YOBU 8 - Biblía Axweesantá Hhohho' ar Mungú 2004

¹ Aluuwo Bildadi kuduú Shuhitmo guri mu/aywaáts, iri oó',

² «Muruuwók kwisíng ku axweemaamis ay xaylá? Axweesantasír adór fur'ár duhhúm ka alkomkaakoon ay xaylá?

³ Kuúng ka xu' Mungú gan'amu gu warqeési? Laqaá Munguúdá' /uuruú koóm looeema gi warqeési?

⁴ Barnaxes na/iiwók Mungú nguna sadakuusiyé', inós bu'utuú dakuúsar'ín gun buu'.

⁵ Barnaxes kuúng Mungú uga leeléhh Munguúdá' /uuruú koóm kuri harhheehhe'és.

⁶ Nee barnaxes kuúng tu daba' hhohhó' nee an gan'amuú koón, geera Mungú ni hardah uri alee/iis, nee uri buu', uri diihhooarók i ki/is.

⁷ Kuúng tam aga hoti ar liitlakwe aluuwo kuúng an hót ar diihhooa.

⁸ Na'ás hota dír múk urén tiwa intsaatsahh, muruudá' múk urén aa sláy aldakuuteek.

⁹ Atén a múk lata'aáng, ma xuaán, slafingwrén baraakaá yaamuwo aqo mahhtuú waaraáhh.

¹⁰ Ala inooín kuúng u intsaahhatisiyá' nee muruudá' tinda sláy baraá sagalooar'ine kungu kuúng báy.

¹¹ Slarhhí niqo baloó ti'íta dír ma'aay iwa kahhiia? Laqaá tsawa niqo baloó yaamaá kaahaár wa ti'imaamítá?

¹² Tam tidá' na baraá yaamaá ma'áy wa ti'it, barnaxes ma'aay naa kahiyé', in tseewa kát dír tsata ngira eeriiká, a adór gitsór hatlaeeká.

¹³ Mukdá' sleémeero Mungú gu gunqareemiís an adoorír kilá' harahhifór múk Mungú gu haratlintatiaaká in payshút.

¹⁴ Haraxu'utir'ín in tawo tleehhít, harahhifor'ín a adór neewór hibaambi.

¹⁵ Dooín ngun i tlintii'iyá', ala gi baloó gáwtí oohiiká, ngun mak oohiyá', ala i baloó gawduyká.

¹⁶ Heé tlaákw a adór xa'anoó aa baraá tsee/amá wa slu/ubibin, oo haleemiiwós gaa baraá asalmoó wa tsiyayaax.

¹⁷ Dee/áruuwós tin baraá tsirxadaá tlaa/ér marmaar, iri baraá guruú tlaa/árí dah.

¹⁸ Bál dír kitaangose burkwa tuú/ tlaa/eedá' nguri sa tlaankiyá' nguri baya', ‹Atén kuúng unaqo baloó araaniiká.›

¹⁹ Adoosíng an adór qwal/uú heé tlaákw ir alhhe'eesuuti, múk hatlá' niri kitaangós wa iitláy.

²⁰ Qaytsiít, Mungú heé tlakweemaá koomaaká gu si'iiká. Sleemé múk tlákw gu alee/isiiká.

²¹ Ala kuúng u qwal/aas, afór qwala/ kari ar qaseseén.

²² Mukdá' kuúng ugwa aahh niri muruutiyá', maraá tlakuuse niri suquutiyá'.»