri tláy bihhaá xaanxaay, ay dír gixsarka ta bay Efraimu, iri amoodá' wa hoót nee eeharuuseerose.

⁵⁵ Deelór ur ar Pasaáka ar múk Yahudi deeloodae aa naká/, nee múk yaariír niri tlatláy ayaaín wa ale, tari tsa/án Yerusalemu, qoomár deeloodár Pasaáka iwa xeeriiká, as tiwa hheehhe'eesiya'.

⁵⁶ Inooín Yesu kuri leelehhiít. Tawa baraá Doó Mungú wa sihhimiiti, tiri yaahamisiyé' tawa kaahi, «Xayshé', a adoomá, i hardihiikáhe baraá deeloorí ure?»

⁵⁷ Qoomaarihe kaahamuusér uren ar Mungú, nee múk Farisayo, hara'aya kaa qaroó oó', tawa kaahi, ‹Bar hee ngu xuu' dír i dirii'i, kaangw ngu huwi as kuwa oohár ay.»