YOBU 24 - Biblía Axweesantá Hhohho' ar Mungú 2004

¹ «Ahaá, gár Munguú Aleesleemusmo qooma ngisa qaasiiká ar sakwasleema ngiwa tleehhi? Nee mukdá' inós gu xuú' baalarós ti misingi xuiiaaká?

² Múk digeemaá yaamu gi warqeemiís i deer, barakarka bee/ángw muu gun fís guri de'eén.

³ Daqoó heé panmo ngun ar tlayá', Awuú /ameenír kwaalo'o ngun arhaánír wá ar tlayá'.

⁴ Baraá loohiro narkutmo kun baraá sla/átí tliwii/. Narkuute baraá yaamuwo in inooín wa nahhamít.

⁵ Gawaá adoorihe narkuute muruú /aymar'ín gun adór daqwayér wa leelehhtuú eér baraá xaanxaay, nari slaktuú aya' as gár na/ii'ín kir /aymiisi kawa slay.

⁶ Iri qamaá múk fiiqituú eér, sabiíbuú baraá qamaá múk tlákw nguri bu'uná' sleeme.

⁷ Xweeraawo in qaatiyá' ar /aankwets, tam gár ni uuntsuusiya' tsaaqwaro i káhh.

⁸ Tluwoó gawaá tlom'i gin hirquuqúy, nin matlimiitiyá' baraá gam'ér tla/u as mikiwa naa/aás.

⁹ Kookariya' i dayá' awa na/oó baabá wásl ngu dír isángw wa hayoohá', na/oó narkutmo nguri arhaánír wá qaasiyá'.

¹⁰ Na/iiká' nin hi'iimitiyá' ar /aankwets awa tlaba' wasl, angaáno ngun loohisiyá' tam afe nga naa/asi'iiká.

¹¹ Na/aá seituúni ngin tuuaitiyá' as di/i ngiwa tlehhiitiya' ar maraá mukwí tlákw, nee difaái ngin tsoo/aa/itiyá' ala tam waxe ngi gaasiaaká.

¹² Baraá ayko /ifór múk slahhaá' tiqtiro a axamiisaán, nee múk slahhaá' inkahhi'iiwo i alee/isoó firiirín, ay nee hamí Mungú /aa/aá mukwí gi axamiisiiká.

¹³ Mukko i deer oo gwa/aateema gi sla'aaká, múk loohír gwa/aat ga xuaaká, tam sleeme loohirí ngiwa ar oohiya' ngi slaiaaká.

¹⁴ Iimi bir pisli'iimít tsu/utusmo in tseewa ti'iit, as kahhó' narkuute nee mukdá' aleeleém nguwa tsu/i, nee qoomár xweeraawo in fisisín.

¹⁵ Tam fuqusmo sleeme qoomár iimi iwa yahhyahhaamit gan daamaarán, i baraawós i kaahi, ‹Aníng heé i ár i kaahh.› Sagós guri qup inqwaariro.

¹⁶ Fisuuse koo/ír do' xweeraawo gan tú/, tlaatla/ango tin pindór hara qaasiyá' Inooín gwa/aateema ngi xuiaaká a milá.

¹⁷ Asma ma/ami dir'ine an matlaatle, inooín a mulqér ma/amír de'e tlaaq.

¹⁸ Kuungá' a kata', ‹Múk tlákw kun fitsfiits ar gwaanduú ma'aay, maray'ín kaa lu'ús baraá yaamuwo, heé kií/ baraá qaymoorós ar sabiíbu i kaahh.›

¹⁹ Adoodár tlaa/aá tluwaay ir weeqaaqitiya' as axwnáy nee tsee/amá, an adór gi'i ni tleehhiya' dír múk tlakuuse.

²⁰ Xwaylito'ór gwa laqwal guri gunqaarés, Heé inós gu insláw i kaahh Gawaá adoorihe heé tlaákw kun adór xa'anoó wá giqáy.

²¹ Mukwí muruú /ameenár kampeera ngun /ayiyá', /ameenár kwaeeli ngi gár hhoóí tlehhahhitiaaká.

²² Mungú ar /uuruuwose mukdá' /uureemaá koóm gun hhaamiis, Mungú bira sihhiít múk tlákw in qaatl.

²³ Inós gina amohhooárí haniís nari ak diihhe'eesiyá'. Ala inós lohduuín gi ga/áy.

²⁴ Inooín nin daara/uutiyá' qoomár niinawe, naagáy nari suquutiyá'. Nin /ootsiyá' nari nususu'utiyá' sleémeero adór gitso. Sleémeero kin suwatsaat adór sagér angaáno.

²⁵ Tí bar looeeká heé lamtaeé' ngi oó', heé ngi laqaám adór aníng gár naa axweés tar tlooraá tawo?»