Yoeli 2 - Biblía Axweesantá Hhohho' ar Mungú 2004

Ingigi: Gurbu'uungw as deelór AAKOÓ MUNGÚ

¹ Tarumbeéta ufaahhaak, gawaá tloomár Siyoniro, uui ilahariisaak, gawaá tlomar'eé' tidá' hhoohhoo', as yaamuloouusér Yuda sleémeero iwa daaraxat, asma deelór AAKOÓ MUNGÚ ni hardát, slám naa naká/.

² A deelór giwti nee gurhaami, deelór huunkáy nee ma/amí. Slawtá ur ar ingigi naa naká/, tlom'ii gi tuuntúk gay giwís. Gár adoorí kaa ariiká kureeriiwo iimír aange, slám ka baloó ariiká baraá qari sleémeero ar aluú wa hi'iita.

³ Adoodár asla ir /ayayiin, an adór ingigtí umuú gaaro ngir hhitiin. Amór aluuine kwaáo' yaamu asla gina /ák. Qoomár iwa hu'uká yaamu a adór Edeéni, alaá iwa hú', yaamu a adór xaanxaay. Gár /uw dir'ine i káhh.

⁴ Inós bar ga/eér a adór faras, in ti'i'iín adór farsuú slaqwarár áw.

⁵ Gawaá sagér tlom'iiwo in /akumít adór gaardaá slaqwara. Umuú gaaro gan /ák adór tsángw asla. Taa amohhe'és slaqwaraaro adór slaqwaruusér miguuse.

⁶ Dír geeraaine muu ina amooqwaár, gitsee/er'ín iri hhimaamí' daeero.

⁷ Nin adór miguusér wá haratlatlayá', koo/i ngin i tsa/aa/aná' adór múk slaqwara. Geera ngini kumiitiyé' umuúqo ingigimoowo loohirós, tam hhay'ín ngwa qwaareesi'iiká.

⁸ Tam oo kuqá' gu tliw/iím i kaahh, ala umuúqo ingigimoowo geera gini kumiit baraá loohirose. Nin haratleér ar /uuru ay amór xooslár inós kar il/an. Ala inós ka ilaa/iiká, tam oo loohirós ga mamáw i kaahh.

⁹ Gixsa gan haradát, iri gawaá koo/ír wa ti'i'iín. Iri gawaá maráy tsa/a/aán, iri baraá maráy darát ar pa/eeri adór fisuuse.

¹⁰ Yaamu in daraaxiyá' geeraine, doori in daraaxiyá', looa nee slahhaangw giwti giri ót, tsatse/ gwa/aateema gin máy.

¹¹ AAKOÓ MUNGÚ in tsee' ar afór ur dír geeraá slawtá slaqwaruuseerós wa alé. Asma slaqwaruuseerós ka ló'wa yaariir. Heé axweesantós ga boo/eemiís a pihhusmo. Deelór AAKOÓ MUNGÚ ka ur, slám i dae tláq. Heé deeloorí ga qiítl a heemá?

Hhu'u'umé'

¹² AAKOÓ MUNGÚ i kaahi, «Ala tam hamí, amor'eé' ki/aare' ar munerhúng sleémeero, nee ar gwaawito nee ar /aa/e, nee ar tsuunqumis.

¹³ Tlabaahúng mi feehhamisaara', ala munerhúng na warqeesaak.» AAKOÓ MUNGÚ, Munguúhúng, na i waya'aak, asma inós ku gurhhoó', slám i gurtleemuú kón, ku inslahheeká buhhtaawo, i haats sla'aarír warqawaakahe. Tam sakwasleemadá' aa oó', ga ya/án meemuwo.

¹⁴ Heé ga xuú' a heemá, dooqa i warqáy, nee nuri tsuuqawós i haniis, bu'úngw yaariír kuwa sleera'. Kuungá' ilahhooár puurú nee ar muruú wahaango, kari dír AAKOÓ MUNGÚ, Munguúhúngí hanisá'.

¹⁵ Gimsé', tarumbeéta ufaahhaak gawaá tloomár Siyoniro, muu ádbawaak i gwaawin. Dinku'uumár saaliingw ateetaak.

¹⁶ Muu burumburaare', dinku'uuma ka hhohhooeesá', bariise burumbuuraare', na/ii burumburaak tam kudá' du'uumá'. Garmoó aa duuxun ni hardihi, tam dasír taa duúx sleeme.

