YOBU 33 - Biblía Axweesantá Hhohho' ar Mungú 2004

¹ «Yóbu, daxta axweesante'eé' iiárií qaaseek, axweesante'eé' sleémeero axaaseek.

² Ga/aaweek, aníng ta amohhe'eés axweesanto, nee a baraá axweesántí dirií'.

³ Aníng qomtir'eé' an káh, nee tidá' ni xuu' an káh ar inkihhimu.

⁴ Qeeruú Mungú aníng ina tleéhh, nee hiinsluú Munguú Aleesleemusmo ina slafís.

⁵ Axweesante'eé' tí tlaxwang bar aleesleér, axweesantók alki/a/itang dir'eéní ale. Ma warqawaar baraá axweesantoge.

⁶ Ga/aaweek, aníng Mungú i dirií' adór kuúng wa ale, tam aníng sleeme tina tleéhh ar hhape.

⁷ De'e tlaqueé' kuúng gár kuwa da'ayumit i káhh, laqaá sleeme iilooeemaá u slawá' i kahhiyá'.

⁸ Looeemaawo qoomár tawa axwes aníng aga axaás, aníng afoorók aga axaás qoomár tawa kat,

⁹ ‹Aníng ti daba' hhohhó', ti dakuús wásl, ti hhoohhoó' tlakweema iga tleehhiiká.

¹⁰ Mungú aníng in tawo slaiiká, ina tawo wakusmoowós tleéhh.

¹¹ Ya'aeé' gina tawo tsegiít ar peehhoó iló', umuúqo gár án naa tleehhi gan ya/atideliít.›

¹² «Ala Yóbu, diirihe kuúng aga dakús, án kuúng u mu/aywaáts Mungú ku úr ta heewo.

¹³ Ahaá waáy, misti tlaampa'amisá' nee inós tawa kát, tam /aymuueé' oo wák ngwa mu/aywatsiiká.

¹⁴ Asma Mungú in ilawaats ar loohirka, iri male adorkaár ilawaats tam hee ngi tsatsahhankahe.

¹⁵ In axwees ar baraá tlata nee ar baraá iigu'utu, qoomár gu'utér ilo' muu burngwa ohiín.

¹⁶ Qoomár bir guiyá' muu gun ia' xawis, giri daandeemo feehhamiis ar naanaqaangós,

¹⁷ as kahhó' muu tlehhmi'ii'ín kudá' tlakw kiwa may, nee daara/angw'ín nguwa amorqá' i si'iya',

¹⁸ muu guri tuu/ as miwa /eét baraá gi'i, nee slafiingós mukuwa qwaareés ar paánga.

¹⁹ Mungú sleeme hee gun naanaqán ar loohír tiqtír gu qaatiis gawaá fala, nee ar loohír tsata'aá baraá diqiyaawós.

²⁰ Naagáy muruú /aymaarós /etaangw guri sii', iri xinii' tam muruú /ayma ku hhoe.

²¹ Iri kaangaa/uut, tam tsaahharo kuri harslaaqaat, nee faduuwós kudá' aáng getlakw nari yaamaá tawórí meetiyá'.

²² Afkú bohoongw guri áy, nee slafiingós iri tseewúy dír bihhaá gadaádá' gu gaamiis.

²³ Ala malaykamoó wák baraá kumeero i dinkwa nee inós, as nguwa haraaki/isi nee Mungú, nee muruú tleehhamoro ganaá' nguwa dirósí xu'utisi.

²⁴ Inós heedaádá'guna gurtláy, Mungú guri báy, ‹Ba/amiseek, miwa /eét baraá gi'i. Asma gár afkós gu /aay aga sláw.›

²⁵ Naagáy slaqwtós gari malé adór masoomoó wá dalaa/. Inós iri male /etlángwí kii/ kuduú istá /aami.

²⁶ Heedaádá' Mungú guri firín, nee firoorós Mungú gari ya/án, Mungú guri sluufmiis ar qwala/, Mungú guri xirfuuwós i ki/ís.

²⁷ Heewí iri dír geeraá múk wa daa', iri ooi, ‹Aníng tlakweema ina tleéhh gan'amu nguri sií'. Ala aníng tlehhmuuwihe taa doohhisiiká.

²⁸ Mungú hhiintluueé' nguna afkú bohóngw wa ba/amís, hamí a slafíngwí kaáhh, ilaawo a xumiís.›

²⁹ Mungú adoorí gan dír heéwí tleehh, ay sagáwa tsár laqaá ay tám sleeme.

³⁰ As kahhó' hhiintluú hee nguwa afkú bohóngw wa way'aasi, as kahhó' heedaádá' gwa/aateemaá slafiingw ngiwa ari.

³¹ Aá Yóbu, aníng iiárií qaasáng. Xasliít aníng ni axweés.

³² Gár ta ooár wá sla' bir deer aníng i ooang, axweesáng, asma aníng axweesantók a axaasár wa slaá', áx a tsuwa hota ganá'a.

³³ Bar ni axweská, aníng iiárií qaasáng, xasliít, aníng kuúng u intsaahhatís sagalooaro.»