YOBU 20 - Biblía Axweesantá Hhohho' ar Mungú 2004

Mu/aywatstá Sofari

¹ Aluuwo Sofari kuduú Na'amatmo guri mu/aywaáts, iri oó',

² «Yóbu, aníng ilaa/aro taa harslaaqaát, gár ni slaa' aqo axweesantók ngin mu/aywaáts.

³ U naanaqár wa slaá', ilaa/aro ti aleeslawaaká. Ala baraá sagw'eene aga slaá' axweesanti, ngiwa mu/aywaats.

⁴ Kuúng dooqa gaarí aga gunqaarés adór iimír aange Mungú hee ngura tleéhh, guri qaás baraá daanduú yaamu.

⁵ Heé tlaákw ga tsaahh qwal/uuwós tawa oo har qoomár niina, nee bar/uú múk aa qwaar oo har afiqoomár ló'wá niina.

⁶ I ya/aán heé tlaákw iwa slu/ubiibin, ay dír doori ngay kwatiiti, in ló'wa tleerúy ay dír sagós huunkáy ngway kwatiiti.

⁷ Ala kun amór saáwí kwaahh, adór /oo/oorós wa ale. Mukdá' aáng gu xuú' tari ooi, ‹Karií amá?›

⁸ In qwaar adór tlata, kuri baloó ariiká male ale, in qwaar tari adór iigu'utuú xweera.

⁹ Kudá' gwaa ar, gu malé ariiká, tam didá' aa hoót kari baloó tsaahhiiká.

¹⁰ Na/iiwós gurtleemu nguri dír narkuuteérí firiná', Muruudá' aáng inós na /uurúr hayóh, na/iiwós ngun bu'iyá'.

¹¹ /Uuruudá' sleémeero i kon tawa masoomo, gun ar qaat baraá hhape qoomár bira gwaá'.

¹² Baraá afkose tlakweema i tsuuiyá' a adór danú, gin lu/uu/ún baraá guruú tsifraangós.

¹³ Geemawto gi slaiiká, aqo gin ila/án baraá afkós,

¹⁴ ala birna hardihiyé' baraá gura' i qarqariyá', a adór qarkú dayshamo.

¹⁵ Heé tlaákw daqaari'iimár hara/uuntsa gan /aay guri xísl, Mungú ngin baraá guruuwós wa /ur/uur gari wa/amín.

¹⁶ Heé tlaákw gár i du'un a qarkú dayshamo, kun kiihh nee dayshamo, iri gwaa'.

¹⁷ Tsuuqaá diihhooár huwá' inós gi slayká, diihhooár adór ma'aá yaaér wa/amiim ga slayká.

¹⁸ Mamaá hameerós gin slayká, gi aleeslayká ngiwa tsaqi. Slaasláwár halaanu'uumarós ga saqwala/iiká.

¹⁹ Asma narkuute gana baramaanuús, gari tawo máy, nee maraá inós aa tleehhiiká gina hayóh.

²⁰ Asma inós hheehharo iwa baloó hhe'eesiiká, baraá muruudá' aa gurií ba/i, ar i meetisi i káhh.

²¹ Alaá /aymaro tam gwa'amír i meetisi i káhh, gawaá adoorihe, diihhooarós i baloó tleereská.

²² Alhhe'eesoó diihhooaro slahh'amaaye gu xwát, muruú tlákw oo /uuruú koóm guri haraxopiit.

²³ Qoomár bir muruú /aymár guruuwós sadawimiit, buhhtaá Mungú ngun i hardihiyá' tawa adór muruú /aymarós

²⁴ Barnaxes paángár muqsli gaa geewakáy, paángár muqslír sirdaa/aat aqo gun mút.

²⁵ Mahaangw kun gawaá slaqwtós wa tuu/, afkú mahaangw i qwiirii/ qoomár burku tu/ún gawaá daanduuwose, daér gwa'ara guri eér.

²⁶ Muruuwós oo aa baáts kun hhaamiis, Mungú inós gun ásltí kwaahh guri /ak, inós nee múk do'ose giri hhaamís.

²⁷ Doori tlakweemaawós ngin laqaná', yaamu nguri tlukná'.

²⁸ Slasláwaarós kan xaampoiis, baalaadár buhhtaá Munguhe.

²⁹ Gaarí an slaslawár heé tlaákw i slay dír Munguhe, an gár Mungú aa qoomeés tawa hariímár heé tlaákw.»