YOBU 27 - Biblía Axweesantá Hhohho' ar Mungú 2004

¹ Yobu iri kumiít tiwa aleekal/an iri oó',

² «Munguú Gawa iqo daadeer, kudá' hariímar'eé' gaa hayoh, nee Munguú Aleesleemusmo iqo daadeer, kudá' hhiintluueé' gwa artis.

³ Dír hiinslueé' ir kumiiti, nee dir qeeruú Mungú ir baraeéní kahhi,

⁴ gám afkwe'eene án lama a baloó tsataaká, tam ar tsifrangw'eene al/ayma a baloó ooaaká.

⁵ Aníng kuungá' nu baloó tsaahhaaká adór tar looeemaá katá'. Aníng dakuúsar'eene a ya/amaaká ay gwa'ara.

⁶ Aníng ti daba' hhohhó' nee sleeme a warqaqawaaká. aníng ti xuruumitaaká.»

⁷ «Wakusmooeé' masók kun adór tlakusmoó wá slahh'eemiis. Heé nee án ti alkooma'aaká masók ku dakuús i harafaar.

⁸ Harahhifór heé Mungú gu sla'aaká a milá, inós burkwa sií' kuri slafiingw hingeés nee Mungú.

⁹ Axáy qoomár slahh'amu burngwa sláy, Mungú /aa/eewós giqo axaási?

¹⁰ Inós inqo dír geeraá Munguú Aleesleemusmoó wá qwalaalá/i? Inós inqo Munguú ateetína daqisleém?

¹¹ Aníng kuungá' nu intsaahhatís tlehhma'aá Munguhe, Muruú Munguú Aleesleemusmo aa qoomeés u lu/aaká.

¹² Kuungá' kilá' ilahunge ís iga mak aandé', Ahaá waáy, gár nisa hardaté' sleémeero ar boqoondahúng kwisingae?

¹³ Gár Mungú aa amohhe'eés as heé tlaákw an tí. Nee an aalír baramaanuuse i dír Munguú Aleesleemusmoó wá sleer.

¹⁴ Bar na/iiwós naa tlahhiyé' a as kiwa hhaamisi, nee xwaylarós iwa aleemár hot.

¹⁵ Nee panaydá' aa meet kun alhhe'ees nee pu/i, tam kwaeeli sleeme hhawaateeín ngi sa hheehhe'eemiisiaaká.

¹⁶ Inós tam peésa ngi ufa tleehhi, tam tlabaawós ngi tlafi tleehhi,

¹⁷ inós ngi dalaa/i! Ala heé hota ganaá' gin tsiit, nee múk dakuús wásl peésaarós tidá' gan qasmiis.

¹⁸ Doó heé tlaákw aa tleéhh a adór neewór hibambi, a adór islángw xuumusmoó qaymo.

¹⁹ Qoomár bir qatuú áy a daqaarmo, ala iri diirí alhhe'eesút, binda tláy qatuwo i qayti daqaari'iima i káhh.

²⁰ De'e gun bitlbitlár eér, adór gwaanduú ma'aay. Bambaao gun xweeraá haradát guri ar darát.

²¹ Fur'ár da/aá daahh gun gagát, guri adaá ar tleér, gun dír do'ós wá na'át.

²² Mungú gun fur'aárí tlees sleeme gu gurtlayká. In mak ta'aaín yeé ya'aawose, ala gár i bui i káhh.

²³ Inós bir ti'ii'ín fur'ár /uuruú koom gun i xuurú', nguri kwarkwát dirós tidae.