YOBU 37 - Biblía Axweesantá Hhohho' ar Mungú 2004

¹ «Guruueé' hamí ma'aay ngwa dalaa/iyé' as muruuwí nee in tawo ni/ín.

² Áx iia qaaseek kwarara/ár afór Mungú adór i diri', nee xuuraaír baraá afkós daahh.

³ Afoorós in harweeririín umuúqo diiro gawaá dooriwo, nee mankaroorós in gwa/át ay ku/uyaá doori.

⁴ Aluuwo afoorós iri xuuru', inós iri kududuhuut ar afoorós tidá' xiríf, qoomaarihe mankaroorós in wer'eeliín umuúqo diiro.

⁵ Mungú ar afoorose in kududuhuut ar waa/oo/amo, muruú dirén oo tsatsahhaango ta aleeslawanaká gun tlehhiit.

⁶ Asma inós tlaa/aá tluwaay gin bay ‹Huué' gawaá daanduú yaamu,› nee baafoó tluwaay gun bay, ‹/Uuru ar tluwaak.›

⁷ Umuúqo heewo gun ilaa/ gadiyeede, as muu sleémeero gadiyeérós ngiwa xui.

⁸ Makaá sla/a nari watliyá' wa/amer'ín tidá' i nahhmamitiya', nari meetiyá' baraá mar'or'ín tidá'.

⁹ Bambaao ni baraá do'ós wá haratleér. Nee tsaaqwár qo duhhúm nin baraá kuuntirós wá ti'ít.

¹⁰ Tlaa/aá tluwaay nin huuiyá' ar hiinsluú Mungú, nee ma'aá yaariir nari dinkwár i naga'atiyá'.

¹¹ Mungú huunkoó iló' gun dalaa/ ma'aywo, nee huunkáy i mankartá diya/án.

¹² Inós mura' sleémeero gun amorqár káy, tiqár káy ar hara'ayaarós, as kahhó' tidá' aa hara'ayín ngiwa tleehhi baraá yaamu sleémeero.

¹³ Barnaxes an ar kángw hhó' laqaá ar kángw tlákw, laqaá ar gurtleemuwose, heé kaangwí sleémeero gu tlehhiít a inós.

¹⁴ Yóbu iia qaaseek Áx xasliít nee gadiyér Mungú ar waa/oo/amo aldakuuteek.

¹⁵ Kuúng a xúa adór Mungú huunkáy ngur hara'ayárí hanmiís? Mankaro huunkáywós guri gwa/atimís.

¹⁶ Xáy, adór huunkáy kura gawaaqaá gáwtí amohhe'eés a xúa? An gadiyér waa/oo/amo ar kudá' ganaá', nee oo daharuú koóm.

¹⁷ Kuúng kawa xu' hiyaywók ku axwán, qoomár fur'ár baskú daahh bar yaamu nga dukuku'ús.

¹⁸ Kuúng doori intlaaharo i adór inós wá aleesleéra? Nari gawduyá' adór kioo'ór taa tleéhh ar muqslár da/aten?

¹⁹ Gár atén Mungú ngu bawaan ooang, asma atén a sage giwaán gár ooa a xuanaaká.

²⁰ Heé qiítl oo gu báw, ‹Aníng a axweesantá slaá'?› Heé ilawaáts a heemá bar gaqo xuu' adór kur hariiáy.

²¹ Gwa/aateema na suwaahamiitiyé' gawaá doorií wá ale, i ilaá tlaaqaná' muu xumsór amoodá' ga aleeslayká, doori kaa paapa/aás nee fur'a.

²² Gwa/aateemaá kaloó hhoohhoó' oo sahaábu na bihhaá /iíkwár ti'iitiyé', Mungú kwaa harweér nee xirfuú de'e tlaáq.

²³ I ya/aandaaká Munguú Aleesleemusmo kuwa i hardahaan, /uuruuwós i harqoomoó konká nee kwasleemár ganaa'a. Inós gan'amuuwo aa haáts, hee gu hhitinká.

²⁴ As adoorí muu sleémeero inós gun da'ayuumiit. Inós mukdá' daara/aám ar sagalooár qo kaahh gu hhasliitiiká.»