Yohana 10 - Biblía Axweesantá Hhohho' ar Mungú 2004

Slaqsoó de'eemusmoó bee/aangw

¹ Yesu iri oó', «Án a kah, heé aa dahiiká ar afkú do' baraá matla/ángw bee/aangw, ala ina dáh ar amór hatlá', heedaádá' a fisusmo nee a heé muruú muu gu /uurúr hayohiím

² Heé afkú dó ar dáh a de'eemusmoó bee/aangw.

³ Heedaádá' afkú doó xuúm, afkú do' gu gweer dír heewihe. Nee bee/aangw afoorós gari axaas. Inós bee/aangós guri ateetín ar ume, nee sleémeero guri tsee/í duux.

⁴ Qoomár bee/aangós sleémeero burngu duuxún, gun geerahaar, nee bee/aangw iri eeharín, asma afoorós ga xuu'.

⁵ Bee/aangwí heé hatlá' gu baloó eehariiká, ala a gun ilagoow. Asma bee/aangwí afór múk hatlá' ga xuiiká.»

⁶ Yesu slaqsaywí guna dir'íní ar axweés. Ala inooín gídaabárós kaa tsaahhiiká.

Yesu a de'eemusmoó hhoó'

⁷ Yesu iri malé oó', «Án a kah, aníng an afkú doó bee/aangw.

⁸ Kudá' sleémeero naa hardihiye' qoomár án niwa hardihiiká, inooín a fisuuse nee a kudá' muruú /uurúr hayoohimá'. Ala bee/aangw gaa iiárií qaasiiká.

⁹ Aníng an afkú do'. Hee bira dáh ar aníng, i ba/án. Inós in darah nee in ti'imiit, nee /aymisi ga sláy.

¹⁰ Fisusmo gár nis hardihi a fiiso nee tsu/uta nee hhita. Án nina hardáh as slafiingw nguwa slaya', nee slafingwdá' iri kumamiit.

¹¹ «Aníng a de'eemusmoó hhoó'. De'eemusmoó hhoó' slafiingós gun duux as daanduú bee/aangw.

¹² Heé ta bu'un, barnaxes taweermo gwa ár, naa hardáh, in goow, bee/aangw guri geexáy, asma inós a de'eemusmoowooká, slám bee/aangw a koseeká. Taweermo bee/angwdá' gway uhín nee gway diyayaa/.

¹³ Heedaádá' ina goów as tawa heé ta bu'un, asma bee/aangw dirose a gaarooká.

¹⁴ Aníng a de'eemusmoó hhoó'. Aníng bee/angw'eé' u xuú', nee bee/angw'eé' aníng i xuu'.

¹⁵ Adoorí an adór Baabá aníng ir xui, nee adór aníng Baabá ngur xuu'. Aníng slafingw'eé' un duúx as daanduú bee/aangw.

¹⁶ Bee/ángw hatlá' sleeme u koóm, ala i baraá daqtiheeká. Bee/aangwí gár kuwa hariím a ngun huúw baraá daqtí alé. Inooín afor'eé' ngiri iiárií qaasiyá', aluuwo tari daqtá wák nee de'eemusmo tari wak.

¹⁷ «As adoorí Baabá aníng i slaa', asma slafingw'eé' un haniís as nguwa malé slaw.

¹⁸ Heé slafingw'eé' gu hingeés i kaahh. Ala a anuú kilá' un haniís. Aníng aleesleemu u koóm oo slafingw'eé' nguwa haniis. Nee slám aleesleemu u koóm oo nguwa malé slaw. Adoorí an adoodá' Baabuúeé' naa hara'ayín tlehhmuuwo.»

¹⁹ Múk Yahudi tiri malé partliít as axweesanaywí.

²⁰ Awa yaariir bahh'alé tari oín, «Heewí i neetlaamér kón, slám a slarhhamá. Ahaá, mus iiárií qamiindá'?»

