Yoeli 1 - Biblía Axweesantá Hhohho' ar Mungú 2004

¹ Kaangwí an axweesantá AAKOÓ MUNGÚ, tidá' Yoeli garmoó Petueli aa axaás.

Tsuunqumis as hhitiru'uumár bu'uungw

² Iia qaasaak, kuungaá bariíse, iia qaasaak, kuungá' sleémeero awa yaamuloouusér Yuda! Xáy, kaangwí aqo deeruúti qoomarhunge, laqaá deeloodár baabi'iihunge?

³ Na/iihúng ádbawaak, na/iihúng na/ii'ín ngi ádbaye'. Nee na/ii'ín qartá hatlá' ngi ádbaye'.

⁴ Tidá' naanagi aa meetís baraá qamuuwo, ingigi gari /ák, nee tidá' taa meetiís nee ingigi kari /aáy nee siisa, nee tidá' taa meetiís nee siisa kari /aáy nee karkari.

⁵ Daarkité', kuungá' oonituúse, ta /a/á'. Uu'umiimé', kuungá' sleémeero awa difaáír xufá', asma sabiíbudá' ta difaáír /aben ar tlehhiiti /ayiyima gwaa fák.

⁶ Asma slawtá ingigi naa hú' gawaá yaamuueé' ale, i /uuruú koón, slám i faarór koondaaká. Sihhnaaín a adór sihhnaá direeri, hiindamaaín a adór kuqaá direeraá /ameena.

⁷ Sabiíbuueé' gwa hhitiín, /antsír'eé' gaa karslamaamís, tam qafo giri fíq, gay yaamií dáhh, nee haleemiiwós nay /awkukuyé'.

⁸ Tsuunqumisé', adór /amaatliito'ór guniyadu gaa tsit, as garmaadá' inós ga duxuút.

⁹ Ilahhooár puurú nee ilahhooár muruú wahaangw kaa amór saáw i kwaáhh, kaa huwiiká Doó AAKOÓ MUNGÚ, tam kaahamuusér Mungú, tidá' AAKOÓ MUNGÚ sagadiyuus, in tsuunqumís.

¹⁰ Qamu naa hhitruutiyé', yaamu i tsuunqumisiyá', asma balaangw aa hhitruút, nee sabiíbudá' ta difaáír ar tlehhiiti aa káh tam di/i i káhh sleeme.

¹¹ Muruuté', kuungá' doosluúse, kuungaásingá' sabiíbuú amohhe'eemisá', uué', as angaáno nee angaánooduú shayiíriro aa hhitiruút, asma bu'úngw baraá qamu aa qwaár.

¹² Sabiíbu aa /oóts, /antsí aa kamaa/arút. Xaa'aá ta bay komamaánga nee slaansla nee tofá'a, nee xaai sleémeero awa baraá qamu naa kahiyé', qwal/uú muu iri qwaár.

¹³ Guniyadu tsiitaak ta tsuunqumisá', kuungaásingaá kaahamuusér Mungú. /Aa/amiimé', kuungaásingaá sagadiyuusér kitángw ilahhooa. Tlawsé' baraá Doó Mungú, guniyadu tsiitaak, tsuunqumisé' xweera sleémeero. Asma ilahhooár balaangw nee ar muruú wahaango baraá Doó Munguhe aa fák.

¹⁴ Muu ádbawaak i gwaawin, dinku'uumár saaliingw ateetaak. Bariise nee yaamuloouuse sleémeero ar Yuda buruumburaak, ta tlay amór Doó AAKOÓ MUNGÚ, Munguúhúng, nee AAKOÓ MUNGÚ kuwa baraadá' wa ii/aa/amiinda', tawa kata',

¹⁵ Tsaxwaarén! Asma deelór AAKOÓ MUNGÚ naa naká/, ala ni hardát ar hhitár amór kuduú Aleesleemusmoó daahh.

¹⁶ Xáy, muruú /ayma aa qwaáriíke dír ilaarén wa alé? Tam qwala/ nee qaseengw naa qwaarií'iíke baraá Doó Munguúrene?

¹⁷ Dahaasiingw aa baraá hhapérí kufuút, meewedu naa deewaa/iyé', kuuntáy aa hhitiruumiít, asma balángw ta baraadí qaasi iwa kahhi.

¹⁸ Qaytsiít adór hikwa ir aahhamina'! Daqtá hikwa i tambeerús, asma gitso i káhh. Tam daqtá bee/aangw iri slahhá' sleeme.

¹⁹ Aá AAKOÓ MUNGÚ, án kuúng un i /aa/amiím, asma asla gitsór baraá darma gaa /ák, nee tsángw asla xaai sleémeero awa baraá qamu gaa faák.

²⁰ Tam makaá sla/a sleémeero un i /aa/aminá', asma ma'aá baraá yau naa kahiyé', nee asla gitsór baraá darma gaa fák.