YOBU 42 - Biblía Axweesantá Hhohho' ar Mungú 2004

¹ Aluuwo Yobu AAKOÓ MUNGÚ guri mu/aywaáts guri báy,

² «Aníng a xuú' adór kuúng umuú gaaro kar aleesleér, nee umuú gár taa tleehhár wa sla'a ka baqiiká.

³ Kuúng ina beér, ‹Heewí a heemá oo axweesante'eé' ga gaamiís ar axweesanoó sagawasle?› Gám ar ló' aníng gár naa axweés a tsuwa xuaaká, muruú waa/oo/amo dir'eene oo xu'utiro ni baloó aleeslawaaká.

⁴ Kuúng ina beér, ‹iiárií qaasáng aníng ni axweés, Aníng kuúng u yaahaás, daqaní kuúng axweesante'eé' tí ngi tláxw.›

⁵ Aníng kangók ugwa axamiís iaeene. Ala hamí kuúng una ár ar ilaeé' awa kilá'.

⁶ Gawaá adoorihe aníng taa kilooeé' aáhh. Aníng aga ya/a/aám, da/ara nee teeriro i gawaaéní qaás.»

Alhhe'eesaywo

⁷ AAKOÓ MUNGÚ iwa hhe'eés axweesantá dír Yobuwo, Elifási kuduú Temanmo guri báy, «Aníng muuna iga ló'wa gaás as kuúng nee hhaeewók kudá' tsár, asma axweesantá ganaa' aga axwesi'iiká daanduueene ar adór tidár sagadiyusmooeé' Yobu, ira axweés.

⁸ Gawaá adoorihe awér faanqw slawaak nee gwaandaawér faanqwe, daqaní ta tleerá' amór sagadiyusmooeé' Yobu hikwaasíng ki ilahhooár da/a/ángw wá hanisá', as daandeemoohúng, Yobu kuungá' nu aleefirin, aníng firoorós a ya/aám, as kahhó' kuungá' munduwa alsihhiít as daktu'umarhúng tisíng, asma looeema iga kati'iiká daanduueene adoodár sagadiyusmooeé' Yobu ira axweés.»

⁹ Naagáy Elifasi kuduú Temanmo nee Bildadi kuduú Shuhitmo nee Sofari kuduú Na'amatmo nari tlayé', adoodá' AAKOÓ MUNGÚ nga báy ngari tleehhiyé', AAKOÓ MUNGÚ alefirór Yobu gari ya/án.

¹⁰ Alaá Yobu mukdá' nguwa hhe'eés aleefirooro, AAKOÓ MUNGÚ Yobu guri adoodár aángí ki/ís, guri muruuwósí ki/ís sleémeero kuduú aáng ba/a sagáwa tsár wa ale.

¹¹ Aluuwo Yobu hhaeewós awa daaqaay nee awa dasuuwo, nguri i daqayé' nee mulqeerose. Mukdá' aáng Yobu gu xuú' tari amór do'ós i daqáy, tari al/ayín, nguri gurkwa/amisiyé' as slahh'amudá' yaariír aa sláy oo AAKOÓ MUNGÚ aa dirós i huúw. Umuú heewo muqslidár peésa gana haniís nee mungoó wák oo sahaábuwo.

¹² AAKOÓ MUNGÚ hotaá Yobu kukaá alu gina ak tsuúq ta kudaá geeraawo. Bee/ángw Yobu tari kume mibaá nee tsiyáhh, angamiarós a kume lahhoó', hikwa ngi kon kume tsár, nee daqwaayér /ameena a kumuú wák.

¹³ Na/iiwós awa daaqaay a faanqw, nee dasuuwós a tám.

¹⁴ Dasirós ar ur umuuwós a Yemima, nee ar tsár a Kesia, nee ar tám umuuwós a Keren-hapuki.

¹⁵ Baraá ayaadae dasuú hhohhó' oo slaqamís nee dasuú Yobu i kaahh, baabuuín Yobu giri aalírí haniís adór hhaeeín awa daaqáy wá ale.

¹⁶ Alaá kaangwihe Yobu iri hoót ay kureeri tsiiruú wák nee mibeeri tsiyáhh, inós nángw naangós oo sagáwa tsiyáhh guri ár.

¹⁷ Yobu iri gwaá', inós a aakoó kureeraá yaariir.