YOBU 19 - Biblía Axweesantá Hhohho' ar Mungú 2004

¹ Yobu iri oó',

² «Ay xaylá i slahh'eemaamisa'? Aqo in diqiya' tlaqaqatá'a ar axweesanayhúng?

³ Ay waaiikaá mibaangw iga tlukakiindé', aqo murumita'aakáhe iwa adoorí tlaákwí tlehhita'.

⁴ Aníng tam geeraawo aga dakuusi, dakuúsar'eé' a daanduueeneekáhe?

⁵ Kuungá' kawa xua' tundun hhó' ta aninge. Slám kawa xua' slahh'amaayer'eé' tí ana sláw as aníng tawa tlakusmo.

⁶ Kuungá' xuuaak adór Mungú adoorí ngira aníngí tleéhh. Inós tsaaxweeli gaa qaás, as kahhó' aníng iwa ot.

⁷ Qayté', aníng a uuamiím, a kah, ‹Hhituru'uuma,› ala taa mu/aywatsiiká, an ateetiím ar afór ur, ala tam tidá' ti sahariím a slaslawaaká.

⁸ Loohir'eé' kaa tseék ar baqa, as kahhó' niwa waarahhaaká, lohduueé' gaa giwísh.

⁹ Diihhooar'eé' gaa hingeés, slamangw'eé' gwaa hingeés gawaá sakw'eene.

¹⁰ Aníng iga giqaaqáy badu sleémeero, aníng aga bu'umiít, harahhifor'eé' gaa adór xa'anoó wa hingeés.

¹¹ Muuna gwaa ló'wa gaás as aníng, aníng adór ir tsatsahhan a adór wakusmoowós.

¹² Slaqwaruuseerós i amor'eé' keér, loohír amor'eé' keemu ngaa qaroó tleehhiyé', dooeé' ngwaa harweeriyé' ar xafay'ín.

¹³ Mungú hhaee'eé' gaa amór saáwí qaás, mulqer'eé' ar slahhaa' iga geexeér.

¹⁴ Mar'eefooeé' nee mulqer'eé' iga meér alee/iimisuuwo.

¹⁵ Dahaayér dooeé' iga gunqaarés. Sagadiyuuser'eé' ar dasu adór ir tsatsahhana' a adór dahaaymo, dir'ine án a adór heé xuaawásl.

¹⁶ Sagadiyusmooeé' u mak ateetiím, ala i ooína? Un ló'wa harhheehhe'eemiís ar axweesani.

¹⁷ Aga tlií/ dír harer'eene, hhaee'eé' awa kilá' in har xinani'iyá'.

¹⁸ Tam na/iieé' in waaqaqaiyá' bara sa adoorí wa ti'iít amor'ín tin waaqaseesén.

¹⁹ Mulqer'eé' ar slahhaa' iga sí', kudá' geeraawo naa slaá' iga baseehuwiyé'.

²⁰ Gár aa met baraá slaqwtaeene a kaahari nee fadu, tsaxwa ina /aáy, alaá umuú gaaro ngiwa qwaareés.

²¹ Na'asé', án i qaytaré', Na'asé' án i qaytaré', mulqer'eé', asma án Mungú iga kutsuúhh.

²² Waáy, kuungá' aníng mis slahh'eemisá' adoodár Mungú aníng ir slahh'eemisi? Waáy mas baloó hhe'esa'aaká daanduueene?

²³ Geera masók axweesante'eé' kana gooín, masók kana gooín baraá kitaábu.

²⁴ Geera masók kana gooín ar kalaámú muqsli nee oo harsaási, nee ar muqslír taa weeqatís baraá asla gawaá tlaa/árí ale, as kahhó' iwa fiitsitká ay kureeraá kureér.

²⁵ Asma aníng a xuú', ba/amusmooeé' i slaaf, nee adór alhhe'eesaywo ir sihhiít gawaá daanduú yaamu, aníng iri aleekalaa/.

²⁶ Nee alaá kaahartaeé' kawa adoorír hhitín, anínguú kilá' ar ilaaeene Mungú un ár.

²⁷ Anuú kilá' nee inós tin doogaán, aníng gwa'ara aga áw. Anuú kilá' ilaaeene inós un ár. Slám a heé hatlaeeká.

²⁸ I ya/aán kuungá' tawa kiloohúng oa', ‹Adór kur eeharaan? Gár kur oohaan as kuwa sakwasleemutaan.›

²⁹ Ala sakwasleema da'ayutaak, aahhirhúng i ya/aán nuwa hhaamis. I hariín kawa xua' adór Mungú kilós tar sakwasleemusmo.»