¹⁷ Kaahamuusér Mungú, tidá' AAKOÓ MUNGÚ sagadiyuus i /a/ qoomár tawa baraá Doó Mungú i dirii'i, tla/ángw afkú Doó Mungú nee kitángw ilahhooa kawa hanmaamisi, ta ooi, «AAKOÓ MUNGÚ, mukók maweek, gurtlaweek, ateéká aalirók mitiwa mureekeés nee mitiwa waaqaá'. Gár muu is ooi, ‹Munguúín i amá?› »

Aslabu'utá bu'uungw

¹⁸ Qoomaarí an qoomár AAKOÓ MUNGÚ da/i nguwa ot as yaamuuwós, mukós guri gurtláy.

¹⁹ AAKOÓ MUNGÚ iri mu/aywaáts, mukós guri báy, «Ga/aawaak, balaangw ngu haniís, nee difaái, nee di/i, kuungá' tari axá' muruuwihe, slám nu baloó mureekeesaaká baraá tla/ángw xoorduuwo.

²⁰ Slawtá ingigi tidá' /iikú daahh a saweés dirhunge, aníng ngiri guús baraá yaamaá xaanxaay nee deewa'ame. Daqtá geerií dirii' iri dát baraá tlawtá da/aáw, nee daqtá alií dirii' i dát baraá tlawtá /uwa, nee dixtir'ín nay tleér, tsutsuir'ín yaamu gay tsatát, asma muruú urén oo tlákw nguna tleehhiyé'.»

²¹ «Qámu, kuungá' ma da'ayumitaara', qwalaala/é' nee baraa/é', asma AAKOÓ MUNGÚ muruú urén gwaa tleéhh.

²² Ma da'ayumitaara', kuungá' makaá baraá xatso, asma qawór baraá xaanxaay naa harmá/. Xaai mamuuín ngaa laqwaliyé', /aantsí nee sabiíbu /ar'i ngaa slaslaaxiyé'.»

²³ «Qwalalaa/é', kuungá' múk Siyoni, AAKOÓ MUNGÚ, Munguúhúng saqwalala/aak, asma inós kuungá' nuna tluwoó buhareé i haniís ar afi qoomoó ganaá'. Tluwoó yaariír in tluuw, tluwoó buhaare, nee tluwoó saxi, adoodár kureeraá geera.

²⁴ Kitangwduú haritleemis in haats angaánowo, daraami'i nay milala/amitiyá' difaái nee di/ito.

²⁵ Aníng kureeridá' tunduwa balaangw /aa/aáy nee slawtadá' ur naa tleés, ar ingigi nee siisa nee naanagi nee karkari, aníng ngi aslabuú'.

²⁶ Kuungá' muruú /aymár yaariír un /agá', tay axá', umuú AAKOÓ MUNGÚ, Munguúhúng kuri xirfayeemisá', kudá' naa muruú waa/o/amór i tleehh. Nee muk'eé' kureeriwo ku malé mureekeesiiká.

²⁷ Kuungá' kay xuá' adór aníng nir baraá tla/ángw múk Israeli i dirií', nee adór aníng tar AAKOÓ MUNGÚ, Munguúhúng, slám oo hatlá' i kaahh. Nee muk'eé' kureeriwo ku malé mureekeesiiká.»

Deelór AAKOÓ MUNGÚ

²⁸ «Daqaní alaá tihe aníng muu sleémeero u hatsiís ar Qeeruueé'. Daaqayhúng nee dasuuwo tari aarirín. Bariiserhúng iri tlatiitiín, nee masoombarhúng iigu'utu guri aán.

²⁹ Tam sagadiyuuserhúng ar hhawaate nee ar /ameenaaro qoomaadae an Qeeruueéní haniís sleeme.»

³⁰ «Muruú waa/oo/amo án u laqaám gawaá dooriwo nee baraá yaamuwo. Muruuwí a tseere nee asla, nee quuír aa sihhit adór uhmo.

³¹ Tsee/amá kun warqees tay giwti, nee slahhaangw in tseere tleehhiit, dír deeloorí ur ar AAKOÓ MUNGÚ ar dae tlaaq nira hardatká.

³² Nee umuúqo heé umuú AAKOÓ MUNGÚ gwaa ateet, ku ba/amis. Asma gawaá tloomár Siyoniro nee baraá Yerusalemuwo múk ba/ám i deer. Nee baraá kuká' naa meetiye', awa AAKOÓ MUNGÚ i ateetin i dayá', adoodá' AAKOÓ MUNGÚ ngira oó'.»