²¹ Bahh'alé tari oín, «Axweesanaywí a axweesanoó heé neetlaamér koomaaká. Ahaá, neetlaame aleesleemu gu koónda oo taampu ngiwa ila' qaytsitisi?»

Yesu kuwa sií' nee múk Yahudi

²² Baraá Yerusalemuro deelór ur i deer ar inslaslángw aldafiimár Doó Mungú. Qoomaadá' a qoomár tsaaqwa.

²³ Qoomaadae Yesu ina baraá Doó Mungú wa hi'imiít, baraá matla/ángw Solomon.

²⁴ Múk Yahudi Yesu kuri harweér tari oó', «Kuúng atén ti daawitamamis ay xaylá? Kuúng barnaxes a Kristo, atén ti xu'utisa hhe'es.»

²⁵ Yesu iri oó', «Án kuungá' naa qaroó ádbáw, ala kuungá' án i ya/a/aanda'aaká. Gadiyeérí aníng ni tlehhiit ar umuú Baabuúeé', an tidá' aníng i lamabu'uum.

²⁶ Ala kuungá' a ya/a/aanda'aaká, asma kuungá' a kahhá' baraá tla/ángw bee/angw'eene.

²⁷ Bee/angw'eé' afor'eé' ga iiárií qamín. Aníng u xuú', nee inós aníng i eeharahaar.

²⁸ Aníng u slafíngw alhhe'eesay wásl i haniís, nee inós i baloó qwaariiká. Slám heé gu gawaá dakw'eé' wa hayóh i kaahh.

²⁹ Baabuúeé' oo bee/aangwí ngwa haniis, inós ku úr ta awa hatlá' sleémeerowo. Slám heé gu aleesláw hayooharo i kaahh gawaá dákw Baabuúeene.

³⁰ Aníng nee Baabá a wak.»

³¹ Múk Yahudi tlaa/e giri taataáhh malé alé as Yesu kuwa tlaquuti.

³² Yesu iri oó', «Gadiyér yaariir ar hho' nga laqaám, ar amór Baabá daahh. Gawaá adoorihe a gadiyeé gaalá ar aníng is tlaquta' ar tlaa/e?»

³³ Múk Yahudi iri oó', «Atén kuúng u tlaquutanaaká ar tlaa/e as gadiyér hho', ala gár us tlaquutaan as kuúng tawa Munguú /ooslisliin, nee as kuúng kilók tiwa Mungú tlehhit.»

³⁴ Yesu iri oó', «Ahaá, kaa gooínke baraá hara'ayár Mosewo tidá' Mungú iwa oó', ‹Kuungá' a mungui.›

³⁵ Atén a xuaán adór Gooi ir warqeeraaká baloó alé. Gawaá adoorihe, Mungú mukdá' aa axweesantós i haniís guna báy, ‹Kuungá' a mungui.›

³⁶ Ala anuúwí taa tsuúq nee Baabá, nee tiri ya/aáw baraá yaamu, kuungá' mis babeera', ‹Kuúng a Munguú /ooslisliín,› án bar kah, ‹Aníng a Garmoó Mungú?›

³⁷ Án bar gadiyér Baabuúeé' a tleehhaaká, án mi haratlintiaara'.

³⁸ Ala án bar gadiyeé aga tleéhh, ala án tim haratlintatia'aakahe, gadiyeédá' naa tleéhh na haratlintiaak. Asma kuungá' kawa xua' nee kawa tsahha' adór Baabá ir baraaeé', nee aníng tar baraá Baabá.»

³⁹ Loohi kari male leelehhiít ar kur oohi, ala iri dabaaín wa kotsoqoót.

⁴⁰ Yesu iri malé tláy ay gayuú Yordani, ay didár aáng Yohane iwa geerií baatimiís, iri amoodá' i deél.

⁴¹ Múk yaariír Yesu guri i daqáy tari oó', «Yohane layár aa tleéhh i mak káhh, ala tidá' sleémeero Yohane aa káh daanduú heewihe, ar ló'.»

⁴² Múk yaariír amoodaádae guri haratlintií'.