YOBU 4 - Biblía Axweesantá Hhohho' ar Mungú 2004

Wa'aá geera awa Yobu nee mulqeerós tiwa axweesani tlaxuné'

¹ Aluuwo Elifasi kudaáduú Temanmo, guri mu/aywaáts, iri oó',

² «Barnaxes aníng naa amoorógií ilaawaáts, kuúng tu hhoóe? Gimáy, aníng slamí xasliita a aleeslawaaká.

³ Ga/aaweek, kuúng múk yaariír ugwa intsaahhatís, nee kudá' daqe tlakwen iga alee/iimís.

⁴ Axweesantók múk aa dukuuts guna sihhtís nee oo aa diqay tsatimiit gwaa gurkwa/amís.

⁵ Ala hám daxta kangwdá' kuúng ugwa sláy, nee kuúng qitla ugwa harslaaqát, ugwa kwatiít tari amooqwát.

⁶ Ahaá, harahhifoorók a Mungú kuwa ilawawá/ke? Gan'amuuwók an gár kuúng taa haraahhífke?

⁷ Hám bara tlaampa'ás amorqí ale heé gan'amuú koóm oo aa qwaar i deéro? Laqaá múk hota ganaá' kwaaqo baloó sí'i.

⁸ Adór aníng ngir xua, heé baraá slafiingose tlakweema nee muruú slasla/arén tleehhaahhiít, gár i slay baraá slafiingose aqo muruusuú kilá'.

⁹ Mungú gin qwaarees ar hiinsluuwós, Mungú gin qororo'oos ar buhhtaawós.

¹⁰ Múk tlákw tam ta adór dirángw wa /orootli, Mungú giqo taqeesama' giqáy, giri xasltis.

¹¹ Dirángw /uuruú koóm bar sluqo gaa dakuús, aqo in gwaa'. Na/iiwós niri tsiyayaxaatiyá'.

¹² Looarka wake /aymuuko kunguna oó' ar naaqo, iaaeene una axaás kuwa saasahhan.

¹³ Xweerawo qoomár niwa baraá tlatáy dirii', qoomár muu sleémeero gu'utér ilo' nguwa ohahiin,

¹⁴ hor/i nee daaraxaay ina ayé', slaqwtaeé' iri kángw kilá' wa daaraxát

¹⁵ Marara'amoó fur'a ina gawaá gitsa/eénár waaraáhh, se'éngw slaqwtaeé' iri sihhiít.

¹⁶ Gár xuaawasl ina dír geeraaeéní sihhít, ana mak ilií kiririhhiím, ala aga tsaahhiiká. Hhaantamo i mak dír geeraeéní dirii', yaamu naa xasliitiyé', aluuwo afo ngiri axaás, i kat,

¹⁷ ‹Heé qoo gwaá', gan'amú kuquú Mungú ba/a guqo kóna? Dír geeraá Tleehharusmowo, hee kuqo xaslxaansli wásle?

¹⁸ Mungú tam sagadiyuuseerós sleeme gan harahhiifiká, tam sleeme dakuusár malaykeerós gan tsatsahhán.

¹⁹ Ala daxta dír heé taa tleehhi ar baa/í mi máy, Inooín dír kiwa iihhaáf a baraá baa/í, Múk naanaga iqo hifuur.

²⁰ Hee slafiingós oo qoomár niina bira sa kahhuút, sleeme ku baloó inslayká.

²¹ Barnaxes gadaádá' slafiingós gu taami koom aa tsatít, hee aqo in gwaa', tam sagalooa ga konká.› »