YOBU 21 - Biblía Axweesantá Hhohho' ar Mungú 2004

Mu/aywatstá Yobu

¹ Aluuwo Yobu giri mu/aywaáts, giri báy,

² «Axweesante'eé' tí iiárií qaasa hhe'eesaak, as kahhó' iwa gurkwa/asarhúng tleehhit.

³ Gár niinawe aníng aleqiitlaré' ni axweés. Aníng bara hhe'eés axweesanto, niqayhúng ku iitleerá'.

⁴ Ahaá, aníng gár ni i /aa/amiim a heéwo? Gár qitla ngus harslaaqaat a milá?

⁵ Aníng i qaytaré', kuungá' ta waa/oo/á', daqaní afe ka otá' ar daba'.

⁶ Kaangwí iga slay bura insláw daanda in tawo feehhiit, nee slaqwte'eé' sleémeero in ta/anteerút as dae.

⁷ Asma milá múk tlákw mis hotaatín, bareé /uuremooín in doogiginá' tam ay diimaay.

⁸ Na/ii'ín ngin ariyá' iwa doogiginá', nee nángw nangw'ín ngun ariyá' iwa uraaray.

⁹ Maray'ín ki waahár, gár gi dirii' i káhh, muxtár Mungú i káhh gawaaine.

¹⁰ Awer'ín in laqwaliín sleeme i slaaqamitká. Hikwaaín in laqwaliyá', ar guruú kwakwaahh i káhh.

¹¹ Na/ii'ín kudá' ninakw ngin tsee/ií duuxiyá' adór deeloó bee/ángw wá ale, in tawo /an/anuusiyá'.

¹² Ni/imár puunda nee ar gidaandoori ngin ni/iná', nee afór firiímbi ngin saqwalaala/iyá'.

¹³ Tan hoot ar diihhooa baraá slafingw'ín adaá wa ale, nari qatliyá' ar wayda, nari /e/eetiná' baraá gi'i.

¹⁴ Mungú nguna bayé', ‹Atén miti daawitamisaar. Atén kangók kwisíng axaasaro u sla'aanaaká.›

¹⁵ Tari oó', ‹Munguúsíng tawa kata' a aleesleemusmo, inós a heemá kuwa sagadiyusaan, nee ma slawaán inós bura firirimaán?›

¹⁶ Áx ga/aaweek, slaasláwar'ín kan slaslaykáhe ar /uuruuín? Axweesanoó múk tlákw masók dir'eene ku saáw.

¹⁷ A sagaáwá magá' múk tlákw kuwa slaptamís adór tsaa'astá wa ale? Slahh'amu nguwa slayé' a sagá wa magá'? Nee Mungú xaylá nga hhaamiís ar buhhtaawós?

¹⁸ As kahhó' niwa adór hhaanslaá fur'a ir tlatleer tleehhitiyá', nee adór mundoó bambaao ira tleér.

¹⁹ Kuungá' a kata', ‹Mungú li/oó tlakweemaaín gwa amohhe'eés as nguwa na/ii'íní bui.› Aníng an kah, ahaá, ngur buu' dir'íná kilá' as kahhó' ngiwa xuiya'.

²⁰ Ahaá, inooínaá kilá' qwanay'ín ngur ariyá' ilaínaá kilae, Inooínaá kilá' buhhtaá Munguú /uuruú koóm ngir tsaqiyá'.

²¹ Gár do'ós ngus amohhe'eesi a milá, inooín birna qatliyé', bál bar hotaaín kaa hartsaát.

²² Heé Mungú gu xu'utís garkaro i deéro ar inós i xuiiká? Inós an kudá' kudaá gawaá doori gi sakwasleemuut.

²³ Kooko in gwaa' baraá diihhooarós, ku amohhoó' nee ku saxamaár ay gwa'ararós.

²⁴ In gwaa' slaqwtós i wahhát nee faduuwós sleeme ki gawden.

²⁵ Barakarka in qátl ar gurhaami, gár hhoo' ar aa tsáq i káhh.

²⁶ Tam adoorihe sleémeero qatlooro a wak, sleémeero naanaga gin eér.

²⁷ Iia qaasaak! Aníng inslawayhúng ugwa tsaáhh nee axweesanoó tlákw oo daandueene ta koonda'.

²⁸ Asma kuungá' hamí a kata', ‹Doó waawutmo gaálaay, do'odá' heé tlaákw aa hoót i amá?›

²⁹ Ahaá, kuungá' hhayutuuse aga yaahasi'ikáhe? Ahaá, muruudá' tunda báy ugwa ya/aandi'ikáhe?

³⁰ Tunda baykáhe, ‹Heé tlaákw an panmoó meét, kun ba/amis deelór Mungú bir amór múk i xaraasl.›

³¹ Heé qiítl tlakweemaawós ooaro, laqaá heé qiítl li/oó tlakweemaawós bu'utuuwo.

³² Qoomár burku baraá /aantarós i huuw, kun baraá /aantarós i xún.

³³ Múk yaariír gun aluú wá eehar, nee oo geeraawós wa hi'iít a tlaftá tawo, qoomár burku tipín i ló'wa tsú' dirose, asma hhapeerós kan tseegamiis.

³⁴ Áx daxta adór aníng ir gurkwa/asa' ar tlooraá tawo, kuungá' gár ni mu/aywatsiinda' i káhh, a har lama.»