YOBU 36 - Biblía Axweesantá Hhohho' ar Mungú 2004

¹ Elihu iri kumiít axweesanto, iri oó',

² «Gár niinawe qiítl aníng /aymueé' kooko ngu oó', asma tam hamí a kumiít niwa daanduú Mungú wá axwees.

³ Aníng xu'utir'eé' ngina amór saáwá sláw, nee aníng adór Tleehharusmooeé' ir ganaai ngin geehhooeesár wa slaá'.

⁴ Ar looeemaawo aníng baraá axweesanay'eene lama a kaahaaká. Heé xu'utiro aa haats i dinkwa nee kuúng.

⁵ Qaytsiít, Mungú i /uuruú kón slám inós i heé waaqaqaiiká, inós gár i xuiiká i káhh.

⁶ Múk tlákw gu slafiíngwí mayká. Ala hariímár múk ta baramaanuusi gan haniis.

⁷ Ilaá Mungú i surkuna'aaká dír heé hota ganaa'a, Ala gin xirfayees nari waawuti'iná' dinkwa nee waawitá ay alhhe'eesay wasle.

⁸ Ala barnaxes muu kwa tsegiít ar minyoróro kiri ohín nee him'ér slahh'eemiis,

⁹ Mungú tlehhmi'ii'ín kudá' tlakw gin laqán, nee adór inooín nira daara/uutiyé'.

¹⁰ Giri ia' xawís as intsaahhatisarós ngiwa axaasiya', giri hara'ayín tlakweemaaín ngiwa maya'.

¹¹ Bar naa axaasiyé' nguri sagadiyusiyá', slafingw'ín sleémeerowo nin diihhe'eesiyá', nee tan hoot ar qwala/ kureeri sleémeero.

¹² Ala bar naa iia' wasleesiyé' nin qwaariyá' ar tsu/utár paánga, nari qatliyá' as xu'uti wasle.

¹³ Múk Mungú gu ilaiwawa/aaká in buhhtá slaiyá', qoomár birnga tsegiít ngu i /aa/amina'aaká.

¹⁴ Nin istá /aamirí qatliyá', nee slafingw'ín in hhán ar murekesaay adór kuquú sli'imuuse.

¹⁵ Heé ta baramaanuusi gun tuu/ ar baramaanidá' i slaslay, nee giri faxtis ar slahh'eemisudá' i slaslaya'.

¹⁶ Mungú kuúng una duúx baraá slahh'amuuwo, uri huúw ay dír iintlaaxw ar tuwa ditsakusiiká, kuúng wahhana kari /ák.

¹⁷ Ala hamí kuúng ta adór tlakusmoó wá sakwasleemuút, sakwasleemár uwa hariim ugwa al'iwít.

¹⁸ Ti kilók ila/ xarasleema muwa niqár ayé', laqaá muruú yaariír oo tir tu/ muwa qwaareés.

¹⁹ /Aa/eewók u gaa wa buiía baraá slahh'amuwoge? Laqaá tam /uuruuwók sleémeero muwa buu'?

²⁰ Xweera mi ilatleeruusaar niwa hardihiya', qoomaadá' muu kuwa tsu/aa/in.

²¹ Ti harmagahh, ma baraá tlakweemaá xuaar, asma hamí tun slahh'eemiis as kahhó' ma baraá tlakweemáy dahaar.

²² Aleesleemuú Mungú nee /uuruuwose inslaweek, Heé intsaahhatisaro adór inós ga áw a heemá?

²³ Heé looár wake inós gwa gadiyeédií laalaqaas i deéro? Laqaá heé looár wake gwaa bay, ‹Kuúng disinge aga dakús.›

²⁴ Gadiyér Mungú inslaweek kawa diidi'iís, gadiyeérí múk yaariír gana qaroó waaraá'.

²⁵ Muu sleémeero tlehhma'aá Mungú gaa qaroó ár, muu gin amór saáwá ga/áy.

²⁶ Ga/aaweek, Mungú ku ló'wa úr, tam tsaahharo sleeme ugwa harslaaqataán, kureeraá slafiingós faaro ngi ya/an'aaká.

²⁷ Mungú an kudá' ma'aay gi baraá tlawtá wá gáwtí ar tlaatláw, Naagáy tluwaay guri tleehh baraá tlaangí.

²⁸ Huunkáy guri tluwtis, muu tluwoó yaariír guri sláy.

²⁹ Heé adoodá' huunkáy kur intlahaahan ga xuú' a heemá? Laqaá adoodá' kwarara/a ir kududuhelaliin gawaá dooriwo ga xuú' a heemá?

³⁰ Inós mankaroorós gan qaas as nguwa harwedit, iloodaá baraá tlawi giri tuuntuuk.

³¹ Muu gun sakwasleemuut ar loohír tluwaay guri male /aymiis ar tluwaayduú kilá'.

³² Mungú mankari gan oh ar dabaawós, dír i slahhtáwá slai gari slaahh ar mankartadá'.

³³ Kududuharós a hardahamuuwós gun alki/ít tam hikwa hardahamuuwós ngu xuiyá'.