YOBU 40 - Biblía Axweesantá Hhohho' ar Mungú 2004

¹ AAKOÓ MUNGÚ iri kumiít iwa axweesi dír Yobu.

² «Kuúdá' múk gur/aáy as tlakweemaaín kiwa tsahh nee Munguú Aleesleemusmo ti tlaampa'asá'a. Kuúngudá' axweesante'eé' tlaxuúm, anuú Mungú mu/aywatsáng.»

³ Aluuwo Yobu Mungú guri báy,

⁴ «Aníng a daktantá tawo, gár u baw a milá? Aníng afkwe'eé' ugwa tseék, a sangw gaa ooaaká.

⁵ Hamí aga ilawaáts ala a ki/aaká ilawatsto. Aga male kií/ wa'aá tsare ala a kumiitaaká.»

⁶ AAKOÓ MUNGÚ iri axweés ar baraá bambaao, iri oó',

⁷ «/Aátl adór hhawaatúwá ale, Aníng kuúng u yaahamiís, nee kuúng axweesante'eé' tí tlaxwang.

⁸ Kuúng kwasleemar'eé' gaasaro aqo asleéra? Áx dír aníng niwa dakuús ngi qoo sleéra nee ar kuúng tawa gana'?

⁹ Ahaá kuúng /uuruú adór kwe'eé' kwí uqo koónda? Afoorók kawa adór te'eé' wá kududuhus a asleéra?

¹⁰ Bar asleér gimáy xirfuuwók laqaamang nee uraywoge, ilaiwa/ame nee aleesleemuuwoge laqaamang.

¹¹ Gimáy, muu xarasleemaá buhhtaawók ngu al'iwitiye', umuúqo heé daara/aama i qaytsiteek ku dáhh yaamií ale.

¹² Umuúqo heé daara/aama i qaytsiteek ku gáwtá wá dáhh, múk tlákw yaamaá hara kalaa/eek didaadá' i dirii'iia.

¹³ Sleémeero tipeek baraá hhape, inooín sleémeero lu/eek baraá yaamu.

¹⁴ Daqaní aníng kuúng ugwa tsaáhh, adór /uuruuwoge tara baaliín.

¹⁵ Áx makiito'oodá' ta bay Behemoti i qaytsiteek, inós una tleéhh adoodár kuúng ura tleéhh. Inós gitso gan adór slér wá /aay.

¹⁶ Ala xáy /uuru nguwa koon a har adoomá? Nee waatlaarmaá baraá guruuwós, xáy /uuru nguwa kona' a idoomá?

¹⁷ Ala hhayshoowós biringa galaalá' a adór xa'anoó sahhti, nee waatlaarmaá ya'aawós kina nigihhitís.

¹⁸ Faduuwós a adór bombadaá muqslár sirda/aten, diqiyaawós a adór sihhteraá muqsli.

¹⁹ «Makiito'oorí ar geera baraá makaá naa tleehhi awa waa/oo/amór kooma'a. Heé ga baál a har anínguwí oo Tleehharusmoowós.

²⁰ Tlom'i muruú /aymaarós ngun duxuná', an dír makaay sleémeero awa sla/a niwa qwalee/ina'.

²¹ In qát baraá gamuú xa'anoó laqayaá koóm, iri nahhát baraá daa'a didá' buunqa iwa deér?

²² Kiintuú giíw gan luu/ ar mahhátuuwós, tam kinte'eeridá' na afaá yaaér wa ti'iitiye' ngiri tuuntuukiyá'.

²³ Yaae birna wá/ inós i kwislimitká, inós i kware'ká tam yaaér Yordani i gawaá afkós i wa/a.

²⁴ Heé ilaawós tsu/utaro gi aleesláw, inós gari oh a heemá? Laqaá heé duungawós gi óh tsaaxweeliro?