YOBU 2 - Biblía Axweesantá Hhohho' ar Mungú 2004

Neetlaangw Yobu nguwa malé iiár

¹ Wa'aá hatlae, looarka wake malaykér Mungú ina burumburít dír geeraá AAKOÓ MUNGÚ, Neetlaangw sleeme ina dír dinkwaadá' i hardáh.

² AAKOÓ MUNGÚ Neetlaangw guri yaahaás, guri báy, «Kuúng a dáhh?» Neetlaangw AAKOÓ MUNGÚ guri mu/aywaáts, iri oó'. «Aníng dír ni daahh a baraá daanduú yaamu nina harweeririím.»

³ AAKOÓ MUNGÚ Neetlaangw guri báy, «Sagadiyusmooeé' Yobu ugwa aándi? Baraá yaamu sleémeero heé adór inós i kaahh. Inós a heé hhoó', oo gan'amuú tlehhiít, a heé Mungú ilaiwawaá/, tlakweema gi slaiiká. Inós aa ló'wa /aátl gan'amu nguwa tlehhiiti, tam kuúng aníng iga duki, as muruuwós nguwa tawó hhaamiis.»

⁴ Neetlaangw AAKOÓ MUNGÚ guri báy, «Kaahari nee kaahari, hee umuúqo gár i kona aqo gan duux as slafiingós nguwa ba/amisi.

⁵ Axáy daxta dakók gawaawós i tleeseek, slaqwtós ka kwatít, áx, bura qo /ooslinká.»

⁶ AAKOÓ MUNGÚ Neetlaangw guri báy, «Gimáy adór ta sla' /iiseek daanduú slaqwtose, ala mu gaasaar.»

⁷ Neetlaangw iri didár geeraá AAKOÓ MUNGÚ wa tláy, Yobu guri slahh'eemiís ar inkahh'aá tlakw, inkahhi'iiká' slaqwa sleémeero ngina alti'iitiyé', iimír tsa/oó yaaér wa tleemu ay tan/ér saga.

⁸ Yobu parhhamtá qambeesmo gari taataáhh, iri iwiít baraá da/ara, tiri hhusliít ar parhhamtadá'.

⁹ Hareerós guri beér, «Tam hamí aga /átli gan'amu kuwa tlehhit? Mungú /ooslimeek, ta gwá'.»

¹⁰ Yobu hareerós gari mu/aywaáts, iri oó', «Kiíng adór tar axwes a adór /ameenár daktana ir axweemaamis. Bar muruú hhó' una dír Mungú wa ilaoohaán, gár muruú tlákw kus ilaoohanaaká a milá?» Baraá muruuwí sleémeero Yobu /aymuú tlaákw afkose gwaa ooiiká.

Yobu mulqeerós nguwa neetleesi eér

¹¹ Mulqerka tám ar Yobu, Elifasi oo baraá yaamaá Temani, nee Bildadi oo baraá yaamaá Shua, nee Sofari oo baraá yaamaá Na'amati, kángw slahh'amuú Yobu nguwa axaasiyé', niri tsabiné' nguwa neetleesi aya', nee nguwa gurkwa/amisiya'.

¹² Nguwa amooqá' saáwá ariyé' ngwa tsaahhi'iiká, nina /aa/iyé' ar afór ur, tlabaaín ngiri feehhamisiyé', nee hhape ngiri gáwtí kwakwahhiyé', nee gawaá sager'ín, as gurhaamír ur.

¹³ Niri baraá hhapeérí iwiitiyé' dinkwa nee Yobu deelo faanqw, tlatla/aangw nee xweeraawo, tam gár naa dirós i ooiyé' i káhh, asma adór slahh'amuuwós kur úr kana ár.