YOBU 32 - Biblía Axweesantá Hhohho' ar Mungú 2004

Axweesantá Elihu

¹ Aluuwo Elifási nee Bildádi nee Sofariwo axweesantá Yobu mu/aywatsingo kari máy, asma adoodá' inós tiwa kilós gan'ámkwí harafaár.

² Aluuwo Elihu garmoó Barakeli oo guruú doó Rama, kuduú Busitamo, iri amór Yóbuwí qa/iít buhhtaawo, as adoorí tiwa kilós gan'amúwí harafaár ta Munguhe.

³ Ina amór mulqér Yobu i buúhh sleeme, as adoodá' afe ngiwa i qwaqwadiín dír Yobuwo, nee nguwa tlakweemáy tsa/amiisiya' ar lama.

⁴ Elihu ina ala xaslmamiít qooma sleémeero bariiseedá' tawa axweesi nee Yobu, asma inós ku niiná dir'ine.

⁵ Ala ngiwa tsaáhh adór bariiseedá' tám Yobu ngira afe tseék axweesanto, iri ló'wa buúhh.

⁶ Elihu garmoó Barakeli kuduú Busitamo iri oó', «Aníng a masoomo ala kuungá' a bariise, as adoorí aníng nari da'ayuút ar baraá muunaaeé' ngiwa oo'.

⁷ Ana baraeéní oó', ‹Lakiít bariise i axwes, nee múk urén axweesanoó sagalooa ngu ooi.›

⁸ Ala baraá heewo qeeru i deer, hiinsluuduú Munguú Aleesleemusmo hee gu fuqurángw i hanimiis.

⁹ Hee bar ku sagaloó' a ay dír i urayká, nee múk muruú hhó' gu tsatsahhaám a bariise kilooineeká.

¹⁰ Gawaá adoorihe aníng a kah, ‹Iia qaasaak aníng ala mawaaré' tidá' naa tsaáhh ngi oó'.›

¹¹ «Ga/aawaak, aníng axweesanayhúng una ala daám. Axweesanayhúng oo sagalooa una iiárií qaás, qoomár tawa gár ooár leelehhita'.

¹² Iia ana mak dír axweesanayhúng i siíhh. Ala heé axweesantá Yobu tlaxto gaa aleeslay i kaahh. Sleémeero mu/aywatsto una harslaaqaté'.

¹³ Ti harmagahhe' hee miwa oo', ‹Daxta sagalooa aga sláw, Heé Yobu gur baá/ a Mungú, a heewooká.›

¹⁴ Inós nina qo mak amor'eéní ilawatsiiká, aníng sleeme u mu/aywatsaaká ar adoodá' kuungá' kura i axwesé'.

¹⁵ Kuungá' ana tawo qartlamité', a axwesa'aaká, slám gár ta kata' i káhh.

¹⁶ Ahaá, aníng an xasliíta, kuungá' gár ta katá' bir káhh? Asma aga amorqá' saáwí sihhité' u mu/aywatsiinda'aaká.

¹⁷ Aníng sleeme axweesante'eé' ngi oó', nee tidá' naa tsaáhh ngi alki/iít.

¹⁸ Axweesantá yaariir a koóm, nee qeeruuduú baraaeé' aníng in tliwi/ín ngiwa oo'.

¹⁹ /Aymi'iiká' baraeene na hatsiyé' adór hutloó aa daahh, aníng pu/uuta aga nakaá/ adór tlakoó /abén oo kaahari oo difaáír koóm.

²⁰ Daa aníng ni axweés, dooqa daqaní tsiní a sláw, lakité' ni axweés as nguwa mu/aywaats.

²¹ Hee u barqantusaaká, laqaá sleeme u harhheehhe'eesaaká.

²² Asma aníng tiwa dír heéwí sla'atis a aleeslawaaká. Ala bar adoorí aga tleéhh, Tleehharusmooeé' aqo in adaá kahhtis.