Yoeli 3 - Biblía Axweesantá Hhohho' ar Mungú 2004

Mungú xoordu gi sakwasleemuut

¹ AAKOÓ MUNGÚ i kaahi, «de'emadá' nee qoomaadá' hotaarír múk Yuda nee oo Yerusalemu bar warqeés,

² aníng xoordu sleémeero in burumbuúr, ngiri huúw ay baraá xatstá Yehoshafati, ngiri baraadá' wa sakwasleemuút, asma tlehhmi'iidá' naa tlehhaahhitiyé' dír múk'eé' oo Israeli, kuduú aalir'eé'. Asma inooín muk'eé' nguna diyaya/iyé' baraá tla/ángw xoordu, nee yaamuueé' ngiri ka'amisiyé'.

³ Inooín muk'eé' nguna tsawdoórí tleehhiyé'. Maamár garma kana haniís tawa bu'utuú tsaatuso'o. Maamár dasi ngina haniisiyé' as difaái ngiwa slaya'.»

⁴ «Kuungá' Tiro nee Sidoni, nee yaamu sleémeero awa Filisti, gár ta tlehhmuú wa sla'a' dir'eene a milá? Xáy, li/oó ta bu'utú sla'a' i deéro daandueene? Kuungá' li/aay bur bu'utuú wa sla'á', aníng li/aay ngu gaanslár buú'.

⁵ Asma peésar'eé' ana ar tleeré' nee sahaábueene nee muruueé' kuduú tlaxo urén una ar tleeré', kuri dahasé' baraá maraá munguihúng i alé.

⁶ Slamí múk Yuda nee oo Yerusalemu una weerisé' dír múk Yunani as kiwa loohatisa' amór saáw i alé dír yaamuine.

⁷ Ala daxta án muk'ee' ngun ki/ís as niwa ti'iitiya' amoodá' kuungá' ki weerisi'i, aníng li/ayhúng ngu gawaahúngí ki/ís, asma tidá' sleémeero taa inooín i tlehhé'.

⁸ Aníng daaqayhúng nee dasuuhúng i qaás baraá dabaá múk Yuda, as inooín kiwa weerisi dír múk Sheba, xoordaá saaw ló'wa alé. Anuú AAKOÓ MUNGÚ kaangwí una oó'.»

⁹ «Kaangwí ilaharisaak tla/ángw xoorduwo; ‹Ti amohhe'ese' slaqwarár hhohhoe, múk miguuse ateetaak, slaqwaruuserhúng burumburaak, nee i geerií kumiitiye'.

¹⁰ Kureemiihúng paangadu tiwa tlehhe', tsati'iihúng tlaatlahhasaak as kiwa lawlu tlehha'. Tam kudá' daqaatlaákw i ooi, Aníng a migusmo.

¹¹ Gaanslaay ar tlawaare', hardahaaré' kuungá' xoordu sleémeero, awa umuúqo barto, dinkwa i burumburiitaak.› » Aá AAKOÓ MUNGÚ, slaqwaruuseerók sleémeero ni didií /et.

¹² «Xoordu ti haraki/imisiye' ni gáwtí tsa/ane' amór xatstá Yehoshafati. Asma amoodae anuú AAKOÓ MUNGÚ an iwiít, as xoordaá bihhe sleémeero ngiwa sakwasleemuut.

¹³ Gimsé', tsati'i amohhe'eesaak, asma bu'uungw aa hamaár. Qwalaasé', dahé', tsoo/aak, asma xooslmoodá' ta sabiíbií tsoo/iti aa haáts nee daraami'iiwo, asma tlakweemá xoordu ki ló' wa ur, adór daraámu aa waa/.

¹⁴ Slaweemaá amaqawár yaariir i baraá xatstá kwasleema.» Asma Deelór AAKOÓ MUNGÚ naa naká/ baraá xatstá kwasleemaro.

¹⁵ Looa nee slahhaangw giwti gi ót, nee tsatse/ gwa/aateema gaa máy.

Mungú mukós gu tsuuq

¹⁶ AAKOÓ MUNGÚ ni amór Siyonír wa /orootl, afoorós kari axaas baraá Yerusalemu wá alé, doori nee yaamu niri daaraxatiyá'. Ala AAKOÓ MUNGÚ an dír mukós i gogowi, nee koo/ír gawit ar múk Israeli gwa harwet.

¹⁷ «Gawaá adoorihe kuungá' múk Israeli kay tsahhá' adór aníng AAKOÓ MUNGÚ tar Munguúhúng, oo baraá Siyonír hoót, tloomar'eé' ar hhoohhoo'. Yerusalemu iri hhoohhouúr, tam dahaayér waaraahh i baloó baraawós i datká.»

¹⁸ «Slám de'emaadae tlom'i difaáidá' tsuu' ngi taxmisiyá', nee ilwa nin gawaá dindirmaá wa wa/aminá', yau sleémeero awa Yuda ma'aywo nin hatsiyá', nee kutli nin baraá doó AAKOÓ MUNGÚ wa ti'ít, xatstá Shitimu gari eemís.»

¹⁹ «Misri iri taangu tleehhít, nee Edomu tari xaanxaay, asma /aytadá' taa múk Yuda i tleéhh, asma tseerdaá múk dakuús wásl ngina baraá yaamuuíní ku'uusiyé'.

²⁰ Ala baraá yaamaá Yudawo muu in hotaatín ay kureeraá kureér, nee baraá Yerusalemuro ta hotaatín ay qari sleémeero.

²¹ Aníng kudá' tseerdaá múk Yuda ngaa ku'usiye', in li/áy buú', slám kudá' naa dakuusiye' i mawaaká. Anuú AAKOÓ MUNGÚ an Siyonír hoót.»