YOBU 9 - Biblía Axweesantá Hhohho' ar Mungú 2004

¹ Aluuwo Yobu giri mu/aywaáts, iri oó',

² «Ar ló' aníng a xuú' adór ado tar tisíng, ala adór hee gan'amu ngur slay dír geeraá Munguhe.

³ Heé qiítl nee inós tiwa tlampa'aasiya' a heemá? Baraá yaahamisuú kumuwo oo inós i yaahasi heé yaahastá wák mu/aywatsto ga asláw a heemá?

⁴ Inós sagalooár yaariir ga kón, nee /uuruú yaariír gu kón, heé gu qiítl tlampa'aasaro nee iri baalín a heemá?

⁵ Inós tlom'i gin hingees dír nira kwisliti'iiká, giri fee/ ar xarasleemaá muneerós.

⁶ Inós yaamu gin dír kitangw'ín wa dingiis, uheemaá yaamu niri dingitiyá'.

⁷ Looa gan ilaa/ iri tsiirihhká, tsetse/ gun tuuntuuk miwa gwa/aát.

⁸ Inós kilós doori gina intláh nee gwaanduú ma'aay baraá tlawto guri xasltís.

⁹ Mungú tsatse/uú gawaá doori guna tleéhh kudá' ta bay Huyaa'a nee Orióni nee Kilimía nee tsatse/uú basko sleémeero.

¹⁰ Muruú urén oo xu'utiro ya/aamaaká guna tleéhh, muruú waa/oo/amo oo farooro ya/aamaaká guna tleéhh.

¹¹ In bihhieénár waaraahh u araaká, iri tláy amór i slai, tam án gár ni tsaahh i káhh.

¹² Gaarós ar i slai gan taataahh gari ar tláy, heé inós ilaa/aro gu aleesláw a heemá? Heé inós gu báw, «Ma tlehh,» a heemá?

¹³ Mungú bira buúhh ti il/aa/anká, makiito'oodár baraá ma'aay ta bay Rahabu nee alee/isuuseerose aqo nin dír geeraawósí xupuuiyá'.

¹⁴ Ala adór Mungú ngur mu/aywaats a adoomá? /Ayma'aá ni dírós i oo' dír ngiwa sláw a diimá?

¹⁵ Aníng tam a dakuúsár koomaakahe a aleeslawaaká Mungú nguwa mu/aywaats, gár ni aleeslaw aqo har Mungú sakwasleemusmooeé' un harhheehhe'eés as iwa gurtlay.

¹⁶ Tam u ateeta inós iri ooín a haratlintiaaká adór inós ir axamiís.

¹⁷ Inós aníng in puunduus ar gwaanduú ma'aay, inkaahhi'ieé' gin tawo dogiit.

¹⁸ I mayká tam hiinsla nguwa guu/, iga slahh'amaayeérár gaás.

¹⁹ Bar har qwaatlooro inós i ló'wa /uuruú kón, bar gan'amu leelehhtuuwo heé inós baraá kwasleemárí huwto gu qiítl a heemá?

²⁰ Aníng tam dakuús a koomakahe /aymi'iieé' awa kilá' inqo sakwasleemuutiyá'. Aníng tam tlakweemaá koomaakahe inós bira xuuxuú', aníng aqo tlakusmo.

²¹ Tlakweema i mak koomaaká, ala aníng ti gaárií xuaaká, slafingw'eé' u sla'aaká.

²² Mura' sleémeero i alqón, gawaá adoorihe anaá kah, Munguú múk hhó' nee oo tlakwe gin qororo'omaamiis.

²³ Tiqtír tlakw barnaxes muu gwaa tsú/, inós qatlór múk hhó' gan wa qasén.

²⁴ Yaamu bar múk tlákw gaa sa waawuti'ín, inós kwasleemuuse gan tsaahhár /iit. Barnaxes heé adoorí ga tlehhahhiít a inoseeká, kár ala a heemá daqaní?

²⁵ Deelór slafingw'eé' gaanslaay gun ar waaráhh heé ti'ii'iím ba/a, in gaanslár ti'ii'iín hhooeemaá ni araa'ar i kahhiyá'.

²⁶ Deelor'eé' i gaanslár waaráhh a adór meélír taa tleéhh ar daa'a, a adoodá' geenaangw tsiiamo ngur gaanslár na'aati.

²⁷ Án barnaxes aga oó', wa/a/ir'eé' a gunqaareés nee gurhaamir'eé' a alií qaás, nee niri qwalalaá/,

²⁸ tam adoorihe aníng slahh'amaayer'eé' a da'ayumiít, asma aníng a xuú' Mungú aníng aqo in tlakweemáy harafaar.

²⁹ Barnaxes aníng aqo tin tlakweemáy harafadiit, gár aníng nis tawo daawiimiit a milá?

³⁰ Aníng tam ti duuqa ar ma'aá hhohho' awa tlaa/aá tluwaay, nee tam dabaeé' i hhehhe'eesa ar saabuúni,

³¹ inós aníng aqo in /aytiis baraá bohóngw baa/ír koóm, tlabaaeé' awa kilá' aníng iri sa xinii'iyá'.

³² Mungú geera bar an heewo un mu/aywaáts, geeraawo u huúw dír geeraá kwasleema as qaa/ayrén kunguwa tsati.

³³ Ala heé tla/angwrén i dáh tam oo wák i kaahh, oo kwasleemár aníng nee Mungú ga tsaát.

³⁴ Mungú hhartós ngi har'oohi, nee aníng dae tlaquuwo i may.

³⁵ Daqaní aníng inós u da'ayuumitaaká nguwa ádbeemuú aw, asma aníng a xuú', gár nis daimiit i káhh.