YOBU 26 - Biblía Axweesantá Hhohho' ar Mungú 2004

Mu/aywatstá Yobu

¹ Aluuwo Yobu guri mu/aywaáts iri oó',

² «Xáy, heé aleesleemuú koomaaká kur mak /ís! Nee heé /uuruú koomaaká kur mak tú/!

³ Xáy, heé sagalooár koomaaká kur mak gurbú'! Xáy, xu'utiirók kar mak alki/ít.

⁴ Axweesantók tisíng hám heé ki kát a heemá? Qeeruuwí baraawók daáhh oo heemá?

Mungú ku aleesleemu úr

⁵ «Gi'i baraá yaamuwo in daaraaxiyá', ma'aá baraá yaamu nee muruú baraadií diriia sleeme.

⁶ Gi'i dír ilaá Munguhe i tsee/aá tawo. Tam didár hhituru'uuma sleeme kaa lu/iiká.

⁷ /Iya gana tleéhh gawaá tawórí ale, nee yaamu giri tarereé' gawaá tawo.

⁸ Ma'aay gina tseék baraá huunkáywós oo iló'. Huunkáydá' sleeme i baráy wá feehhamiitiiká.

⁹ Slahhaangw guna tuuntuúk. Huunkaywós guri gawaadí intláh.

¹⁰ Tlawi gana súp adór gaangeei, didár digimuú giwti nee gwa/aateema.

¹¹ Mungú bira gahhaát uheemaá doori in daaraxaatiyá' nee in waa/oo/iyá'.

¹² Ar /uuruuwose tlawi gan xasltis, nee ar tsaahharose makiito'odár baraá tlawi ta bay Rahabu gan tsaees.

¹³ Doori gina paapa/aás ar hiinsluuwós, nee dayshamoodá' ti gileéhh guna dakós ar muút.

¹⁴ Ala muruuwí a sagér tawo ngina óh ar muruú i tlehhaahhiti, nee baraá tlehhmi'iiwose atén gár naa axasaán a bayrír tawo. Ala tlunaa/ír aleesleemuwós heé tsaahharo ga aleesláw a heemá?»