YOBU 6 - Biblía Axweesantá Hhohho' ar Mungú 2004

¹ Aluuwo Yobu Elifasi guri mu/aywaáts iri oó',

² «A tsiní geeraawo barnaxes daawitamer'eé' kaa xuuxuú', kari alqoomeés ar qoomaay, slahh'amuueé' sleémeero kuri amorqá' i tlampa'aas.

³ Asma slahh'amuuwí nee daawitameero geeraawo ki ló'wa ilo' ta hhasángw baraá afaá tlawto. An gár axweesanoó pooqi isa áy.

⁴ Ar ló' maheeraá Munguúdá' /uuruú koóm iga mutiyé', nee hhiintluueé' qarkuudá' guri sláy. Mungú iga ló'wa dae tsaát.

⁵ Ahaá, daqoó sla/a iqo aáhhi barnaxes gitso i deer? Laqaá awu iqo aahhamína bir baraá qawtantí dirii'?

⁶ Ahaá gár muskuu' diwi bir káhh /ayma gaqo ya/aánda? Laqaá wa'amír qanhhi iqo nuqnúqa?

⁷ Muruú /aymár adór kwisíng aníng u ilaatleerusaaká, a adór muruú /aymár aníng niwa xinaanii'.

⁸ Masók geeraawo firor'eé' kan iiaárií qaas, Mungú gadaádá' aníng ni slaa' ngiri haniis.

⁹ Masók geeraawo in ya/án, aníng iwa gaasi, dakós masók gun tlees aníng iri qwaarees.

¹⁰ Adoorí an gurkwa/asar'eé' ar aníng i qwal/atis baraá slahh'amuú adór kwihe. Asma aníng /ayma'aá Kudá' Hhoohhoó' iga satlaankiiká.

¹¹ Ala hamí /uuruú nir kumiit un koomaaká, gár nis kumiit hotaawo bar gár ni harahhifiit iqo káhh.

¹² Ahaá /uuru a adór kuquú tlaa/eéwo? Laqaá slaqwataeé' a muqslír sirdaa/aáte?

¹³ Ar ló' aníng kilooeé' alee/iisaro ti aleeslawaaká, dír alee/isaay nguwa slaw sleeme i káhh.

¹⁴ Heé hhiyaawós alee/iisaro gwaa sii' aqo adór heé Munguúdá' /uuruú koóm ilaiwa/ameero gwaa sii'.

¹⁵ Mulqer'eé' iga al/ák, adór duxér aa /oon.

¹⁶ Inooín a adór yaaér tlaangí aa ót, haandá' bar amooqá' wa ga/eér kwaáo i háts, ala laatí ka kaahaar.

¹⁷ Qoomár yaamu birna axwaanuyé', tlaangí in pu'út, yaae iri geehhouuwa hhe'és.

¹⁸ Aauuse in loohi qwát, barta ma'aá leelehhiit, tan baraá darmuú wa harweeraarín, tari baraadií qaatl.

¹⁹ Aauusér yaamaá Tema i ma'aá leelehhít, aauusér yaamaá Sheba i harahhifór koón ma'aay ngiwa slaya',

²⁰ Kin buhhtamis as harahhifór tawo, tan hardah duxeedá' tari qa/iimiit.

²¹ Kuungá' aqo adór duxeedá', slahh'amueé' una aandé' tari da'ayuté'.

²² Ahaá, aníng aga qoo oói, Aníng qawaaré', laqaá slukaaré' ar daqaari'iimarhúng!

²³ Laqaá, Tu/aaré' baraá dabaá wakusmoowo! Laqaá, Tu/aaré' baraá dabaá malgusmoowo!

²⁴ Aníng intsahhatisaré', aníng aqo xasliít, saga gwa/aatisaré', adór nira dakuús ooare'.

²⁵ Axweesantá ló' i /uuruú koón, ala iigahhamituuhúng gár i qwatsi a milá dir'eene?

²⁶ Kuungá' kawa xua' axweesani iigahhaataro a aleesleerá'a? Axweesantá heé aa diqay tsatiit aqo adór fur'a.

²⁷ Kuungá' bar ana qitlé' panaay kuwa tsuwa tlaxuunda', mulqerhúng ala bar sleeme an weeramisá'.

²⁸ Hám daxta áx án iiárií qaasaré', aníng kuungá' nu al/ayaaká.

²⁹ Na'asé', gimsé' daxta, tlakweema mindiwa kumitiyé', asma aníng a gan'amuú koóm.

³⁰ Kuungá' kawa xua' aníng a lamusmoówo? Laqaá kawa xua' aníng slahh'amu una tsaqiikáhe?»