YOBU 39 - Biblía Axweesantá Hhohho' ar Mungú 2004

¹ «Kuúng qoomár tsagni i laqwalaaliin a xúa? Laqaá qoomár saaragi i laqwalaaliin a xúa?

² Inooín slahheeraá tsiihaay ngu loohisiya' a magá'? Laqaá baalár xwaylar'ín a xúa?

³ Qoomár iwa gurtiq xwaylaro iri qát a xúa? Qoomár na/ii'ín ngi laqwlaalina' a xúa?

⁴ Na/ii'ín kudá' nin baraá darmú wá uraarayá', nari tleemaaiyá' sleeme i dír amuuínií wayayaiiaaká.

⁵ «Heé daqoó aa nariis gwa geemay ar amohhooa a heemá? Heedaádá' a heemá oo himuuwós gwaa gweer guri tawo máy?

⁶ Aníng darma una dirósí haniís tawa adór do'ós oo i hooti, nee xatsaá hharkír koomá' ina haniís dirósí ale tawa wa/aamér hotaawós.

⁷ Inós wa/aameedár waarangír muu i diri' gan waaqaseesén. Axweesanoó heedaádá' gu de'eém gu axamiisiiká.

⁸ Tlom'i gin alhi'iimiit as tawa qawtantós, as gár naa/ ngiwa leelehhiiti.

⁹ «Xáy saree/a i ya/aánda uwa sagadiyus? Laqaá qatuú baraá slumtá do'ók gu ya/aánda?

¹⁰ Xáy, a aleesleéra ar wák kawa himúr tsek kari ar dósl? Laqaá inós i ya/aánda kurmo nguwa ar dosl?

¹¹ /Uuruuwós kudá' yaariír u haraaeéra baraá gadiyeéroge? Laqaá gadiyér gawit ar uwa tu/ i deéro?

¹² Xáy i ya/aánda saree/a kawa harahhif qoomár bar balaangók u loohís amór do', nee guqo húba dír afeenír balaangw muxta?

¹³ «Sakweeli hhampe'eeriwós gin puupuxús ar daara/aangw, ala i adór qunqaál wá gáwtí tleeraaká.

¹⁴ Inós in yaamií qanhhús, qanhhaadá' axwnáy guri slasleér baraá hhasángw wá ale.

¹⁵ Ga insleeraká adór aluuwo ngir kala/aán laqaá ga tsahhká adór kar hhaamisi nee makaá sla/a.

¹⁶ Sakweeli na/iiwós gin tlehhmuú tlií/í tlehhaahhít, tam slahh'amuú xwayla ngwaa /aa/agi ala inós na/iiwós gi hhaslitká.

¹⁷ Asma Anuú Mungú inós ngiwa tleéhh aga sagalooárí haniisiiká, tam fuqurángw niiná gwaa sleeriiká.

¹⁸ Ala qoomár ti'ii'iingw bar ngwa iimu/uún, faraási nee heedaádá' ga madiita gin bá/ tam daanduuwós ku ariiká.

¹⁹ «Aá Yóbu, heé faraási gaa /uurií tleehh an kuúnge? Heé dartadár gawaá istós gaa tleehh an kuúnge?

²⁰ /Uuruudá' ir gáwtí /akumaamit adór tsaxwáy wá ale heé gwa haniis an kuúnge? Asma aahhoorós tidár daara/aangw muu gun de'e tsát.

²¹ Yaamu gin taariín as iwa narís, iri amór slaqwarárí ta'aaiín ar /uuruuwós sleémeero.

²² Inós de'e ga xu'uká, sleeme i kwislimitká, tam sleeme paángaro i baabaqaská.

²³ Gawaá daanduuwose tlaangasuú slaqwaruuse in tawo xosloeelín, nee lawlaá slaqwaruuse in mitsiihhiyá' tsee/amango.

²⁴ Faraási in kumít baraá slaqwaraaro ar xarasleema nee buhhta, tam afór tarumbeéta ar ta ufaáhh as gurbua sleeme ga ila/ká.

²⁵ Qoomár afór tarumbeéta birnga axás, inós in amoodií áhh, slaqwara gan amór sáwií tsá', Afór geeraharuusér slaqwara gan axamís qoomár bir tseeaminá' as iwa hara'ayár oina'.

²⁶ «Xáy, kuuraay iwa gáwtií tláy ar hhaampe'eeri, kuúng una sagalooarí hanísi? Hhaampe'eeriwós giri gana'aas iri báskwií hi'iit.

²⁷ Xáy, kuúng an heé gwareesi ga ádbáwa iwa hhaampe'eerír tleer? Do'ós guri tléhh gawaá ságw tlooma.

²⁸ Do'ós gun tléhh gawaá ságw tlaa/ár tleer, tsitsantá tleer ar tlaa/a an koo/irós ar gawit.

²⁹ Gawaá ságw tlaa/a gin wa qaytsít as gár i ot ngiwa aan, ilaawós gaa ngin amór saáwá ariyá'.

³⁰ Na/iiwós tseere ngin du'uná', nee didá' tuua i diri' an dír gwareesi i diri'.»