YOBU 41 - Biblía Axweesantá Hhohho' ar Mungú 2004

¹ «Xáy, kuúng makiito'oodá' ta bay Lewiatani ooharo a aleesleéra ar baratsufaay? Laqaá kawa afaa tsek ar hima a aleesleéra?

² Kuúng fooxár duungaawós aqo himií qása? Laqaá taqeesamoowós kuwa tsek u aleesleéra?

³ Kuúng bara ga/eér unqo beera, ‹Na'ás, án geemawáng?› nee unqo axweesanoó fur'ár tsáií húba?

⁴ Kuúng bara ga/eér unqo alqadoórí tléhha? Unqo ilawaali'íta ay kureeraá kureér?

⁵ Kuúng anqo adór tsir/ír wá harneetór eéra? Laqaá anqo tséga ar hima kari harnét nee sagadiyuusér do'ók ar dasu.

⁶ Kuúng kawa ga/eer, múk siyó ohaahiím tlaxoorós ngin qo qwaatliía? Múk halaanu'uumár tlehhahhiít gan qo fu'unaay qasmiísi?

⁷ Xáy kaahartós aqo fooxísa ar laqwáy, laqaá sagós unqo gása ar lawaaladá' ta siyór ohahiin.

⁸ Áx kwatiiteek kuúng bar hhapká baraaqo waakiki/ká! Axáy a baloó kí/a kwatiitaro?

⁹ Umuúqo heé Lewiatani gaa ari hor/i gun eér iri gáwtá wá huu'.

¹⁰ Hee tam i xaraasli makiito'oorí ga baloó kwatitiiká. A heemá alók daxta heé geeraaeene sihhtano ga qiítl?

¹¹ Heé aníng naa kiriík a heemá as nguwa aluúwaá buu'? Umuúqo gár baraakaá yaamuwo dáw a te'eé'.

¹² «Aníng daanduú makiito'oorí u mawaaká kaahango, tam /uuruuwós nee tlehhma'aá hhooariirós i mawaaká kaahango.

¹³ Heé kaahartós tidár daanduú gawa hingeesaro ga asláw? Laqaá heé kaahartós tidá' gawit adór gaambór wa ale ga fooxiís?

¹⁴ Heé afkós taqeesaro gu asláw a heemá? Asma sihhnaawós umuú barto i de'e tlaaqiyá'.

¹⁵ Daanduuwós gár kura tleéhh a darqeefaá gawden, darqeefoodá nina naga'amitiyé' kwaáo' kina naga'amiís ar boohhayaangw.

¹⁶ Adoodá' tira naga'amiisiyé' tam dír tsiiriihh i káhh ar fur'a ir ot.

¹⁷ Kina dinkwárí nigihhitís, tam ar wák kawa tu/ dír tiqae heé ga asláw i kaahh.

¹⁸ Bira /ifiít gwa/aateema nin ti'iitiyá', ilaawós i mitsiihhiyá' adór looár tsirariihh.

¹⁹ Gil'ór asla in baraá afkós wá ti'imít, nee tsitór asla in tsee/ií /akumít.

²⁰ Quuír yaariír baraá foxaá dungaawós ngin wa ti'imít adór wahamuú hutloó aa daahh, laqaá adór tsaaroó taa daá/.

²¹ Hiinsluuwós xaawo gan oohiis, tsángw asla in baraá afkós wa ti'imiit.

²² Istós gana dalá/, /uurií koon maweek, umuú heé gaa ari biririqaywo in gáwtí gwaa'.

²³ Inós kana fu'unay kininihhahhín, ki gawden adór muqslír wa ale sleeme i diingina'aaká.

²⁴ Guruuwós a tlaa/a i da'ayumamitká. Ku gawít adór tlaa/ár xoosliingw.

²⁵ Inós birna ti'ít tam mukdá' aaiím atén a mungui nin gáwtí qatliyá' de'eero, sleémeero ti kilooín faakiyá' as de'e.

²⁶ Hee tam ngi tlaqiisi ar paánga, inós ga nor'osiiká, tam lawaala ga fooxiská nee mahaango nee símeero.

²⁷ Lawaala dirose a gitsiimi, tam muqslír sirdaa/aat a adór xa'anoó aa slupuut.

²⁸ Mahángw i ilaagop i kaahh, tlaa/ano bura tsaxát ar kuukumaayi a adór muundáy kuna amoorós i hariitleés.

²⁹ Guhhli'i dirose a adór suwaroó hhaansla, inós barka duqmiis nee muu ar lawlaá yaariir in hhaán qaseengo.

³⁰ Kaahartá guruuwós a adór gár taa tleéhh ar qaambesamá xaslasla'á', yaamu gin xísl giri tu/uún adór xooslmoó ta balángwár motkaakiti.

³¹ /Ur/uri ngin baraá tláwtá wa dúx adór ma'aá naa dahhiyé', tlawi nari /ur/urít adór hutloó di/i iwa dahhmiin.

³² Dír inós ira waaráhh in gwa/át aluuwós wá ale, sloorór /awak ngin dúx baraá tlawtá wá ale, hee sloororí bir ngaa ár al/awtani gari baraá tláwtí xuruut.

³³ Baraá yaamuwo makiito'ór nee inós slaqás i káhh ar taa tleéhh ar de'e wasl.

³⁴ Umuú gár ur birnga aán gan waaqá', inós an waawutmoó daara/uuse sleémeero.»