YOBU 29 - Biblía Axweesantá Hhohho' ar Mungú 2004

¹ Yobu iri kumiít tiwa aleekala/an, iri oó',

² «Ooyeey! Tsiní geera bar aníng an adoodár slahheeraá geerií kaáhh, de'emaadá' aníng tiwa de'aaen nee Mungú.

³ Qoomaadá' tsaa'astós iwa gawaá sagw'eén wá gwa/amaamit. Aníng nari baraá giwtír wa hi'iimiít ar gwa/aateemaawós.

⁴ Deeloodá' aníng tawa heé aa bu'uut, bál Mungú tawa mulqumoó dooeé',

⁵ deeloodá' Munguú Aleesleemusmo iwa tlayká dir'eene, nee aníng nee na/iieé' tawa dinkwár i diriiaan,

⁶ deeloodá' ya'aaeé' ngiwa hamtlaatliit ar ilwa, nee duxér di/i niwa amór dooeéní wa/amiin baraá tla/ú wa ale.

⁷ Deeloodá' niwa amór múkwí ti'imamiit, nee kitangw'eé' iwa deér baraá tla/ángw muko,

⁸ deeloodae masoomba aníng bira aán in bihhií surúk, nee bariise bira aán in sihhít as aníng.

⁹ Geeraharuuse bira aán deeloodae axweesani kan máy, nee daba' ngari gawaá afer'ín qaasiyá'.

¹⁰ Afór múk urén kari xasltis, nee afer'ín kari tseek.

¹¹ Heé kangw'eé' gwaa axaas in ooi, ‹Yobu Mungú ngu tsuuqi.› Nee heé aníng ilaawo iga ar in ooi, ‹Kangwdá' naa axaás oo tsuwa ló'.›

¹² Asma narkutmoó iga i /aa/aá ay una waangexwaár, nee tam heé baabá wásl oo taa /iisiiká una /iís sleeme.

¹³ Tsuuqaá heé naa baraá tsaxwá wá tuú/ ina sláw, /ameenár kwaeeli ana /iimiís ngari qwal/úr áw.

¹⁴ Hotaá ganaa'á' dir'eene a adór tsitaay nee iri untsuusiyé', nee gana'amu nguwa tlehhiit dir'eene a adór hiyaay, nee slamaangw.

¹⁵ Aníng tari adór ilaá taampa dír taampaaro, dír toqoorayhe aníng tari adór ya'aaín.

¹⁶ Aníng ana baabuú narkutmo tleehhiít, nee hariímár heé ni xu'aaká ana alqaytsiít.

¹⁷ Heé hota gana'aaká una /atlo giqáw, muruudá' aa haasaáng wa hayóh guri afa baá/.

¹⁸ Aníng nari oó', ‹Gár i aw i káhh daxta an baraá xafte'eéní gwaá'. Deelór hotaaeé' kingi tlahhas adór hhasaangw.

¹⁹ Aníng a adór xa'anoó dee/áruuwós a aftlin afaá ma'aay, adór xa'anoó xweeraawo hara' i haleemi naa/amiisi.

²⁰ Umuú looár tlawa xirfuú /abén una sláw, nee /uuruú /abén una sláw umuú baalaaro adór ga/alér /aben.›

²¹ «Qoomaadae muu in iiárií qamín nee in dán, nee tan qartlamiit as gurbu'utaeé' kawa axaasi.

²² Alaá axweesante'eene heé aa kii/ i kaahh /aymu ooaro, nee axweesante'eé' umuú heewo gu sleér adór tluwaay.

²³ Aníng tina adór tluwáy wá daamaarán. Nee afe ngin awaatlárí mayá' adór múk buhaaraá daamaaraám.

²⁴ Qoomár niwa gurhaamutiya' aníng ina qaseengw duúx, nee qwal/uueé' ngwa basehuwi'iiká.

²⁵ Ina loohírí laqaám, aníng tari adór waawutmooín. Aníng tari adór waawutmoó baraá tla/ángw slaqwaruuseerós i dirií'. Aníng tari adór heé múk tsuunqumiís gu gurkwa/amís.