YOBU 23 - Biblía Axweesantá Hhohho' ar Mungú 2004

Mu/aywatstá Yobu

¹ Aluuwo Yobu guri mu/aywaáts iri oó',

² «Tam ay laarí qununu/ay'eé' i qarqaar, nee slahh'amuueé' un slasláw nari gurhaamuút.

³ Dír inós nguwa slaw geeraawo bar xuú', Geeraawo an hardáh didaádá' iwa iwiiwiti.

⁴ Geeraawo kwasleemar'eé' a dirósí huúw, aníng tiri dirós wa aleekalaá/.

⁵ Geeraawo /aymuú ni aníngár mu/aywatsi ugwa xuú', nee gár i babay sleeme aga tsaáhh.

⁶ Ahaá inós aníng inqo tlaampa'aási ar /uuruuwós sleémeero. Aasla'áy! Ala aqo in iiárií qaas.

⁷ Daqaní múk hota ganaá' nee inós tan axwees, Har'ohusmooeé' geeraawo kwasleemar'eé' ngin tsaat tawa heé dakuús wásl ay kureeraá kureér.

⁸ Ga/aaweek aníng ni amorqá' xuu' u slaslawaaká ni adorqá' laaq u ara'araaká.

⁹ Una mak leelehhtuú áw bihhaá basa, ugwa ariiká, ana mak kií/ /iya, inós i kaahh.

¹⁰ Ala inós hotaaeé' gi ado xuu', inós aníng iiarto bira hhe'eés, nin ti'iít oo hhoohhoó' adór sahaábu.

¹¹ Aníng ya/atirós an aluúwaá nákw, loohirós aga óh sleeme a bihhií qaytsimiitaaká.

¹² Aníng dabeerós aga baloó mawiiká. Axweesantós aga amohhe'eés baraá muunaáeé'.

¹³ Ala inós i baloó warqayká, heé inós gu warqeés a heemá? Nee gár inós tleehhamooro i slai an tidá' tleehharuut.

¹⁴ Asma tidá' inós aa qoomeés daanduueene ga boo/ees, nee muruú yaariír oo baraá inslawaywós i diriia'.

¹⁵ Gawaá adoorihe aníng dír geeraawose ana daanda feehhiít daeero, bur aldakuút an da'aymiít.

¹⁶ Asma Mungú muunaáeé' gwa /araamiís, nee Munguú Aleesleemusmo aníng iga daanda feehhiís.

¹⁷ Asma aníng ma/ami iga ót tam dír geeraaeene ma/ami aa qipít.