YOBU 3 - Biblía Axweesantá Hhohho' ar Mungú 2004

Iimu/úngw axweesantá Yobu

¹ Naagáy Yobu iri ilawaáts, baalaadá' inós kuwa laqwaál gari lu'ús.

² Yobu iri oó',

³ Baalaadá' án tiwa laqwaál i tsul'ut, tam xweeraadá' bál tawa oó', na/oó garma kwaa tsíh.

⁴ Baalaadá' i manxat, Mungú mingiwa i qaytsiít tam gwa/aateema mingiwa i gwa/aatiyé'.

⁵ Masók baalaadá' ma/ami nee giwtír aa qipit gan ót, huunkoó iló' ngi tuuntuuki. Ma/ami tlaatla/angwdá' ngu de'e tsat.

⁶ Xweeraadá' ma/amír amoowasl ngi ot, mikiwa baloó harafaár baraá deelór kurko, laqaá tam baraá deelór slahhaango.

⁷ Xweeraadá' ni tawo tleehhitiye', qwala/ mukuwa baloó axaás xweeraadae.

⁸ Da/aluuse baalaadá' ngi lu'us, mukdaádá' sagalooár makiito'ooda' ta bay Lewiatan kawa baali ga koóm, baalaadá' ngi lu'usi.

⁹ Gwa/aateemaá tsetse/uú qoomár matlaatlér boo/ i giwiye', xweeraadá' tam i gwa/aateemaá ilatleerusia, mingiwa slayé', nee gwa/aateemaá matlaatlér boo/ mingiwa ariyé'.

¹⁰ Asma xweeraadá' xwaylár aayír'eé' ngaa ila/i'iiká, tam slahh'amu dir'eene ngwa ila/i'iiká.

¹¹ Ahaá aníng masa dír xwaylárií gwaaiiká. Geera masók ana kahhuút didár kilá' tiwa laqwaál.

¹² Aayí aníng miga har umiín, slám wáy migaahar du'umís.

¹³ Asma geeraawo hamí aga qaát baraá /aanta, nee aga xasliít. Aníng geeraawo aga qaroó qaát, hamí geeraawo a baraá hungu/uma,

¹⁴ dinkwa nee waawitá nee gurbu'uusér muu, kudá' taangu ngaa inki/isiye' tlehhtuuwo.

¹⁵ Laqaá geeraharuusér sahaábú koóm, kudá' mari ngaa hatsisiyé' ar muqslaadár peésa.

¹⁶ Ahaá kár geeraawo, gár án tisa guruú wa kwahhiiká? Tari adór na/oó qawri oo gwa/aateema gaa ariiká.

¹⁷ Baraá /aantaaro múk tlákw tlakweemaaín gi baloó tleehhiiká, nee múk aa slaaqamiit i hungu/uus.

¹⁸ Baraaqae múk taa tsegiít i hungu/uus ar wayda. Afór sagesihhitusmo ar gi iigahhamiit ngi axamisiaaká.

¹⁹ Múk urén nee oo ninakwe ta baraadií dirii', nee lawaalmo lawaali'iimarós i fák baraadae.

²⁰ Ahaá heé baraá slahh'amaayeérií dirií', musku gwa/aateemií gwa/aateemiis, nee heé muunaáwós aa ló'wa slahhaa', slám musku slafiíngwí dogiit,

²¹ heé gwa'arár ilatleeruús ala ga baloó slayká, tam gwa'ara ngi leelehhiít peésár taa luú/ ba/a.

²² Kudá' ló'wa qwalalaá/, nee qaseseém qoomár /aanta bar nga ár.

²³ Heé loohirós taa tseék muku har slafiíngwí dogiit. Heé Mungú aa slafiingw hartsaát, mu har daawimitá'.

²⁴ Kitángw niwa /ayiim, aníng an gurhaamuút, nee /ifór slahh'amu aga baloó mawiiká.

²⁵ Asma gadaádá' ni ló'wa da'ayuumiit, an gár aníng iga sleer, nee tidá' i hor/írár a'aw iga manxatís.

²⁶ Aníng wayda u koomaaká, xasliita aga harslaaqaát A hungu/umamisaaká ala aqo daawitame kilós an ar hoót.