YOBU 5 - Biblía Axweesantá Hhohho' ar Mungú 2004

¹ «Ateét gimáy, daxta áx heé ooiím i deéro? Baraá tla/ángw múk hhohhoe heé ta atet a gaalá?

² Ar tsuwa ló' heé daktani daawitame gu gás, nee heé baraawásl da/i gu hhaamís.

³ Daktantá aa slu/ubibiin ana ár, aníng hotaarirós ngari gaanslár lu'ús.

⁴ Na/iiwós i wayduú kon'aaká, kin dír doó kwasleemár wa baramaanuus, heé gi aleekalaá/ i kaahh.

⁵ Balaangós múk qwariít gun /aay, tam balángw baraá laqayií dirií' sleeme kun leehh. Ilatleeruuse daqaari'iimarós gari afér wa mahhaán.

⁶ Tlakweema a gár ta baraá hhapér wa slayká, tam slahh'amaaye sleeme i baraá hhapér wá ti'imitká.

⁷ Slahh'amu dír heé taa laqwaali a gár xu'utiit, aqo adór tsitór asla ir gáwtí /akumit.

⁸ Aníng geeraawo bar an kuunge aqo an amór Mungú i warqáw, kangw'eé' nguri dirós i máw.

⁹ Mungú an kudá' muruú urén tlehhiít, muruudá' hee aldakwto i aleeslayká. Inós sleeme an kudá' muruú waa/o/amór tlehhiít, kudá' farooro ya/aamaaká.

¹⁰ Inós an kudá' tluwoó huwahuúw baraá yaamu. Nee an kudá' qamu gi ma'áy wa/amiís.

¹¹ Múk liitlakwén gu /uurií dook nee kudá' tsuunqumiís gu waydií haniis.

¹² Kángw múk tlákw i qoomeemesi inós gu hhitín, as kahhó' baraá tlehhmi'ii'ine gár hhoo' makawa baloó sláy.

¹³ Fuquruuse gan uhín ar fuqurangw'ín oo kilá'. Qeeruú ta tlehhiiti inós gun xasltis ar wa'aá wák.

¹⁴ Inooín tlaatla/aango gár ni ara'ariya' a giwti, slám qoomár /ametleemuuwo tan dabár leelehhiit adór múk xweera.

¹⁵ Ala Mungú panaay gun ba/amis as munguwa tsu/iyé', narkuute gan dír dabaá múk /uuruú koóm wa wangexwaar.

¹⁶ Gawaá adoorihe, narkuute harahhifo ga koón, múk tlákw ku xasltis.

¹⁷ Heé amohhoó' a kudá' Mungú i naanaqan, gawaá adoorihe, naanaqtá Munguúdá' /uuruú koóm ma waaqa'aar.

¹⁸ Asma inós hee gun slahh'eemiis, slamí guri malé hubín baraá slahh'amuuwo, Inós hee gun muux guri hungu/uumiis.

¹⁹ Umuú daqto inós kuúng u ba/amis baraá slahh'amuwo, Tam slahh'amu ni sagáwa magá' wá ki/i a gaarooká.

²⁰ Qoomár qwarko inós kuúng u ba/amis baraá tsaxwaá gwa'araaro, Tam baraá slaqwarár hhamhhame inós kuúng uqo tuu/.

²¹ Mungú kuúng u baaq qoomár múk tlákw bur kaantin, tam hhita bura i hardát a baloó da'ayutká.

²² Qwanaay nee giyeé kuúng in waaqaseén tam makaá xaraaslá' awa sla/a kuúng i da'ayutká.

²³ Tlaa/aá baraá qaymo kuúng u baloó ila/iaaká, makaá xaraaslá' awa baraá sla/a nee kuúng an alhotá' ar wayda.

²⁴ Kuúng an baraá do'ók wa hót ar saxareema, muruú baraá matla/ángw do'ók bura xuxuár eér, aqo in sleémeeró wá deer.

²⁵ Na/aá yaariir kuúng in sleér, nee xwaylarók in ló'wa tláhh adór xwaylár hibaambi

²⁶ Kuúng an hotaatiín, diimaay uri daahh, aqo adoodá' balaangw ir hamdaaditi kway buu'.

²⁷ Kaangwí atén ugwa tsee/aarimaán, slám a looeema. Gimáy, iiárií qaaseek, tsaahheek as kahhó' hhooeema kiwa sleer.»