YOBU 30 - Biblía Axweesantá Hhohho' ar Mungú 2004

¹ «Ala hám daxta tin harneet nee múk dir'eene ninákw, múk taati'ii'ín naa waaqaá' asma tam nee seeawer'eé' tidá' bee/ángw xuum tawa al'iwiwiiti i harina'aaká.

² Gár aníng iwa tu/iya' a milá geeraawo, inooín bar múk /uureemaá koomaaká?

³ Inooín a múk aa kaanga/uumiit as aleema nee qwari. Muruú /ayma nguna baraá xaanxáy wa leelehhahhitiyé', baraá kwankwarír tawo dír kuwa baloó slayká.

⁴ Naanuú qarqaár nguna baraá xaanxáy wá buaainé', dee/aruú ufaana nguna /aa/ayiyé'.

⁵ Kina gusaasín nee muu baraá tla/angw'ine, kina aluúwaá i tseeamamín adór fisuuse.

⁶ Hotaaín kina baraá wa/eerí wá leelehhiít, nee baraá boh'eero, nee baraá mar'ór tla/u.

⁷ Nin baraá darmú wa tseeamaaminá' adór makaay, sleémeero nin baraá muslunslaráy burumburimamitiyá'.

⁸ Bira aán a daktanár qoo tawo, xwaylár múk ia' wásl, Kina slakaát baraá ayko as niwa quutliya'.

⁹ Hám daxta aníng in waaraaiyá', nee hamí in niqiná'.

¹⁰ Hamí nina aníng wa xinii'iyé', iri kwirhhitiyé', sleeme i hhasliitiaaká, in i tsuuquná'.

¹¹ Asma Mungú aníng ina daqatlakweés iri niinaweés, inooín daxta i hhasliitiaaká, gár i slaiya' ngin tleehhiyá' dir'eene.

¹² Boohhár muu aa sihhít dír bihhieé', aníng in dahhtá wa slaiyá', lohdaá aníng ir dahhiya' ngari dir'eéní huwiyé'.

¹³ Loohir'eé' ngina gaasiyé', slahh'amuueé' nguna ak doogiyé'. Heé inooín gi har'uhiím sleeme i kaahh.

¹⁴ Nin amor'eéní hardihiyá' adór múk naa baraá wa/aángwár oh, tin i haratláy ar tsimaahhír yaariir.

¹⁵ De'e naa amor'eénár kí/, ilaiwa/ameero tina máy adór gar fur'a ira tleér. Daqaari'iimar'eé' ina waaráhh adór tlaangú.

¹⁶ Án hám daxta gwa'ara aga nakaá/, tiqti iga alsí'.

¹⁷ Xweeraawo faduueé' in gon'eeliná', nee slahh'amuú i xuusiím i babayká.

¹⁸ Mungú iga tsaweér ar shaátir'eé', iga isa óh ar tlabaaeé'.

¹⁹ Mungú aníng iga kwaáhh baraá baa/í, aníng hamí ana teeruút, nari da/aruút sleeme.

²⁰ Kuúng una mak i /aá/ ala iga mu/aywatská. Aníng an mak sihhiít as uwa fiririim, ala kuúng in tawo ga/eér.

²¹ Ala kuúng an amor'eéní xarásl, asma ar dakoge aníng ina slahh'eemaamís.

²² Aníng ina gáwtí tlés ar fur'a, aníng iri loohís ar fur'a, iri amaha'atmaamís ar bambaaór yaariir.

²³ Aníng aga tsaáhh daxta kuúng in gwa'arárar slá', dír do'odá' ta amohhe'eés as umuúqo hee.

²⁴ Ahaá, hee bira huú' dabaawós giqo gáwtí tleemamisiikáhe? Nee hee baraá slahh'amuwose alee/isaay gu firaarinkáhe?

²⁵ Ahaá, aníng aga /aa/amimikáhe as múk baraá slahh'amu, nee aga gurhaamutikáhe as narkuute?

²⁶ Ala aníng qoomár hhooeema ngiwa harahhiíf, naxés tlakweema nina hardihiye', nee qoomár gwa/aateema ngiwa daám naxés giwti nina hardát.

²⁷ Muunaáeé' i amooqwaqwaadín, sleeme i lakmitiiká, aníng nee slahh'amu taa doogaán.

²⁸ Aníng an tsuunqumiís nee an baraá giwtír wa hi'iimiít. An tla/ángw múkwí sihhiít a alee/isoó fiririím.

²⁹ Aníng ana adór hhiyoó taweermo tleehhiít, aníng nee sakweeli dimbé i káhh.

³⁰ Kaahartaeé' ina boo/eér sleeme in tawo tu/umít nee faduueé' na tsi/imiitiyé' as duuraai.

³¹ Gidaandoorir'eé' ina warqeér tari xooslmoó tsuunqumis, nee firiímbir'eé' ina afór /aa/uuse tleehhít.