YOBU 28 - Biblía Axweesantá Hhohho' ar Mungú 2004

Xirfuú sagalooa

¹ «Looeemaawo boh'ér muqslaadár peésa kawa folaaliti i deer. Nee dír sahaábu kuwa hhohhoeemamisi i deer sleeme.

² Muu muqsla gan yaamuú wá folaliit, nee muqslár da/aten kan baraá tlaa/eé wá kwahhumamiit.

³ Mukdá' tlaa/aá folaaliít tsaa'aso kanar dah baraá bohóngw giíw. Tan baraadá' wá tsee/aaraarín ay amór saaw, tlaa/aá tlaxo uren kin baraá ma/amidá' wa foliit.

⁴ Yaamu ngin fooliyá' ay amór saaw dír hotaá muko, tari sawees amór muu i baloó aa'aá kayká. Inooín kin tla/eeri tsegit ar him'e nari hambaleleamitiyá' amorqá' nee tiqae.

⁵ Hhape an dír muruú /ayma kuwa slaaslay. Ala guruú baraay kun warqeemiis ar asla.

⁶ Baraá tlaa/eewose an dír tlaa/eedá' ta bay Yakutír sirboo/ kiwa slaslay, nee hhapeerós i sahaábuú koón.

⁷ Loohidá' tam tsir/ór fu'unaá /aay ga baloó xu'uká, tam iltá gwareesi gaa aandiiká.

⁸ Makaydaá siduuseero ar gaa adat i káhh, tam diraangw aa didár waaraahhiiká.

⁹ Hee tlaa/aá gawden gin folaaliit ar dabaawós. Tlooma ngin folaalitiyá' ay baraá gwe'edoowós.

¹⁰ Mapari gan feehhiis ar baraá tla/ángw tlaa/a, tlaa/aá tlaxo gawden ilaawose giri ar.

¹¹ Yaaér wa/amiim gan tseek as miwa wá/. Nee muruudá' taa luú/ ngun huuw dír gwa/aat.

¹² Ala dír sagalooa kawa slaslay a diimá? Nee dír tsaahha i diri' a diimá?

¹³ Sagalooa adór kar afhhamít hee ga xuiiká, sleeme baraá yaamaá múk slafa a aandaaká.

¹⁴ Iloo i kaahiya', ‹Sagalooa dir'eene i káhh.› Tlawi sleeme i kat, ‹Aníng sleeme a koomaaká.›

¹⁵ Sagalooa ka slaaslayká ar sahaábu, sleeme peésa a qoomeská as kawa inósár tlaxw.

¹⁶ Afhhamitu'uumarós a alqoomeská ar sahaábuudá' Ofiriír daáhh. Tam tlaa/eedá' ta bay Sardoniki laqaá yakuútír sirboo/ dirose i saapiiaaká.

¹⁷ Sahaábu nee kioó'ooro i alqoomeská nee inós. Tam sahaábu ló'wa hhohhó' u waa'alatká ar sagalooa.

¹⁸ Tlaa/eedá' hhohho' awa baraá tlawi nee kudá' qwiirii/á' sleeme dír sagalooaro in baloó o'ká. Tlaxór sagalooaro, ar tlaa/eedá' ta bay marijani a na/oó tawo.

¹⁹ Tlaa/eedá' ta bay yakútír booreék awa yaamaá Kushír dahhá' nee sagalooa i alqoomeská kureeriiwo. Tam sahaábu i hhohh'aa'áy u baloó tlaxwká ar inós.

²⁰ Gawaá adoorihe sagalooa amór i dahh a amá? Dír tsaahha kawa slaaslay a diimá?

²¹ Asma kaa luú/ dír ilaá múk slafa, tam tsir/ór hhampe'eerír tlatlaw ga aandaaká.

²² Hhitiru'uuma nee gwa'araro i kaahiya', Atén bayrirka aga axaasaán iaarene.

²³ Mungú loohír sagalooa kar slaaslay ga xuu', nee dír kawa slaaslay ga xuu'.

²⁴ Asma inós in qaytsiit ay ku/uyaá doori, nee umuú gaaro gan ga/áy baraá yaamuwo.

²⁵ Baalaadá' fur'a ngiwa iilooeés, nee ma'aay ngiwa qoomeemeés ar xooslomooduú qoomeemees,

²⁶ baldá' tluwaay nguwa i axweés, nee loohír mankari nee kwarara/a gari tleéhh,

²⁷ baalaarihe Mungú sagalooa gana ár gari alki/iít. Gari ureés nee gari alqaytsita hhe'eés.

²⁸ Mungú hee guri báy, ‹Ga/aaweek, Aako bur ilaiwaawá/ an sagalooa, nee tsaahha a tin parátl dír tlakweemaawo.› »