YOBU 22 - Biblía Axweesantá Hhohho' ar Mungú 2004

Wa'aá tám awa Yobu nee mulqeerós tiwa axweesani tlaxuné'

¹ Aluuwo Elifasi kuduú Temanmo Yobu guri mu/aywaáts iri oó',

² «Hee gár Mungú nguwa bui a mila? Looeemawo heé sagaloó', sagalooarós inós kilós gun gaa wa bú'.

³ Kuúng kawa xu' bartu tsá' Aleesleemusmo qwal/atisaro un aleesleéra? Laqaá kuúng burtu xaslxaansli wásl gár inós nguwa bu'?

⁴ Kawa xu' gár Mungú us muxi a as kuwa ilaiwawaá/a? An gár us sakwasleemuúti?

⁵ Aasla'áy! Gaa aqo tlakweemaawók nina tlahhí'iíke, nee an hhe'eemiskáheéke tlakweema tlehhtuuwo.

⁶ Hhiyaawók una tawo arhaáni ót, inós gaarók ar i kon iqo káhh, tlawuuwós kudá' wák i kon una arhaánír wa ót, inós gár i tsiiti i káhh.

⁷ Múk aa slaaqamiit una /ít ma'aywo. Heé aa qwariit kuri fa/ár /ít.

⁸ Heé /uuruú koóm una tawo ga/eér yaamu gari adoodá' wa hayóh, Heedaádá' taa gurií baá/, kuri meér ngiwa al'iwiiti.

⁹ Kwaeeli ina afér kaaharén ar watlís, nee panaay una /ít gadiyér dabaawoge.

¹⁰ Gawaá adoorihe kuúng taa harweér ar tsaaxwel, de'ér yaariir un i xopít ar wa'aá wák.

¹¹ Giwti ugwa ót, hám daxta a xumiská, nee gwaanduú ma'aay kuúng ugwa luú/.

¹² Ahaá, Mungú i gawaá doorií diri'ikáhe? Tsatse/ sleeme xuxuueek adór kur gáwtí sawén.

¹³ Ala kuúng an kat, ‹Mungú mi xuu'? Huunkayhe ninqo baráy waaraáhhi iri baraaká' i sakwasleemuutár áy.

¹⁴ Huunkoó bó/ guna harweér daxta i gaa ariiká, inós in gawaá doori wa hi'iimiit.›

¹⁵ Kuúng loohidár bál geera a óta, tidá' múk tlákw ira óh?

¹⁶ Mukdá' kuna fiíts dír qoomar'ín ira xeeriiká. Hota sleémeero kiri guú/ nee ma'aay.

¹⁷ Mukwí an kudá' Mungú gwa bay, ‹Atén ti meer.› tari oó', ‹Gár atén Munguú /uuruú koóm ti /iisi a mila?›

¹⁸ Tam adoorihe Mungú maray'ín gina niiqín muruú hhoe. Ala axweesanoó múk tlákw masók dir'eene ku saáw.

¹⁹ Múk hota ganaá' muruuwí gun ar tari qwalaa/, nee múk dakuús wásl gin waaqasén giri niqis.

²⁰ Tari ooi, ‹Looeemawo wakuuseerén a hhaán, nee gár aa met kan nuquus nee asla.›

²¹ Aá Yobu! Mungú ya/aameek as wayda kuwa sleer, daqaní hhooeema i sleér.

²² Intsaahhatisarós axaaseek. Axweesantós baraá muunaáwók ti qas,

²³ Kuúng bara wayá' amór Munguú Aleesleemusmo, nee bir ta dirós i tsatsa'arés, tlakweema bira sawés dír do'oge,

²⁴ barnaxes daqaari'iimarók aga amoosií kwáhh, tam sahaábudá' Ofirír daáhh bura kwáhh baraá tla/ángw tlaa/e.

²⁵ Munguú Aleesleemusmo bura sahaábuuwók tléhh, nee bura slá' adór tlaa/aá tlaxo gawdén ar ale,

²⁶ daqaní kuúng tari qwalaalá/ as Mungú Aleesleemusmo kuri i qaytsít ar harahhifo.

²⁷ Inós kuri firiín, kuúng uri iiárií qaas. Kuúng al'axweesantók kari bú'.

²⁸ Kuúng muruú ta tlehh kuri qoomés, iri tleehharuut, lohduuwók nari gwa/aatiyá'.

²⁹ Asma Mungú múk daara/aám gu daahh, Ala kudá' tsatsaa'aren ki ba/amis nee Mungú.

³⁰ Inós heé daba' hhohhó' gun ba/amis. Tun ba/amis as kuúng tuwa xaslxaansli wásl.»