YOBU 35 - Biblía Axweesantá Hhohho' ar Mungú 2004

¹ Elihu iri kumiít axweesanto, iri oó',

² «Kawa xu' gaarí an tlehhmuú ganaá'a? Kawa ga/eer an gan'amuwóge dír Munguhe.

³ Asma kuúng a kat, ‹Gár ni buu' a milá? Gár tar tsiní a milá? Tlakweema bira tleehhiiká?›

⁴ Aníng kuúng nee mulqeerók tisíng nun baw,

⁵ Áx gawaá doori i qaytsitaak, nee huunkaydá' dirhunge gáwtí dirií' xuxuaak.

⁶ Bar tlakweema iga tléhh, gár Mungú gu aw a milá? Nee tlakweemaawók binda tlahhiyé', gár inós kur slahhe'es a milá?

⁷ Bar hotaawók i ganaaiyá' gár inós kuwa bu' a milá? Laqaá bar kuúng a hota ganá' mi sláy diroge?

⁸ Tlakweemaá kuúng ta tlehhit, heé i slahh'eesiya' a heé adór kuúng, nee hotaawók awa ganaa'á', hee ngun tu/iyá'.

⁹ /Ayta bira tláhh, muu in /aa/amín, /iisara ngin firiná' amór heé /uuruú koóm.

¹⁰ Ala hee i kaahh oo káh, ‹Mungú kuduú Tleehharusmooeé' i amá? Kudá' xweeraawo aníng i bar/úr áw gaálaay?

¹¹ Kudá' atén taa intsaahhatis ta makaá sla/ato, nee tari sagalooár i haniís ta tsir/ór hhampe'eerír tlatlaawa i diimá?›

¹² Mukwí alee/isaay nguna fiririné', ala Mungú gaa mu/aywatsiiká, asma daara/ángw múk tlákw.

¹³ Looeemaawo Mungú /aa/aá gaa wasl gi axaasiiká, Munguú Aleesleemusmo múk adoorí gu iiárií qaasiiká.

¹⁴ Adór ur mu/aywatsi bar kuúng an kat, aníng inós ugwa ariiká, tari ó', ‹Kwasleemar'eé' i dír geeraawós,› nee kuúng inós un daamaaraán.

¹⁵ Ala as adoorí Mungú buhhtaawós ngiwa ila/aa/án nee tlakweemaá muu ngiwa ak diiqiiká.

¹⁶ Yobu afkós guna gweér Axweesani gan tawo kah ar sagawasle.»