YOBU 31 - Biblía Axweesantá Hhohho' ar Mungú 2004

¹ «Aníng aga tsabiím, a baloó qaytaaká amór dasi as ngiwa ilaatleeruus.

² Geeraawo daqaní gár ni amór Mungú i daamaraam a milá, nee aalir'eé' ar amór Munguú Aleesleemusmoó daahh a milá?

³ Ahaá múk hota tlákw qatlo gu sleeraakáhe, nee mukdá' gadiyedaá tlakw ngi tlehhaahhitá' in hhana'aakáhe.

⁴ Ahaá, inós lohduueé' gi xuiikáhe? Nee digir wakeetingw'eé' gu xuiikáhe?

⁵ «Barnaxes ana baraá lamtá wá hoót, nee bar ya'aaeé' ki amór al/aymár wa islahh,

⁶ Mungú aníng i alqayti ar barqanti wasle, nee ngi ari adór aníng tir dakuús wásl.

⁷ Barnaxes tlehhmi'iieé' baraá loohirós nga geexayé', nee inslaway'eé' muruú ilaaeé' ni slaiya' gwaa ya/án, barnaxes dabaaeé' iga slasla/areés ar tlakweema,

⁸ daqaní gár aníng naa dahaás heé hatlá' ngi /ayi, tam balángw baraá qaymor'eé' ku tu/un.

⁹ Barnaxes harér hee aga waatlakweés, naxes aga qoo mareexu'úngw áw afkú doó inslaawmooeé',

¹⁰ daqaní harer'eé' ka duuxi nee heé hatlá', daqaní i fuqus nee hhawaataá hatlá'.

¹¹ Asma geeraawo dakuúsarí ka ló'wa ur, a dakuúsár hee gaasa, a tlakweemá har'ohuuse i sakwasleemut.

¹² Asma tlakweemaaká' aa asltá /ayiim ay baraá hhituru'uuma, nee slaasláwár dooeé' sleémeero kari hhaamiis as tlakweemaaká'.

¹³ Barnaxes kwasleemár lawaalmoó dooeé' aga waaqaá', laqaá tam ar lawalo'ór dooeé' sleeme, qoomár niwa dir'eéní qununu/iya',

¹⁴ daqaní bál bar Mungú naa hardáh adór ni laaq? Daqaní bál bar Mungú iga yaahamisuú áy mur mu/aywaáts?

¹⁵ Ahaá kudá' aníng iga baraá guruú aayor'eéní tleehh, an kudá' lawaalmooeé' gwa tleehhiikáhe? Ahaá aqo kwí wakeekáhe oo atén ta buqumbuqun, baraá gur'ér amuurene?

¹⁶ Xáy, aníng narkuute muruú i sla'a aga /íti? Laqaá /ameenír kwaalo'o aga ila' hhantemamísi.

¹⁷ Laqaá fa/ar'eé' ana kilooeé' /aa/aáy? Nee panaay ugwa qawiikáhe?

¹⁸ Aasla'áy! Asma iimír masoombi'iimar'eene aníng na/aá panaay ina adór baabá wa amohhe'eemiís, nee iimír aníng tawa na/aay kwaeeli ina alee/iimiís.

¹⁹ Barnaxes aníng hee ugwa ár oo /ankwets i gaamisi, laqaá narkutmoó tsitoó koomaaká,

²⁰ barnaxes ugwa tsiitisiiká ar tlabaá taa tleéhh ar se'éngw bee/aangw, nee inós aníng iri sluufisiiká ar tsáp,

²¹ barnaxes na/oó panmo ugwa baramaanuús, asma ngiwa ár múk aníng i aleekalaá/ i deer baraá kwasleemaro,

²² daqaní suumar'eé' tí ni gáwtá wá hu', nee dakw'eé' ir gawaá suumár wá qeet.

²³ Asma aníng a baraá de'ér ur as hhitár amór Mungú daahh, nee aníng a qiitlaaká niwa dír Munguú Aleesleemusmór qoom.

²⁴ Barnaxes sahaábu ugwa harahhiíf, laqaá sahaábu hhohhó' bura haratlintií',

²⁵ barnaxes aga qwalaá/ as daqaari'iimar'eé' kawa yaariír, laqaá as dakw'eé' iwa tleemaai,

²⁶ barnaxes tsee/amá niwa ti'imiiti ugwa sluufiís, laqaá slahhaangw baraá hi'iitanoorose nee hhohh'arirose,

²⁷ nee muunaáeé' iri qawti warqáy as ngiwa sluufmisi, laqaá aníng dabaaeé' ngiri ma'aás as inooín ngiwa ilaiwawaa/,

²⁸ muruuwí sleeme an tlakweésár ur ar sakwasleemár wa hariim, asma geeraawo lama aga tsaát dír Munguú Gáwtí diriia.

²⁹ «Xáy, aníng aga qwalaá/i as wakusmooeé' iwa slahhaá'? Laqaá aga daara/uúti qoomár inós gár tlaakw nguwa sleér?

³⁰ Aasla'áy, ala afkwe'eé' ugwa algeemawiiká, lo'o ngiwa huwi as slafíngw heewí qwaareesa.

³¹ Sagadiyuusér dooeé' taa qoo kilooín yaahamiskáhe tawa kaahi, ‹Heé guruuwós gwaa dalaa/iiká fu'unaywo a heemá?›

³² Aausmo aa qaatiiká yaamaá tawo, hhayutuuse i dír dooeé' wá guaaiín.

³³ Aníng tlakweemaaeé' igaqo luú/i as heeuuma, nee dakuúsar'eé' aga qo baraá muunaáeéní máwi?

³⁴ Asma boo/oó muu nguwa da'ayumiit, nee waaqaséngw mar'eefooeé' nguwa da'ayumiit, niri dir'eénií xasliít tari kilooeé' doó haratseék.

³⁵ Masók geeraawo heeko in iiárií qaas, axweesante'eé' tí diirihe naa aaiím, aníng an dugnoó wa qaás. Masók Munguú Aleesleemusmo axweesante'eé' tí ngin mu/aywaats, muruudá' ta daanduueéni kaahi alók geera kuna gooín.

³⁶ Looeemawo geera slambare/idá' ki gooín an ar hi'iimiít daara/ango, geeraawo an adór slamángw wá dahaás gawaá sagw'eé'.

³⁷ Mungú geeraawo un umuú gaárí oó' baraá hotaaeene, geera an adór garmoó waawutmoó wá daqáw amór Mungú.

³⁸ Áx yaamaá ni /aay awa qo hara/uuntsáwo, nee digeemiiwós iqo tsuunqumiisía as aníng?

³⁹ Balángw yaamuudá' una qo tawo /áyi ala ugwa buiiká, laqaá múk qaymo loó' ugwa qo loohírí tleéhhi ar iwa qatliya'?

⁴⁰ Masók laqaya' nin baraá qaymoosíng wa ti'iitiyá' daanduú angaánó wá ale, nee sla/a ngi alti'it hariímár angaánoó shayiírír wa ale.» Axweesantá Yobu aa diirií alhhe'eesút.