YOBU 34 - Biblía Axweesantá Hhohho' ar Mungú 2004

¹ Elihu axweesanto iri kumiít, iri oó',

² «Aá múk sageloén, axweesante'eé' tí axaasaak. Kuungaásingá' xu'utír koomá', aníng iiárií qaasaré'.

³ Axweesantá tsuu' gár kar tsahh a iia, adoodár muruú /aymár tsuú' gár kur tsaahhi tar tsifraangw.

⁴ Qwalaas, gár ganaa' a tsawaaraán a tsawdimaán gar hhoo' a gaalá?

⁵ Asma Yobu i kaahi, ‹Aníng ti dakuús wásl. Ala Mungú gana'amueé' guna sií'.

⁶ Aníng geeraawo a mak hota ganaá', ala tina lamusmo tleéhh. Aníng ti dakuús wásl tam inkahhi'iieé' i hungagu/iaakahe.›

⁷ Heé adór Yobu ngwa qo dii wa aandí'i? Oo daktu'uuma gaa guruú wa dalaa/.

⁸ Inós nee múk tlákw tan alhi'iimaamiit, in tlaatláy amór dinku'uumár múk tlákw.

⁹ Asma in kilós kaahi, ‹Gár ta sleer i káhh gán, an tawo daawimít Mungú kuwa sla'atimis.›

¹⁰ Gawaá adoorihe, kuungásingá' tsaahhár koomá', aníng iiarí qaasaré', a gár ya/aamaaká Mungú tlakweema ngiwa tleehhi, nee Munguú Aleesleemusmo i baloó dakuusiiká.

¹¹ Mungú hee gun buu' ar har qoomoó tlehhmi'iiwós, nee umuú heewo ar i slay a tidá' lohduuwós wá hariim.

¹² Looeemá kilae Mungú gár tlaakw ga tleehhiiká, nee Munguú Aleesleemusmo kwasleemár hee ga baloó hhitinká.

¹³ Heé inós gwaa ádbáy yaamu ngiwa ga/ay a heemá? Nee heé yaamu sleémeero gaa dabaawós í qaas a heemá?

¹⁴ Barnaxes Mungú taa kilós aldaákw, nee hiinsluuwós kuduú slafiingw burngwa hingeés baraá yaamuwo,

¹⁵ makaay sleémeero aqo nin qwaariyá', hee iri kii/ baraá hhape.

¹⁶ Barnaxes tsaahha a koón, gaarí axaaseek, gár ni kah iiárií qaaseek.

¹⁷ Bar Mungú gan'amu gu slaiiká, iqo waawuti'ína? Inósuudá' hota ganaá' nee oo aleesleemuú koóm uqo dakuúsár beéra?

¹⁸ Inós bar waawutmo gun bay, ‹Kuúng tu amoowásl.› nee múk urén gun bay, ‹Kuungá' tundu tlákw.›

¹⁹ Inós geeraharuuse ga ilaamurutiiká as adoodá' kawa urén, sleeme daqaare ga hhasliitiiká ta narkuuteero. Asma mukwí sleémeero a gadiyér dabaawós.

²⁰ Nin qatliyá' ar wa'aá wák, xweeraá looár wake muu kun tawó kwatiit iri faakiis qatlooro, nee mukdá' /uureemaá koóm gun fitsfiits tam /iisara ga dír heéwí firinká.

²¹ Asma Mungú lohdaá muu gin ga/áy nee tlehhmi'ii'ín sleémeero gin ga/áy.

²² Dír giiw nee ar boo/ i káhh dirose, ar múk tlákw i nahhaati ar kiwa ariiká.

²³ Mungú gár hee ngus baalaárí ooi i káhh ar nguwa sakwasleemuuti.

²⁴ Múk /uureemaá koóm gun tsegiit sleeme gi ya/atideeliiká, múk hatlá' guri gawaá kiteeraá mukdá' i qaas.

²⁵ Asma inós tlehhmi'ii'ín gi xuu', gin baraá xweeraá wákí /arara'aas, nari qwaariyá'.

²⁶ Múk tlákw gun dír geeraá múk wá muux.

²⁷ Asma inós eeharto nguwa mayé', nee lohduuwós sleémeero eeharto ngiwa si'iyé'.

²⁸ Inooín /aa/aá narkutmo ngina kwatiitiyé', ngiri hardahasiyé' baraá iaá Mungú. Mungú /aa/aá mukwí taa slahh'eemiís giri axaás.

²⁹ Mungú bira xasliít heé gu áw a heemá? Bar gitsee/aawós ngaa luú/ heé gi kiís a heemá?

³⁰ Inooín tam xoorooro, laqaá tam heé wake gin alqoomees as kahhó' heé tlaákw miwa waawuti'ín, tam mukdá' múk dahmiís baraá tsaxwa.

³¹ «Alók geera bar hee in ooi dír Mungú, ‹Muxtaarók ana qiqtlatliím, aníng a ki/aaká tlakweema tleehhamooro.

³² Tlakweemaá naa tsaahhiikahe xu'utisáng, Barnaxes tlakweema iga tleéhh a ki/aaká baraá tlakweemaawo.›

³³ Áx kuúng ka ga/eer, i harína Mungú nguwa muxi, kuúng an heé tsawdiím, a aningeeká, gár kuúng ta kat ooang.

³⁴ Mukdá' muruú tsatsahhaám aníng i ádbaye'. Nee múk sageloén oo axweesante'eé' gaa axaas kaangw ngu ooiye'.

³⁵ Yobu ina axweés ar sagawasle, nee axweesantós i gana'aká.

³⁶ Alók geeraawo Yobu kun alqaytsita hhe'ees, asma axweesantós a adór tiqár múk tlákw.

³⁷ Asma dee/ana guna daanduú tlakweemáy doók Atén tina tsa/ií slaáhh niqaywo, nee iri male axweés daanduú Munguhe.»