YOBU 38 - Biblía Axweesantá Hhohho' ar Mungú 2004

Mungú Yobu nguwa mu/aywaáts

¹ Aluuwo AAKOÓ MUNGÚ Yobu guri mu/aywaáts ar baraá bambaao, iri oó',

² «Heewí a heemá axweesante'eé' ga gaamiís ar axweesanoó fuquraángw koomaaká?

³ Gím, siinootiím adór hhawaatuú wá ale, daqanirkó axweesante'eé' tí ngi tláxw.

⁴ Kuúng dír ti diri' a diimá qoomár aníng niwa yaamaá iihhafiim? Ooang gimáy qoomaadae bar muruú xú'.

⁵ Heé uraywós gwa qoomees án ngi slaá' u xú', laqaá heé hima gwa uuruux gawaawós ár ale as qoomesa?

⁶ Iihhafiirír yaamu dír ki qaás a gawaá milá? Laqaá heé tla/anoodá' úr oo do' ir gawduy gwaa qaas?

⁷ Qoomaadá' tsatse/uú matlaatle iwa daá' dinkwár wá ale, nee na/aá Mungú niwa tseeaminé' ar qwala/.

⁸ «Heé tlawi ga digmuwós i qaas a heemá qoomár birna baraá iloowós wá /ur/urít.

⁹ Aníng an heé tlawi gaa untsuús ar huunkáy ngari harweér ar ma/ami.

¹⁰ Tlawi ana digmuuwós i qaás, ngari tseék ar yaamaá kaahaar awa na baraá tla/ángw tláwtí dahiye'.

¹¹ Ngari báw, ‹Alhhe'eesaywók a diirí, ma waarahhaar, gwaanduuwók kudá' birna haratláy alhhe'eesaywós a diirí.›

¹² Ahaá, kuúng looár wake tsee/amá ugwa beéri, ‹Tsiiriihháng?› Nee qoomár birna ti'iít amór i dahmaá ay aga laqaándi?

¹³ As kahhó' tsee/amá badu sleémeero awa yaamu ngiwa al'oohi, nee múk tlákw nguwa kwahhi baraá yaamuwo.

¹⁴ Yaamu nin warqayá' kaloó adór kuquú tlawu nguri slayá', iri warqayá' adór xooslár tleei ar taa daá/.

¹⁵ Múk tlákw ku gwa/aateemaá /iit, nee daber'ín ar naa tleesiyé' as tlakweema tlehhit kan giqáy.

¹⁶ «Ahaá, looár wake aga hi'iimíti baraá tsinqaá tlawtá wá ale? Nee hi'iitanór baraá guruú tlawi aga iiádi?

¹⁷ Afkú gwa'ara kunga dirógí laqáni? Laqaá kangarmoduú afkú gi'ií dirií' ugwa aándi?

¹⁸ Yaamuuká' uraywo a har adoomá, i xúa? Muruuwí sleémeero bur xú', axweesante'eé' tí tlaxwang.

¹⁹ «Loohír amór hotaá gwa/aateemaá kaw a gaalá? Nee iimu/úngw giwti a diimá?

²⁰ Wa/amér ni hootiya' bar xú' laalaqaaseek amoodá' ni hootiya' nee ki watlís amór maray'ín.

²¹ Kuúng hotaaín i xú' yeé! Asma kuúng tuwa laqwaál a qoomaadár kilá' inooín kiwa tlehhiiti, nee kuúng adoosíng ti diri' a heé aa /aatl.

²² «Kuúng looár wake aga dáti baraá kuuntír tlaa/aá tluwaay, laqaá baraá kuuntír tlaa/aá tluwaay,

²³ qaasidá' naa amoohhe'eés as deelór tlaahhi, an deelór slaqwara nee ni gilár daamaraam.

²⁴ Loohír tar hardararahi didá' gwa/aateema kiwa amslaasliti a gaalá? Nee didá' fur'ár da/aá daahh kawa yaamií diyaa/i a diima?

²⁵ «Heedaádá' loohír tluwaay gaa tleehh gawaá huunkayhe a heemá? Nee heé loohír mankari gaa tleehh gawaá huunkayhe a heemá?

²⁶ Tluwaay nguri aweeriís didá' muu iwa kahhi, tluwaay iri tluuw baraá xaanxaay dír muu i hootiiká.

²⁷ As kahhó' yaamuudá' na qor'otiyé' ngiwa wanana'aasi, gitsór wanaanaa' ngiri baraá yaamuú wá duux.

²⁸ Xáy, tluwaay i baabuú kóna? Laqaá gár hara' ngu laqwlaaliim a milá?

²⁹ Ahaá, aayór tlaa/aá nga xwayluur a gaalá? Nee heé tlaa/aá tluwaay nga laqwaal a heemá?

³⁰ Muruudá' ma'aay gi warqeés tari tlaa/e. Nee ma'aá tlawi nari naga'atiyá'.

³¹ «Kuúng tsatse/uudá' ta bay Kilimia tseegaro u aleesleéra? Laqaá tsatse/eedá' ta bay Orioní him'eerós sololo'oosaro a aleesleéra?

³² Tsatse/uudá' ta bay Sayari geeraharto u aleesleéra ar qomi'ii'ín? Laqaá tsatse/uú ta bay Huyaa'a u aleesleéra kuwa geerahat?

³³ Dabér doori kir geeraharahari a xúa? Adór doori ir kumamiitiya' qoomeesaro a aleesleéra baraakaá yaamuu wá ale?

³⁴ «Huunkáy kuwa i ilaawats u aleesleéra? As kahhó' tluwoó yaariír uwa i tluwi.

³⁵ Kuúng mankari kawa ya/ap a aleesleéra? Nari kí/ uri beer, ‹Aníng areeng naa wayaá'?›

³⁶ A heemá heé huunkáy gwaa sagalooárí haniis ar ir tluwi, nee heé tlaangú gwaa ti'inángwí laqan.

³⁷ Heé sagalooaro huunkáy gu faár a heemá? Nee heé dahheeroó gawaá doori eesaro gu aleesláw a heemá?

³⁸ As kahhó' teerír baraá yaamu iwa naga'at nee hhape tiwa ot iri baa/í tleehhít.

³⁹ «Kuúng slakat kuwa eer as diraangw u aleesleéra? Laqaá haayír na/aá diraangw kawa way'as a tú/a,

⁴⁰ qoomár birinda baraá mar'írí nahhamiitiyé', nee birinda nahhaatiyé' didá' niwa gigdaadina'.

⁴¹ Heé muruú /aymár xwaa'aro gu hanmaamiís, qoomár na/ii'ín bir ni amor'eénií /aa/aminá'? Nee bindi tlatlayá' amorqá' nee tiqá' as qwari.