YOBU 7 - Biblía Axweesantá Hhohho' ar Mungú 2004

¹ «Hee in hoot ar ditsakwa gawaá daanduú yaamuwo. Deelór hotaawós a adór deelór heé bu'utuú tlaatla/ángw wák.

² Inós aqo adór lawaalmoó mahhtír ilaatleeruús. Laqaá adór sagadiyusmoó bu'utuuwós damaaraám ar haayi.

³ Aníng gár tira qáy a slahheeraá gaa wasl, xweeraá slahh'amaaye nee kuqá' tina haraxayé'.

⁴ Qoomár bar aga qaát an oo', ‹Xaylá karií tleér?› Asma xweera ki ló'wa tleer an gawaá qatanir'eé' wa warqaaqáw, looa ngari fiíq.

⁵ Slaqwte'eé' tsuma gaa gás, nee /ayma gaa ii dát, kaahartá slaqwtaeé' aa pu/umít, iri malhhartá um'aá tléhh.

⁶ Deelór slafingw'eé' in waaráhh ar gaanslaay, nee aníng harahhifo tam ar niiná a koomaaká.

⁷ Inslawiím, slafingw'eé' aqo adór hiinsluú tawo, hhooeema i baloó araaká.

⁸ Kuúng hamí aníng i ga/eér ala aluuwo i baloó aandaaká, birinda amor'eé' qaytsít gár ta aan a kahhaay.

⁹ Adoodá' huunki ir paysumaamit iri faakama hhe'és, an adór heé /eét baraá gi'i, oo ni waatlawaaká.

¹⁰ Heewí tlaáw i baloó ki/iiká amór mukós, nee mukós kudá' aáng inós gu xuú' gu baloó inslayká.

¹¹ Aasla'áy, án axweesanto a baloó xaslitaaká, aníng aga daa/atúw buhhtaawo. Naxooro slahh'amueé' u qununuú/ ar mune.

¹² Aníng a tláwto laqaá lewiatanidár baraá tláwto, iwa tsuwa xuumusmoó i qamiin?

¹³ Aníng bara oó', ‹Qatanir'eé' i hungu/ús, nee qatuueé' /ifor'eé' ga /aarees.›

¹⁴ Ala kuúng aníng in dae tsát ar tlata, nee in daanda feehhís ar iigu'utu.

¹⁵ Hám daxta a tsiní birta kilooeé' tareereé', a tsiní bara gwaá' ta tí tlakwe.

¹⁶ Aga slaaqaát, slafiingw u sla'aaká, aníng mawaaré', slafingw'eé' a adór hiinsluú tawo.

¹⁷ Hee a gár milá, mus sadaawimít, ahaá waáy muhar gár wa tsatsahhaán.

¹⁸ Kuúng umuúqo matlaatleero un qaytár eér, umuú qoomaaro un iiara'át.

¹⁹ A bihhií qaytsitkáhe tam adór niiná, tam har afiqoomár aníng tsuuqa ngiwa guu/.

²⁰ Barnaxes aníng tlakweema iga tleéhh, kuúnguú ga/aawusmoó muu gár u diits i deéro? Ahaá aníng misa tléhh, tawa adór gaangeeirók ar ta duqus? Baré aníng aga huwa tleehhiít diroge.

²¹ Ahaá baré dakuúsar'eé' a gurtlatleeraaká, nee tlakweemaaeé' mis hingeemamiská. Hamír kilae aníng ti qaatiis baraá /aanta, kuúng aníng iri leeléhh iri aandaaká.»